ҶАВОНОН
Якшанбе 28 Ноябр 2021 07:02
8332
Соли 2021 барои мардуми тоҷик бо рӯйдоду дастовардҳои зиёд таърихӣ аст. Мардуми шарифи кишвар шурӯъ аз оғози сол барои истиқбол аз 30-солагии истиқлоли худ омодагӣ гирифт ва тантанаҳои ин ҷашни умумимиллӣ дар саросари кишвар то имрӯз идома доранд. Давоми 30 соли соҳибистиқлолӣ миллати тоҷик зери роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба дастовардҳои зиёд ноил гардид. Тамоми соҳаҳои хоҷагии халқи кишвар рушд намуд, ки соҳаи ҷавонон давоми ин солҳо дар меҳвари сиёсати Ҳукумати кишвар қарор дорад. То замоне, ки Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҳамчун сохтори татбиқкунандаи сиёсати ҷавонон ва варзиш таъсис ёфт, ҷавонони кишвар зери иттифоқе ба ҳам меомаданд ва ин иттифоқ – Иттифоқи ҷавонони Тоҷикистон (ИҶТ) буд, татбиқкунандаи сиёсати давлатии ҷавонон. Инак, аз замони таъсиси иттифоқи мавриди назар 30 сол пур мешавад. Дар арафаи таҷлили 30-солагии Иттифоқи ҷавонони Тоҷикистон суҳбате оростем бо раиси ин ташкилот Абдулло Раҳмонзода, ки пешкаши хонандаи азиз мегардонем.

-Тоҷикистонро давлати ҷавон ва барои ҷавонон мегӯянд. Ин гуфтаҳо ба он хотир аст, ки ҷавонон аз рӯзҳои аввали соҳибистиқлолӣ аз таваҷҷуҳ ва ғамхории Ҳукумати кишвар бархӯрдоранд ва тамоми ниҳодҳои кор бо ҷавонон мекӯшанд, ки дар ҷавоб ба ин ғамхориҳо ҷавонони худшиносу ватандӯстро тарбия намоянд. Дар амалисозии ҳадафҳои ватандӯстона саҳми Иттифоқи ҷавонони Тоҷикистонро чӣ гуна арзёбӣ мекунед?

-Пеш аз ҳама тамоми мардуми шарифи Тоҷикистонро ба ифтихори ҷашни бузурги миллӣ, 30-солагии Истиқлолияти давлатӣ ва 30 – юмин солгарди таъсисёбии Иттифоқи ҷавонони Тоҷикистон сидқан табрик менамоям.

Воқеан, таҷрибаи солҳои охир дар ҷаҳони муосир нишон медиҳад, ки ба дастовардҳои сиёсиву иқтисодӣ ва инкишофи устувори ҷомеа танҳо кишварҳое муваффақ гардидаанд, ки ба масъалаи ҷавонон таваҷҷуҳи хосса зоҳир намуда, аз имкониятҳои фаровони ақлонӣ ва ҷисмонии онҳо самаранок истифода кардаанд.

Дар ҳамин радиф ҷавонон, ки аксарияти нуфузи аҳолии кишварро ташкил медиҳанд, дар маркази таҳаввулоти хеле ҷиддӣ ва муҳим дар ҷомеа, бозсозии иқтисодӣ, истиқлолияти миллӣ ва эҳёи ҷомеаи шаҳрвандӣ қарор гирифтаанд.

Аз ин рӯ, нақши ҷавонон дар ташаккули муносибатҳои идорӣ ва рушди ҷомеаи шаҳрвандӣ барои кишвари мо хеле муҳим, арзишманд ва таҳкимбахш арзёбӣ мегардад. Воқеан, ҳам дар ташаккули муносиботи идорӣ ва ҳам дар созмондиҳии институтҳои демократӣ – шаҳрвандӣ ҷавонон ҳамчун иштирокчии фаъол ва ҳаракатдиҳанда баромад кардаанд.

Зеро Ҷумҳурии Тоҷикистон бо сиёсати хирадмандона ва дурандешонаи Пешвои муаззами миллат муҳтарам Эмомалӣ Раҳмон ва иродаи мустаҳками халқи шарифи Тоҷикистон роҳи дурусти тараққиёти худ - бунёди давлати соҳибихтиёр, демократӣ, хуқуқбунёд, дунявӣ ва ягонаро интихоб намудааст. Дар ин замина, ҷалб намудани неруи созандаи ҷавонон дар пешрафти давлати демократӣ ногузир мебошад.

Иттифоқи ҷавонони Тоҷикис-тон, ки аз таъсисёбии он сӣ сол пур мешавад, аз мавқеъ ва ҳадафҳои иҷтимоии он аксарияти ҷавонони Тоҷикистон ҷонибдорӣ мекунанд, ворис ва давомдиҳандаи иқдоми неки наслҳои шарафманди ҷавонони Тоҷикистон буда, барнома ва ҳадафу мақсадҳои он дар тарбияи насли ҷавони кишвар дар рӯҳияи худшиносию худогоҳии миллӣ, ватандӯстӣ, таҳкими сулҳу субот, бунёди ҷомеаи демократӣ, ҳифзи арзишҳои миллӣ ва дастовардҳои даврони соҳибистиқлолии кишвар саҳми назаррас гузоштааст.

