Ману ӯ зиёд дидор доштем: аз суҳбатҳои хоса то маҷлису нишастҳои алоҳида, аз маҳфилҳои фарҳангӣ то давраҳои омӯзишӣ, аз як салом то дуруди фаровон.
Хушчақчақ аст.
Чеҳрааш дорои гармист.
Лабони моил ба табассумаш рӯҳия мебахшад.
Хатти пешонияш як сарнавиштро мемонад.
Хандаҳояш кӯдакиро ба ёд орад.
Ҳарфгӯияш монои як фарди кӯчак аст.
Қалбаш пур аз содагиҳост.
Чеҳраи Дидор Саъдуллоевро дар ҳар дидор бештар кашф месозему шахсияташро саъдахтар дармеёбем.

ДИДОРИ АВВАЛ

- Дуруд бар шумо хубед?

- Дуруд. Раҳмат.

- Дарёфтем, ки аз рӯйи ихтисос физик ҳастед, аммо...

- Аксбардорӣ бароям меросист гӯем ҳам хато намекунем. Падарам ба суратгирӣ саргармӣ доштанд. Аммо он барои бародарам манбаи даромад буд. Замони донишҷӯӣ ҳар гоҳ ба майдони Исмоили Сомонӣ назди бародарам меомадам. Ин пешаро ӯ андак-андак бароям меомӯзонид. Он гоҳ талабот ба аксбардорӣ зиёд буду аккос кам. Ҳамин тавр, пас аз хатми донишгоҳ ва се моҳи фаъолият дар лабораторияи факултети физикаи Донишгоҳи миллии Тоҷикистон тасмим гирифтам, нонамро аз суратгирӣ пайдо намоям.

- Пушаймон нестед, ки самти фаъолиятатонро дигар кардед?

- Аз тасмимам розиям. Агар дар донишгоҳ мемондам, шояд сарнавишти дигаре маро интизор буд. Аммо аксбардорӣ ба ҷаҳони рангине воридам сохт.

- Аз аксбардорӣ хаста намешавед?

- Баръакс. Тасаввур кунед, ки ҳар рӯз рӯҳияи нав, одамони нав, ҷойҳои нав ва дастоварди нав шуморо дунбол мекунад. Ҳар вақте ки ғамгин бошам, даст ба дасти дурбин медиҳаму хушвақт мегардам.

- Аз коргоҳи хусусӣ даст шустану ба Русия рафтан кори оқилона буд?

- Соли 2013 дар шаҳри Душанбе як давраи омӯзишӣ барои аксбардорон баргузор гашт. Дарсгӯянда Шуҳрат Юлдошев, аксбардори номии тоҷики муқими Русия буд. Пас аз ширкат дар ин омӯзиш шабро дар интернет дар ҷустуҷӯи мактаби олии аксбардорӣ дар хориҷи кишвар рӯз кардам. Қарор қабул намудам, ки барои ҳирфаӣ аз худ кардани аксбардорӣ ба Русия биравам. Хонавода низ тасмимамро писандиданд. Дари студияамро бастам ва рафтам пайи донишомӯзӣ. Ин амалро метавон аз худ норизо будан унвон кард.

ДИДОРИ ДУВУМ

- Дар Русия чӣ ҳолу ҳавое доштед?

- Таҳсил мекардаму кор. Дар Донишгоҳи давлатии тарроҳӣ ва фанноварии Маскав мехондаму дар бозор савдо мекардам. Ҳамсабақон баъзан худро канор мегирифтанд. Аз баҳри кори бозор гузаштаму гуфтам танҳо суратгирӣ мекунам. Эълонеро дидаму занг задам. Суроғаи даркориро ёфтам. Як пиразан имтиҳонам карду ба кор гирифт. Баъдан бо нашрияи “Тоҷикони Русия” ҳамкорӣ доштаму дар ҳамоишҳои сафорати Тоҷикистон дар Русия аксбардор будам, ки ин роҳамро боз намуд.

- Боз чӣ хотироти ҷолиберо дар ёд доред?

- Хотироти зиёд дорам. Ҳангоми дар донишгоҳ таҳсил доштан, рӯзе Вяткин ном устод ба дарс даромад. Баробари тоҷик буданамро донистан, аз баҳри дарсгӯӣ ба гурӯҳи мо гузашт. Солҳои ҷанги шаҳрвандӣ як шогирдаш ба Душанбе меояду ҳодисаҳои кишварро барояш бозгӯ мекунад. Ҳарчанд аз он воқеаҳо солҳо сипарӣ шуда бошад ҳам, Тоҷикистон дар тасаввури Вяткин ҳамоно кишвари ҷангзада ва мардумаш дар ҳоли фақру бекасӣ буд. Якравӣ ва талошамро дар иҷрои супоришҳояш, ки на ҳама онҳоро анҷом медоданд, дида, андешааш нисбати тоҷикону Тоҷикистон тағйир ёфт ва маро ба шогирдӣ пазируфт.

- Дар ҳоле ки ба Русия барои омӯзиш рафтед, иштирок дар гирдиҳамоиву эътирозҳои сокинон ва ҳизбҳои сиёсии он кишвар баҳри чӣ буд?

- Ин боз ҳам бармегардад ба супоришҳои устодам Вяткин, ки барои дарс аз ҷараёни раҳпаймоиҳо бояд гузориши аксӣ омода мекардам.

- Бароятон мушкил эҷод намешуд?

- Гоҳ – гоҳ. Боре пулисҳо муҳоҷиронро латукӯб мекарданду ман аз дур аксбардорӣ. Як нафарашон маро дар ҳоли суратгирӣ диду ҳамроҳи онҳо ба милисахона бурд. Дар дохили мошин мерафтем, ки флешкортро иваз кардам. Ба идораи пулис маро ба назди сардор бурда журналист муаррифӣ карданд. Шаҳодатномаи донишҷӯиямро нишон додаму гуфтам аксе нагирифтаам. Дастгоҳро диданд, ки воқеан аксе нест. Маҷбур шуданд, ҷавоб диҳанд.

