Субҳи имрӯз, 28 сентябр 150 нафар олимону муҳаққиқони ҷавон аз манотиқи кишвар ба шаҳри Қӯрғонтеппа ташриф оварданд. Меҳмононро дар назди теппаи таърихии шаҳр намояндагони мақомоти иҷроияи маҳаллии ҳокимияти давлатии вилояти Хатлон ва шаҳри Қӯрғонтеппа истиқбол намуданд.

Ҳадаф аз ташрифи онҳо иштирок дар конференсияи ҷумҳуриявии илмию амалӣ ва назариявӣ дар мавзӯи «Пайравӣ аз Пешвои миллат: нақши ҷавонон дар рушди ҷанбаҳои гуногуни сиёсӣ, иқтисодӣ, иҷтимоӣ ва фарҳангии кишвар» мебошад.

Тибқи барномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон рӯзҳои 28-29 сентябри соли равон дар маркази вилояти Хатлон – шаҳри Қӯрғонтеппа форуми ҷумҳуриявии ҷавонони кишвар доир мегардад. Дар он ҷоизадорони Исмоили Сомонӣ, олимону муҳаққиқони ҷавон иштирок меварзанд.

Дар назар аст, ки дар рӯзи аввали чорабинӣ меҳмонон аз осорхонаҳои шаҳрию вилоятӣ дидан намуда, дар китобхонаи вилоятии ба номи Шамсиддин Шоҳин маҳфили «Шоҳномахонӣ» доир намоянд.