Агар гӯем, ки Иттифоқи ҷавонони Тоҷикистон дар тамоми давраи фаъолияташ баҳри амалӣ намудани ҳадафҳои оинномавиаш рисолати худро ба таври шоиста иҷро намуда истодааст, хато намешавад. Ҳанӯз дар солҳои аввали фаъолияташ он амалҳои хеле шоёнро анҷом дод, ки дар таърихи ҳаракати ҷавонони Тоҷикистон аҳамияти басо арзишманд дорад. Аз ҷумла, тӯли солҳои 1991-1997 иқдому тадбирҳои фаъолони ин ташкилот пурра барои сарҷамъию муттаҳидсозии ҷавонон ва дар ин замина татбиқи ҳадафҳои давлату Ҳукумати кишвар барои барқарорсозии сохти конститутсионӣ равона гашта буданд.

- Соли 1997 баробари таъсисёбии сохтори алоҳидаи давлатии ҷавонон – Кумитаи кор бо ҷавонон фаъолияти ИҶТ то андозае аз назарҳо дур шуд. Сабаби онро дар чӣ мебинед?

- Албатта, бо пешрафти ҷомеа ниёзу талаботҳои ҷавонон, ки ба ҳар як дигаргуниҳо мехоҳанд зудтар мутобиқ шаванд, низ афзун мегардад. Дар ин замина, фаъолияти ИҶТ ва тамоми дигар ташкилотҳои ҷамъиятие, ки барномаву ҳадафҳои оинномавиашон ба ҷавонон нигаронида шудааст, бояд ҷавобгӯ ба ниёзи ҷавонон бошад. Тавре ишора намудем, ИҶТ аз оғоз то имрӯз рисолати худро миёни ҷавонон иҷро намуда истодааст. Дуруст аст, ки сабабу омилҳои гуногун то дараҷае ба низоми фаъолияти ташкилот таъсири худро расониданд. Аз ҷумла, то дараҷае заиф гаштани сохторҳои ибтидоии он хоҳ-нохоҳ таъсири худро ба низоми фаъолияти ташкилот расониданд.

Дар баробари ин, дастгоҳи марказии ИҶТ як қатор чораву тадбирҳоро амалӣ намуда истодааст, то нуфузу эътибори ташкилот чун як ниҳоди пешбарандаи сиёсати ҷавонон нигоҳ дошта шавад.

-Фаъолияти имрӯзаи Иттифоқи ҷавонони Тоҷи-кистон чӣ гуна аст ва ҳамчун роҳбари ташкилоти мазкур чӣ иқдомҳои навро баҳри назаррас шудани фаъолияти он корбарӣ карда истодаед?

- Ҳамчун ниҳоди ҷомеаи шаҳрвандӣ — Иттифоқи ҷавонони Тоҷикистон ҳадафи худро иштирок дар тарбияи насли наврас, мусоидат ба пешрафту тараққиёти сиёсӣ, иқтисодӣ ва иҷтимоии кишвар, пешгирии зиддиятҳо ва ихтилофоти сиёсии дохилӣ, бедории ҳисси баланди худшиносии миллӣ ва номуси ватандории ҷавонон, таҳкими сулҳу ваҳдати миллӣ, бунёди ҷомеаи демократӣ, ҳифзи истиқлолияти Тоҷикистон ва муаррифии он дар ҷаҳони мутамаддин муқаррар намудааст.

Айни замон роҳбарияти ИҶТ кӯшиш ба харҷ дода истодааст, ки обрӯ ва нуфузи ин созмонро ҳамчун ниҳоди инъикоскунандаи иродаи ҷавонони кишвар барои марҳилаҳои минбаъда боло барад.

Дар ин росто маълум менамоем, ки бори аввал дар Дастгоҳи марказӣ, вилоятӣ ва шаҳрии Иттифоқ кормандон бо штати корӣ таъмин шуда, фаъолиятро оғоз намуданд.

Айни ҳол Иттифоқ дар тамоми шаҳру ноҳияҳои кишвар намояндагии худро расман ба қайд гирифта, дорои 937 ташкилоти ибтидоӣ ва 70445 аъзои расмӣ мебошад.

-Кадом иқдоми Иттифоқи ҷавонони Тоҷикистонро ҳамчун ташкилоти ҷамъиятӣ дар пешрафти ҷомеа муҳим арзёбӣ мекунед?

-“Барои ваҳдат ва ягонагии Тоҷикистон” ин шиори ИҶТ буд. Худи ҳамин шиор аз рӯзҳои аввали фаъолияти ин ташкилот, бо дарназардошти мавқеи ҷавонон аз ҷониби фаъолони ИҶТ ба миён омад ва то имрӯз ин шиор арзишу моҳияти худ-ро гум накардааст, балки чун ҳадафи олии ташкилот боқӣ мондааст. Баргузор шудани мулоқотҳои таърихии Сарвари давлат бо ҷавонон дар солҳои 1993, 1994, 1997 ва 1998 аз ҷумлаи иқдомҳои хело муҳими ИҶТ буданд. Ҳамоишу чорабиниҳои муҳиме, ки он солҳо ИҶТ баҳри сарҷамъии ҷавонон доир намуд, бешак дар пойдории сулҳу оромӣ дар кишвар нақши муассир гузоштанд.

