Дар доираи меҳмонии ҷавонони ҷумҳурӣ таҳти унвони "Дӯст ояд, гарм дар оғӯш гир" рӯзи 27 апрел дар қасри фарҳанги ноҳияи Деваштич ҳамоиши ҷавонон таҳти унвони "Ҷавонон - пайравони Пешвои миллат" баргузор гардид.

Дар кори ҳамоиш Сураҷ Чоршанбезода, муовини раиси Кумитаи кор бо ҷавонон ва варзиш, намояндагони мақомоти иҷроияи ҳокимияти давлатии ноҳия, намояндаи Раёсати кор бо ҷавонон ва варзиши вилояти Суғд, ҷавонони фаъоли аз тамоми гӯшаву канори кишвар ҷамъомада, ҳамчунин ҷавонони фаъоли ноҳияи Деваштич иштирок намуданд.

Ҳамоиш бо садо додани Суруди миллӣ оғоз гардид.

Баъдан, Мирзоқосим Каримзода, сардори Раёсати кор бо ҷавонон ва варзиши вилояти Суғд сухан карда, тамоми иштирокчиёни ҳамоишро хайрамақдам намуд.
Ӯ зимни суханронии хеш зикр кард, ки баргузории чунин ҳамоиш заминаи мукаммале барои рушди минбаъдаи ҷавонон дар замони имрӯз аст.

Сипас, Насриддин Комилзода, муовини раиси ноҳияи Деваштич маърӯза карда, аз номи мақомоти иҷроияи ҳокимияти давлатии ноҳия ва мақомоти иҷроияи ҳокимияти давлатии вилояти Суғд меҳмононро хушомадед гуфт.

Муовини раиси ноҳия ташрифи ҷавонони манотиқи гуногуни кишварро ба ноҳияи Деваштич барои сокинон шарафи бузург дониста, бо ифтихор ёдоварӣ кард, ин меҳмониҳо боис мегарданд, ки сокинони ноҳия бо урфу одат ва тарзи зисти сокинони минтақаҳои гуногуни кишвар шинос гарданд.

Баъд аз суханронии Насриддин Комилзода, Сураҷ Чоршанбезода, муовини раиси Кумитаи кор бо ҷавонон ва варзиш маърӯзаи худро ироа кард.

Муовини раиси Кумита зимни суханронӣ гуфт, ки ҷавонон қувваи пешбарандаи ҷомеа буда, маҳз ин қишри ҷомеаро мебояд зиракии сиёсиро аз даст надиҳанд ва барои рушди фардии худу кишвари худ саҳмгузор бошанд.

Ҳамин тариқ, аз ҷониби чанд иштирокчии дигар маърӯзаҳо ироа гардида, ҷавонон барои баргузории чунин ҳамоиш ва меҳмондорӣ изҳори сипос карданд.
Дар охир, ба чанд иштирокчии фаъоли ҳамоиш сипосномаҳо тақдим гардид.