7 май дар толори Кумитаи миллии олимпии Тоҷикистон курси омӯзишии волонтёрони Кумитаи кор бо ҷавонон ва варзиши назди Ҳукумати Ҷумҳурии Тоҷикистон таҳти унвони “Пайравони Пешвои миллатем” ҷамъбаст гардид. 

Курси омӯзишии “Пайравони Пешвои миллатем” соли дуюм аст, ки дар доираи грантҳои Ҳукумати Ҷумҳурии Тоҷикистон бо мақсади баланд бардоштани ҳуввияти миллии ҷавонон, таҳкими худшиносию худогоҳии миллӣ ва расидан ба арзишҳои бузурги давлатдорӣ, аз ҷумла омӯзиш ва пайравӣ аз сиёсати оқилонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон амалӣ карда шуда, дар он шумораи зиёди ҷавонони фаъоли кишвар иштирок намуданд.

Иштирокчиён ба курс тариқи озмун қабул шуда, муддати се моҳ дарсҳои назариявию амалиро аз ҷониби роҳбарияти вазорату идораҳои кишвар омӯхтанд. Дарсҳои мазкур фарогири мавзӯъҳои таърихию фарҳангӣ ва огоҳ намудани ҷавонон аз таърихи бойи миллатамон буданд.

Дар маросими ҷамъбасти курси мазкур аз ҷониби Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба иштирокчиён шаҳодатномаи хатми курси омӯзишӣ супорида шуд.