ДИДОРИ СЕВУМ

- Суратгирии Владимир Путин бароятон чӣ гуна муяссар шуд?

- Соли 2015 бо Шодмон Ибрагимов, сармуҳаррири рӯзномаи ҷамъиятӣ-сиёсии “ВВП-Провинция”-и пойгоҳи иттилоотӣ-таҳлилии “Центральная Азия сегодня”-и шаҳри Нижний Новгород шинос шудам ва чанд муддат бо ӯ ҳамкорӣ доштам. Пас аз гузашти вақт бо мусоидати ӯ ба нишасти хабарии раисҷумҳури Русия роҳ ёфтам ва Вламидир Путинро аккосӣ намудам. Ҳамон сол буд, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дигар раҳбарони кишварҳои ИДМ-ро сурат гирифтам.

- Озмунҳои аккосӣ барои як аксбардор ба ҷуз лавҳаи ифтихорӣ ва пул, боз чӣ медиҳад?
- Обрӯ.

- Ду ҷоизаи байналмилалӣ ва ҷоизаи “50 нафари хушсалиқаи Душанбе” – ТОП-50. Ин ҷо чӣ сиррест?

- Ягон сир нест. Номзадҳо дар озмуни “ТОП-50”-ро сокинони шаҳри Душанбе пешбарӣ мекунанд. Соли 2017 маро ҳам пешниҳод карданд ва ҳайати ҳакамон дар қатори дигарон маро низ ба ин ҷоиза сазовор шуморид.

- Ҷоизаи “Сад акс ва сад аккоси беҳтарин”. Дар Тоҷикистон ин “рекорд”-ро аввалин шуда шумо гузоштед?

- Ростӣ, намедонам. Шояд.

ДИДОРИ ЧАҲОРУМ

- Ҳуқуқшиносӣ, физика, аксбардорӣ. Байни инҳо чӣ алоқамандиест?

- Ишораатонро фаҳмидам. Ҳарчанд ки пас аз хатми мактаби миёна ба факултети ҳуқуқшиносӣ дохил шуда натавонистам ва ҳамчун физик фаъолиятамро идома надодам, фикр мекунам донистани ҳуқуқу қонуни табиат ва хусусиятҳои дастгоҳи аккосӣ аз бартариятҳои аксбардори муосир аст.

- Замоне ки шумо ба аксбардорӣ шурӯъ кардед, талабот ба суратгир зиёд буд. Вазъ ҳоло чӣ гуна аст?

- Айни замон вазъ дигаргуна аст. Ҳама телефони ҳамроҳ дорад. Ниёз ба аксбардор кам аст. Аммо бо ин вуҷуд одамоне пайдо мешаванд, ки дӯстдори касбият ҳастанд.

- Аксбардорони хиёбониро барои худ рақиб мешуморед?

- Не. Онҳо барои ёфтани ризқу рӯзӣ омодаанд бо пули андак сурат бигиранд, аммо суратгири касбӣ соҳиби ҷойгоҳи дигар аст.

ДИДОРИ ПАНҶУМ

- Рақами 100 дар рӯзгори шумо чӣ нақш дорад?

- Ҷоизаи “Сад акс ва сад аккоси беҳтарин” аз 4-умин Ҷашнвораи байналмилалии аксбардорӣ “35 AWANDS”, нархи билети арзонтарини хатсайри Кӯлоб-Маскав замони бори аввал ба Русия рафтан ва садҳои дигар.

- Таваккал бояд кард?

- Ҳатман.

- Ба фикратон, эҷодкор бояд ошиқ бошад?

- Бе ин намешавад.

- Шумо дар суҳбатҳоятон аз сирру асрори кори аксбардорӣ мегӯед. Дар ҳоле ки дигар ҳамтоёнатон онро пӯшида нигоҳ медоранд. Инро содагӣ мешавад гуфт ё чизи дигар?

- Фикр мекунам, содагӣ.

- Аз худ қаноатманд ҳастед?

- Не. Инсон то замоне ки зинда аст, набояд аз худ қонеъ бошад. Қаноатманд ки шуд, аз ташаккул боз хоҳад монд.

- Сипос барои як суҳбати хос.

- Саломат бошед.

ҲОЛНОМА: Дидор Саъдуллоев баҳори соли 1981 ба дунё омадааст. Мактаби миёна ва факултаи физика ва риёзии Донишгоҳи миллии Тоҷикистонро дар шаҳри Душанбе ба поён бурдааст. Солҳои 2014 - 2015 дар факултаи аккосии Донишгоҳи давлатии тарроҳӣ ва фанноварии Маскав таҳсил карда, ихтисоси аккос-хабарнигорро дорад.
Аккоси Агентии миллии иттилооттии “Ховар”, ҳафтаномаи “Тоҷикистон” ва бархе нашрияҳои маҳаллӣ дар Русия будааст. Бо бархе аз созмонҳои байналмилалии муқими Тоҷикистон ба унвони аккос ҳамкорӣ мекунад. Аз соли 2014 то ҳоло дар Бошқирдистон ва шаҳрҳои Маскав, Алмаато ва Душанбе чанд намоиши аксҳояш баргузор шудааст. Ахиран дар Қазоқистон барандаи ҷоизаи озмуни минтақавии Созмони байналмилалии муҳоҷират (IOM) шуд.
Аз 29 декабри соли 2017 узви Иттифоқи журналистони Тоҷикистон мебошад.

Ардашер ПАЙВАНД, “ҶТ”