Таҳти ҳамин унвон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон 27 декабр дар саҳни муассисаи таҳсилоти миёнаи умумии №55-и ноҳияи Шоҳмансури шаҳри Душанбе ҳамоиши ҷавонони мамлакат баргузор гардид.

Дар ҳамоиш роҳбарияти Кумитаи кор бо ҷавонон ва варзиш, сохторҳои маҳаллии он дар ВМКБ, вилоятҳои Хатлону Суғд, шаҳри Душанбе, шаҳру ноҳияҳои тобеи марказ ва ҷавонони фаъол аз тамоми манотиқи ҷумҳурӣ иштирок намуданд.

Баъди садо додани сурудҳои ватандӯстона раиси Кумитаи кор бо ҷавонон ва варзиш Аҳтам Абдуллозода Паёми навбатии Асосгузори сулҳу ваҳдати миллӣ – Пешвои миллат, Президенти ҷумҳурӣ муҳтарам Эмомалӣ Раҳмонро ба тамоми ҷавонон табрик намуд:

- Дирӯз ҳар яки мо бо Паёми пурмуҳтавои Асосгузори сулҳу ваҳдати миллӣ – Пешвои муаззами миллат, Ҷаноби Олӣ муҳтарам Эмомалӣ Раҳмон ба Маҷлиси Олӣ ошно гардидем. Дар Паёми мазкур нуктаҳои асосии сиёсати дохилию хориҷии мамлакат байён шуданд ва нақшаҳои мо барои як соли оянда ба таври мушаххас муйян карда шуд. Пешвои муззами миллат бо камоли эҳтиром миннатдориашонро ба кулли ҷавонони мамлакат барои дастгирии ҳамешагӣ аз сиёсати давлату ҳукумат баён карданд, ки ин муваффақияти бузурги ҷавононро ба ҳар яки шумо муборакбод мегӯям. Мо дар ин ҳамоиш баҳри он ҷамъ омадаем, ки меҳру муҳаббати худамонро ба Пешвои муаззами миллат иброз намоем,- изҳор дошт зимни суханронии худ раиси кумита.

Сипас, бо намояндагӣ аз ҷавонони минтақаҳо, Сураҷ Чоршанбиев, сардори Раёсати кор бо ҷавонон ва варзиши ВМКБ, Суҳроб Тоирзода, намоянда аз вилояти Хатлон, Муҳиба Ҷабборова, намоянда аз вилояти Суғд, Ҳофиз Сангаков, намоянда аз шаҳри Душанбе ва Руҳангез Пирмаҳмадова, намоянда аз ШНТМ доир ба муҳтавои Паёми Пешвои миллат баромад намуданд.

Дар фарҷоми ҳамоиш Динора Ҷабборова Муроҷиатномаи ҷавонону варзишгарони Тоҷикистон ба Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмонро ба самъи иштирокчиён расонид.