Озмуни "Кӣ хубтару кӣ беҳтар" зиёда аз 450 нафар ҷавонону наврасони ноҳияи Дарвозро ба ҳам овард. Он асосан байни ҷавонони ҷамоатҳои Нулванду Вишхарв таҳти сарпарастии мақомоти иҷроияи маҳаллии ҳокимияти давлатӣ ва Бахши кор бо ҷавонон ва варзиши ноҳия роҳандозӣ шуда, аз 10 шарти асосӣ иборат буд.

Ба иттилои Талабшо Аламов, мудири Бахш дар озмун ҳамагӣ 60 нафар ҷавонписарону духтарон ҳунарнамоӣ карда, беҳтарин маҳорату малакаро аз худ нишон доданд.

Ҳамин тавр, аз рӯи натиҷаи ҷамъбастӣ ҷойи аввалро ҷамоати Вишхарв ба даст оварда, ғолибон бо ифтихорномаву тӯҳфаҳои хотиравӣ сарфароз гаштанд.

Бояд зикр намуд, ки озмун ба ифтихори Рӯзи модар гузаронида шуда, дар баробари он аз тарафи аҳли фарҳанги ноҳия беҳтарин барномаи консертӣ пешкаши ҳозирин гардид.