Таҳти унвони “Нақши ҷавонон дар 30 соли соҳибистиқлолӣ: Дастовард ва дурнамо” 1-уми июл дар шаҳри Бохтар бо ташаббуси масъулини Сарраёсати молияи вилояти Хатлон дар ҳамкорӣ бо Филиали иттифоқи ҷавонони Тоҷикистон ҳамоиши молиячиёни ҷавони вилояти Хатлон баргузор гардид.                  

Дар оғоз масъулин ва иштирочкиён аз намоиши китобҳои соҳавӣ ва дастовардҳои олимони ҷавони соҳа дидан намуда, оид ба рушд ва таъмини сифатноки самти молиявии сиёсати давлатӣ ва дастгириву омода намудани мутахассисон дар соҳаи молия ва иқтисодиёт бо ҷавонон ҳамсуҳбат гардиданд.
   
Дар кори ҳамоиши сатҳи вилоятӣ, намояндагони Мақомоти иҷроияи ҳокимияти давлатии вилояти Хатлон, Вазорати молия ва олимону мутахассисони ҷавони соҳа баромад намуда, аз дастгириҳои давлатӣ оид ба такмили фаъолияти соҳа ва фароҳам овардани шароитҳои муосир барои кормандон табодули афкор намуданд.                   

Бахтиёр Назарзода, сардори Сарраёсати молияи вилояти Хатлон зимни баромади худ иброз дошт, ки бо мақсади амалӣ намудани сиёсати давлатии ҷавонон, имрӯз дар сохтори мақомоти молияи вилоят аз 367 нафар кормандону хизматчиёни давлатӣ 154 нафарашро ҷавонони то синни 35 – сола ташкил менамояд ва ҷиҳати такмили малакаву қобилияти кордонии онҳо пайваста чунин чорабиниҳои табодуливу омӯзишӣ роҳандозӣ карда мешавад.              

Дар ҷараёни ҳамоиш бо мақсади қадршиносӣ аз нишондиҳандаҳои назарраси кормандони ҷавони соҳа ва рӯҳбаланд сохтани онҳо барои идомаи фаъолияти минбаъда як қатор мутахассисони ҷавони соҳибтаҷриба аз раёсатҳои молияи шаҳру навоҳии вилояти Хатлон бо сипосномаи Сарраёсати молия сарфароз гардонида шуданд.

Ҳамзамон аз ҷониби масъулини Филиали иттифоқи ҷавонони Тоҷикистон дар вилояти Хатлон мутахассисони ҷавоне, ки бо фаъолияти назаррас ва ахлоқу интизоми меҳнатӣ намунаи ибрат мебошанд, бо ифтихорнома қадрдонӣ шуданд.