22 октябр ҷаласаи Ҳайати мушовараи Кумитаи кор бо ҷавонон ва варзиши назди Ҳукумати Ҷумҳурии Тоҷикистон оид ба ҷамъбасти натиҷаҳои рушди соҳаи кор бо ҷавонон ва варзиши Ҷумҳурии Тоҷикистон ва фаъолияти Кумита дар давоми нуҳ моҳаи соли 2024 ва вазифагузориҳо барои се моҳаи чоруми соли 2024 баргузор гардид.

Дар кори ҷаласа Зулфиқор Гулаҳмадзода,раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, муовини якум ва муовинони раис, роҳбарони воҳидҳои сохторӣ, роҳбарони муассисаҳои зертобеъ, роҳбарони сохтор ва зерсохтори Кумита дар вилоят, шаҳру ноҳия ва кормандони дастгоҳи марказӣ иштирок доштанд.

Ҷаласаи Ҳайати мушовара бо суханони ифтитоҳии Раиси Кумита оғоз гардида, вобаста ба ҷамъбасти натиҷаҳои рушди соҳаи кор бо ҷавонон ва варзиши Ҷумҳурии Тоҷикистон ва фаъолияти сохтор ва зерсохторҳои Кумита дар нуҳ моҳаи соли 2024 аз ҷониби муовини якуми раиси Кумита ҳисоботи муфассал ироа гардид.

Ҳамзамон, сардорони раёсатҳои кор бо ҷавонон ва варзиши ВМКБ, вилоятҳои Суғду Хатлон ва шаҳри Душанбе аз натиҷаи фаъолияти соҳа давоми нуҳ моҳи сипаригардида дар ҳудуди минтақаи худ ҳисобот дода, барои ислоҳи мушкилиҳои ҷойдошта аз ҷониби роҳбарият дастуру супоришҳои мушаххас гирифтанд.

Сипас, муовинони соҳавӣ фаъолияти соҳаи кор бо ҷавонон ва варзишро дар тамоми шаҳру ноҳияҳои ҷумҳурӣ мутобиқи ҷадвали махсус мавриди таҳлил қарор дода, натиҷаи таҳлилро тавассути ҳисоботи таҳлилӣ ироа намуданд.

Раиси Кумита ҷиҳати иҷрои пурра ва самараноки дастуру супоришҳое, ки аз ҷониби Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Ҳукумати ҷумҳурӣ ва Дастгоҳи иҷроияи Президенти Ҷумҳурии Тоҷикистон дода мешаванд, дастур дода, талаб кард, ки масъулин вазифаҳои низомномавии Кумитаро ба таври бояд иҷпро намуда, барои бартараф намудани камбудиву норасоиҳо ва бозҳам беҳтар намудани кор дар маҳал тадбирҳо андешанд.

Ҳамзамон аз масъулини сохтор ва зерсохторҳои Кумита талаб карда шуд, ки дар раванди ҳассоси ҷаҳонишавӣ зиракии сиёсиро аз даст надода, ҷиҳати ба ватандӯстӣ ҳидоят намудани ҷавонон ва баланд бардоштани нуфузи варзиши тоҷик аз тамоми фишангҳои солиму созанда истифода намоянд.

Ҳамчунин таъкид гардид, ки дар ҳамкорӣ бо мақомоти дахлдор ва аҳолӣ бояд дар тарбияи насли бофарҳангу босавод ва огоҳу масъулиятшинос, тарғиби тарзи ҳаёти солим байни ҷомеа ва иштироки варзишгарон дар мусобиқаҳои сатҳи ҷаҳонӣ ва иҷроиши нақшаҳои ба тасвибрасида пайваста чораҳо андешида шаванд.

Дар интиҳои ҷаласаи Ҳайати мушовара вобаста ба масъалаҳои баррасишуда қарорҳои дахлдор қабул карда шуд.

“ҶТ”