Бо иштироки раиси Вилояти Мухтори Кӯҳистони Бадахшон Ëдгор Файзов ва муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода дар шаҳри Хоруғ Ҳамоиши гирандагони Стипендияи президентӣ зери унвони “Ҷавонон – пайрави Пешвои миллат” баргузор гашт.

Баъди ботантана садо додани Суруди миллии Ҷумҳурии Тоҷикстон Ё. Файзов ва Р. Назарзода суханронӣ намуда, қайд карданд, ки соҳиби стипендияи президентӣ шудан барои ҳар як хонанда ифтихори бузург буда, ин орзуи толибилмон маҳз бо иқдому шарофати Асосгузори сулҳу ваҳдати миллӣ - Пешвои муаззами миллат муҳтарам Эмомалӣ Раҳмон амалӣ шуд ва имрӯз садҳо нафар дар кишвар аз он бархурдоранд.

Зикр гардид, ки ҷавонону наврасонро зарур аст, ки худшиносию худогоҳиро кор фармуда, дар рисолати асосии хеш, яъне гирифтани донишу маърифат, дӯст доштани Ватан – Модар, гиромӣ доштани таъриху фарҳанги миллат ва дастовардҳои Истиклолияту Ваҳдат тамоми талошҳоро ба харҷ диҳанд.

Дар навбати худ толибилмон ва волидони онҳо низ баҳри зоҳир намудани чунин ғамхорӣ ба Пешвои муаззами миллат миннатдории самимӣ баëн намуданд.

Пас аз тақдими стипендия ба хонандагони шаҳру ноҳияҳои вилоят Кишвар Шамирӣ, раиси шаҳри Хоруғ бо гирандагони мулоқот намуда, баҳри интихоби касбу кори шоиста ва дар оянда хизмати софдилона намудан ба халқу Ватан ба онҳо барору комёбиҳо орзу намуд.

Бояд зикр кард, ки муовини якуми раиси Кумитаи кор бо ҷавонон ва варзиши кишвар Р. Назарзода инчунин дар ҷараёни сафарии кории хеш ба ВМКБ бо ҷавонони касбу кори гуногуни ноҳияҳои Дарвозу Ванҷ, Рӯшон ва шаҳри Хоруғ суҳбату вохӯриҳо анҷом дода, бо шароити кору фаъолияти онҳо аз наздик шинос гардид.