Илова ба ин, маҳз бо талошу пешниҳоди ин ташкилоти бонуфуз Ҳукумати кишвар масъа-лаи таъсиси сохтори давлатии кор бо ҷавонон – Кумитаи кор бо ҷавононро соли 1997дастгириву амалӣ намуд.

- Аз таърихи 30-солаи ИҶТ ба мо маълум аст, ки дар интихоботҳои президентӣ ҳамчун як ниҳоди ҷомеаи шаҳрвандӣ фаъолона иштирок мекунад. Аз ҷумла, соле қабл дар интихоботи президентӣ ҷавонони кишвар фаъолона ширкат варзида, номзади худро ба мансаби олии Президенти Ҷумҳурии Тоҷикистон аз ҳамин ташкилот пешбарӣ намуданд. Нақши Иттифоқи ҷавононро дар маъракаҳои муҳими сиёсӣ чӣ гуна арзёбӣ менамоед?

- Давоми 30 соли фаъолияти худ Иттифоқи ҷавонони Тоҷикистон ҳамчун ниҳоди ҷомеаи шаҳрвандӣ дар баробари ҳизбҳои сиёсӣ тавонист, аз ташаббуси пешбарии номзад ба мансаби Президенти Ҷумҳурии Тоҷикистон фаъ-олона ва бо дастгирии аксарияти ҷавонони кишвар истифода бурда, сиёсати пешгирифтаи Пешвои муаззами миллатро мунтазам дастгирӣ карда, аз ташаббусҳои созандаи давлату Ҳукумати кишвар ҳамовозӣ намояд. На танҳо дар интихоботи соли гузаштаи президентӣ, балки дар тамоми интихоботҳои қаблӣ ИҶТ мавқеи пешсафиву дурбинонаи худро бо пуштибонӣ аз мавқеи сиёсии ҷавонони кишвар собит сохтааст. Муҳим он аст, ки ИҶТ ҳамчун қисми ҷудонопазири ҳаракати байналмилалии ҷавонон ҳанӯз хело барвақт эътироф гаштааст ва барномаи фаъолияти он фарогири тамоми ниёзҳои ҷавонони имрӯза буда, ҳадафи асосиаш ба пешрафт ва инкишофи ҷомеаи Тоҷикистон, муттаҳид сохтани ҷавонони дорои тафаккури солим ва созанда, ҳимоя ва пуштибонии ҳуқуқҳои сиёсӣ, иҷтимоӣ ва иқтисодии онҳо нигаронида шудааст. Ҳамин аст, ки аз мавқеъ ва ҳадафҳои иҷтимоии он аксарияти ҷавонони Тоҷикистон ҷонибдорӣ мекунанд.

-Дар охир ба ҳайси раиси ИҶТ ба аъзои Иттифоқ ва умуман ҷавонони кишвар чӣ гуфтанӣ доред?

- Аз натиҷагирии фаъолияти Иттифоқи ҷавонони Тоҷикистон хулоса намудан мумкин аст, ки бо дарназардошти тадбирҳои андешидашуда ва фароҳам овардани шароит баҳри устуворгардонии ин ниҳоди бисёр муҳим, ҳоло ҳам ҷиҳати пурра амалӣ намудани ҳадафу мақсадҳои барномаи Иттифоқ моро мебояд, тибқи талаботи қонунгузорӣ аз роҳу усулҳои нав фаъолиятро дар ин самт боз ҳам ҷоннок намоем. Бо итминон метавон иброз дошт, ки ИҶТ чун ворис ва давомдиҳандаи иқдоми неки наслҳои шарафманди ҷавонони Тоҷикистон дар тарбияи насли наврас, пешрафту тараққиёти сиёсӣ, иқтисодӣ ва иҷтимоии кишвар, баланд бардоштани ҳисси баланди худшиносии миллӣ ва номуси ватандорӣ, таҳкими сулҳу ваҳдати миллӣ, ҳифзи Истиқлолияти Тоҷикистон ва муаррифии он минбаъд низ метавонад саҳми бориз гузорад.

Иттифоқи ҷавонони Тоҷикистон дар давоми фаъолияти худ тарбиятгари ҷавонон буд. Ва ҷавонони кишвар ҳамеша дар атрофи Сарвари кишвар муҳтарам Эмомалӣ Раҳмон муттаҳиданд. Инро метавон 30 соли ҳамбастагии ҷавонон бо Пешвои миллат унвон кард.

Бори дигар ба ҳар яки шумо ҷашни 30-солагии Иттифоқи ҷавонони Тоҷикистонро табрик мегӯям.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

Ноябр 2021 c.