4-уми март бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар тарабхонаи “Яккасарой”-и пойтахт бахшида ба Рӯзи модар таҳти унвони “Ҷамолу зиннати дунёӣ, эй зан” чорабинии идонаи фароғатӣ доир карда шуд.

Дар чорабинии мазкур Раҳмонзода Абдулло, раиси Кумитаи кор бо ҷавонон ва варзиш, Абдулфаттоҳзода Гулҷаҳон, сардори Раёсати рушди иҷтимоии Дастгоҳи иҷроияи Президенти Ҷумҳурии Тоҷикистон занону бонувони баруманди кишвар, адибон, варзишгарон, рӯзноманигорон ва кормандони бахшҳои ҷавонони вазорату идораҳо иштирок намуданд.

Раҳмонзода Абдулло бонувонро бо фарорасии фасли зебои сол – баҳори нозанин ва ҷашни барои ҳар яки мо азизу муқаддас - Рӯзи модар шодбош гуфта, иброз дошт, ки воқеан, модар азизтарин мавҷуди рӯи замин мебошад, зеро зиндагӣ аз нафаси гарму дилнавози ӯ оғоз мегардад. “Мо вуҷуди муқаддаси модарро аз аввалин лаҳзаҳои ҳаёт то дами вопасини умрамон фаромӯш намекунем, чунки ӯ дар рӯзҳои шодию нишот ва ғаму андуҳ ҳамеша ҳамроҳи мост. Ба эътирофи на фақат бузургону мутафаккирони олам, балки тамоми инсоният Зан-Модар аз ҷумлаи олитарин неъматҳои башарӣ ва идомадиҳандаи ҳаёт дар рӯи замин ба шумор меравад. Модар ягона мавҷудест, ки дар рӯи замин инсон меофарад. Ба қавли бузургон модар бо як даст гаҳвора ва бо дасти дигар дунёро такон медиҳад. Бори дигар дар ин айёми фархундаи арӯси сол, ки тавъам бо иди модарон аст, ба ҳар яки шумо ва дар симои шумо тамоми занону бонувони азизи кишвари азизамонро самимона муборакбод гуфта, пеш аз ҳама бароятон тани сиҳату хотири ҷамъ, рӯзгори орому осоишта ва пурфайзро таманно менамоям,”- гуфт, А. Раҳмонзода.

Гулҷаҳон Абдулфаттоҳзода зимни табрикоти хеш таъкид дошт, ки занону модарон оинаи беғубор буда, инъикоси симои ботинию зоҳирии ҳар як давлату миллат ба ҳисоб меравад. “Бояд гуфт, ки баъди соҳибистиқлол гардидани Тоҷикистон бо талошҳои пайгиронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нақши занону бонувон дар ҷомеа баланд шуд. Зан- Модар тарбиятгари насли дирӯзу имрӯзу фардои миллат буда, маҳз бо ҷасорат, шуҷоату шафқати модарони тоҷик тӯли ҳазорсолаҳои таърихи миллати тоҷик фарзандони бонангу ори миллатро тарбия намудааст, ки онҳо тавонистанд баҳри ҳимояи манфиатҳои миллию давлатӣ талош намоянд. Ҳамин бузургию шаҳомат, нафосату шарофат, мақому манзалат ва меҳрубонию самимияти модар аст, ки имрӯз моро ба ҳам овардаасту дар як фазои осоишта ба сар мебарем”, - изҳор дошт, Г. Абдулфаттоҳзода.

Ҳамчунин зикр гардид, ки имрӯз занони тоҷик дар самтҳои мухталифи кишвар фаъолият намуда, дастовардҳои эшон дар сатҳи минтақа ва ҷаҳон назаррас арзёбӣ мешаванд. Фаъолияти занону бонувони мамлакат дар сохторҳову идораҳои давлатӣ, фаъолияти соҳибкорӣ ва ҳаёти сиёсиву иҷтимоӣ гувоҳ аз он аст, ки роҳбарияти Ҳукумати Тоҷикистон ҷиҳати баланд бардоштани мақоми зан дар ҷомеа таваҷҷуҳи махсус зоҳир менамоянд.

Баъди баромаду суханронӣ, сарояндагони шинохтаи кишвар барои болидаруҳии занону бонувон суруду таронаҳо дар васфи модар сароиданд. Ҳамчунин, гурӯҳи ҳаҷвии “Лабханди ҷавонӣ”- и назди Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо саҳнаҳои омоданамудаи хеш таъби бонувонро боз ҳам болида гардонид.

Дар охири чорабинӣ дар симои ҳар як зан шодию сурури беандоза нақш гузошта буду ҳамагӣ аз дастгириҳои давлату Ҳукумати кишвар нисбати занону модарон изҳори сипосу миннатдорӣ менамуданд. Ҳамчунин дар фарҷоми чорабинӣ аз ҷониби ташкилкунандагони чорабинӣ ба ҳама занону бонувон туҳфаҳои идона тақдим гардид.