Ҳанӯз соли 2004 духтараки покистонӣ бо номи Арфа Карим, ки ҳамагӣ 9 сол дошт, яке аз ҷавонтарин мутахассисони Microsoft дар ҷаҳон эътироф гардид, ки дорои сертификат буд. Ӯ ин унвонро то соли 2008 нигоҳ дошт. Таҳияи барномаҳо барои ин ширкат ба ин духтарак имкон фароҳам овард, то нахустин миллиони худро ба даст биёрад.

Малакаи фавқуттабиӣ

Арфа соли 1995 дар музофоти Фейсалободи Покистон ба дунё омадааст. Вақте падараш барояш компютер харид, он нахуст барои мукотибот (тавассути е-мейл) пешбинӣ шуда буд. Аммо духтарак аз худ маҳорату малакае зоҳир намуд, ки хоси синну солаш набуд. Падар инро дарк намуда, барои такмили малакааш ӯро ба донишкадаи технологияҳои амалии APTECH супорид.

Навраси кунҷков

“Шашсола будам, ки падарам бароям компютер харид, - мегӯяд Арфа Карим. – Вақте кас чизи навро мебинад, донистан мехоҳад, ки он аз чиҳо таркиб ёфтааст, чӣ гуна кор мекунад. Ман рӯзи дароз машғули кор бо компютери худ будам ва баъди ду сол аллакай дар бораи ҳама ҷузъиёти он маълумоти комиле ҳосил намудам. Ман аллакай бо барномаҳои гуногун кор карда метавонистам. Ғайр аз ин, ман барои падару модарам презентатсияҳо месохтам. Волидонам бо шавқ ба кори ман менигаристанду мегуфтанд: “Ӯ қобилияти хосса дорад”. Сипас онҳо маро ба донишкада супориданд, ки онҷо C#-ро омӯхтам ва баъдан барои мутахассиси Microsoft шудан ҳуҷҷат супоридам”. Гарчанде барои омӯзиш 3 сол пешбинӣ шуда буд, аммо Арфа баъди 4 моҳ аз санҷиши тахассусии Microsoft Certified Application Developer, сипас аз санҷиши иловагии корманди Microsoft дар Покистон бо муваффақият гузашт.

Вохӯрӣ бо Билл Гейтс

Билл Гейтс ӯро ба Redmont (штаб-квартираи ғайрирасмии Microsoft) барои вохӯрӣ ва шиносоӣ бо ширкат даъват намуд. Маҳорату малака ва завқи баланду қобилияти фавқулодаи Арфа Карим ба Билл Гейтс таассуроти ғайриодӣ бахшид. Маҳз суоли Арфа дар хусуси он ки чаро дар ширкати Microsoft занҳо хеле кам фаъолият мекунанд ва чаро онҳо кӯдакону наврасонро ба кор қабул намекунад, таваҷҷуҳи ӯро ҷалб намуд. “Ин ҷо бояд шумораи занҳо баробари мардҳо бошад” – гуфта буд Арфа.

Парвози шуҳрат

Баъди бозгашт ба Покистон тавассути воситаҳои ахбори омма ҳамарӯза бо Арфа суҳбату гузоришҳо анҷом дода шуда, пешкаши омма мегардид. Арфа бо медали тиллои Фотима Ҷинни дар соҳаи илм ва техника мукофотонида шуд. Ин ҷоиза ба нафароне лоиқ дониста мешуд, ки дар соҳаи фаъолияти худ дастовардҳои назаррас дошта, муддати тӯлонӣ афзалиятнокӣ зоҳир намудаанд. Арфа ҷавонтарин шахсе буд, ки ба чунин мукофот сазовор дониста шуд. Соли 2010 Арфа аз шахсиятҳои барҷастаи ширкатҳои телекоммуникатсионӣ эътироф гардид. Ӯ дар форумҳои мухталифи байналмилалӣ Покистонро намояндагӣ мекард, ки аз онҳо туҳфаҳои хотиравии зиёде дорад. Соли 2006 бо даъвати Microsoft дар Tech-Ed Developers Conference, ки дар Барселона доир гардид, ширкат намуд. Ӯ ягона шаҳрванди Покистон дар миёни 5 000 нафар таҳиягарон аз тамоми дунё буд. Ӯ бо вуҷуди хеле ҷавон будан бо ҷаззобият, ҷасорату ҷиддияти беназири худ дар қалби иштирокдорон таассуроти неке боқӣ гузошт.

Беморӣ

Соли 2011 Арфаи 16-сола дар мактаби хату саводи шаҳри Лоҳур таҳсил мекард. Баъди хуруҷи бемории саръ ногаҳон дилаш аз задан бозмонд, ки дар натиҷа майнаи сараш сахт осеб бардошт. 22 декабри соли 2011 Арфаро дар ҳолати вазнин дар Шифохонаи Лоҳур бистарӣ намуданд. 9 январи соли 2012 Билл Гейтс бо волидони Арфа суҳбат намуда, ба табибони покистонӣ гуфт, ки омода аст барои табобати Арфа ҳама гуна кӯмакро расонад. Гейтс тамоми хароҷоти табобатро ба зима гирифт. Ӯ гурӯҳи табибони байналмилалиро киро кард, то дар якҷоягӣ бо табибони покистонӣ барои табобати Арфа мусоидат намуда, ҳамарӯза ӯро аз ҳолати духтар огоҳ созанд. Табибони маҳаллӣ, аз сабаби он ки ба Арфа тавассути дастгоҳи махсус нафаси сунъӣ медоданд, имкони ба беморхонаи дигар интиқол додани ӯро надоштанд. 13 январи соли 2012 саломатии Арфа беҳтар шуд. Падари ӯ аз ширкати Microsoft хоҳиш намуд, то ӯро барои табобат ба ИМА баранд. Аммо 14 январи соли 2012 Арфа ногаҳон вафот кард ва 15 январи соли 2012 дар зодгоҳи худ шаҳри Фейсалобод дафн карда шуд.

Ном чу ҷовид шуд...

Ин духтарак бо қалби бедор ва малакаи фавқуттабиӣ ва тимсоли нерӯву матонати бемисл дар миёни ҷавонон, барои ҳамеша дар хотири садҳо ҳазор нафар сокинони олам, хосса муштариёни ширкати бонуфузи ҷаҳонӣ абадӣ ҷо гирифтааст. Саргузашти шӯрангез ва оқибат фоҷеабори ин ҷавондухтари бебоку ноком бори дигар собит месозад, ки марг фанои умр бошад ҳам, он фанои истеъдод, қобилият ва шуҳрату номи нек буда наметавонад. Ба қавли шоир: “Ном чу ҷовид шуд, мурданаш осон куҷо...”

Шаҳло ЭШОНОВА, “ҶТ”