Азизхон Мавлоназаров, донишҷӯи курси сеюми Донишгоҳи давлатии Волгогради Федератсияи Русия барои фаъолияти хуби волонтёрӣ дар давраи вазнини бемории Соvid-19 аз ҷониби Президенти Федератсияи Русия Владимир Путин бо шаҳодатнома ва медали ифтихорӣ таҳти унвони “Мо якҷоем” сарфароз гардонида шуд.

Гуфта мешавад, ки дар марҳилаи шадиди коронавирус аз ҷониби Агентии Федералии кор бо ҷавонони Русия гурӯҳи волонтёрони ҷавон ташкил шуда, 83 ҳазор волонтёр аз манотиқи Русия барои кӯмак намудан ба шахсони барҷомондаю имконияташон маҳдуд ҷалб гардида буданд. Ба ин гурӯҳ ҳамватани мо, Азизхон Мавлоназаров низ шомил гардида буд.

Азизхони ҷавон ба муракаббии вазъ нигоҳ накарда, барои пиронсолону маъюбон ва шахсони ниёзманде, ки дар давраи вазнини карантинӣ аз хона баромада наметавонистанд, барои расонидани доруворӣ ва маҳсулоти ғизоӣ кӯмак менамуд.

Рӯйхати ҷавононе, ки бо ин мукофот сарфароз шудаанд, аз ҷониби Агентии Федералии кор бо ҷавонони Русия тасдиқ гардидааст ва номи ҷавони тоҷик Азизхон Мавлоназаров низ дар он ҷойгир аст.

Саида НАРЗИЗОДА, “ҶТ”