Пешвои миллат, муҳтарам Эмомалӣ Раҳмон аз ҷумлаи роҳбаронест, ки тавонистанд дар тӯли 26 соли соҳибистиқлолӣ Тоҷикистонро дар арсаи ҷаҳонӣ ҳамчун як кишвари рӯ ба инкишоф муаррифӣ кунанд, ки ташаббусҳои эшон далели ин гуфтаҳост. Ҳарчанд Тоҷикистон пас аз ба даст овардани Истиқлолияти давлатӣ соли 1991 ба ҷанги дохилӣ рӯ ба рӯ гашт, вале бо талошу кӯшишҳои Раиси тозаинтихоби Шӯрои Олӣ, муҳтарам Эмомалӣ Раҳмон мардуми Тоҷикистон ба барқарор кардани сулҳу субот ва оромӣ муваффақ шуданд.

Расидан ба сулҳ кори басо мушкил ва ниҳоят мураккабу пурихтилоф буд. Баъд аз анҷоми Иҷлосияи таърихии XVI-уми Шӯрои Олӣ Раиси тозаинтихоб тамоми кӯшишу ирода ва имконияти хешро барои таъмини сулҳ, баргардондани гурезагон ба Ватан ва шурӯи музокирот бо мухолифин равона намуда буданд. Ин иқдом аз ҷиҳати методологӣ дорои аҳамияти ниҳоят бузург буд, зеро миллатро ба ғолибу мағлуб ҷудо накарданд ва савганд хӯрданд, ки охирин шаҳрванди гурезаи Тоҷикистонро ба Ватан баргардонанд, миллатро сарҷамъ намуда, ҳама дар якҷоягӣ дар заминаи Ваҳдати миллӣ Тоҷикистони тозаистиқлолро созанд. Дар ин роҳи басо душвор шуҷоату ҷасорати нотакрор, фаросати азими мардумпарварона, ватанпарастӣ ва эҳсоси баланди миллиашон маҷбур сохт, ки ҷони хешро ба гарав монда, барои таъмини ваҳдат ва барқарории сулҳ дар Тоҷикистон ба Афғонистони ҷангзада сафарҳои пурхатар анҷом дода, сулҳу ваҳдатро дар кишвар барқарор намоянд.

Бо дарки амиқи нақш ва мавқеи ҷавонон дар ҳифзи Истиқлолияти давлатӣ ва бунёди давлати миллиамон, таваҷҷуҳи Роҳбари тозаинтихоби кишвар ба ҷавонон аз солҳои нахустини Истиқлолияти давлатӣ сар шуда буд. Нахустин мулоқоти Сарвари давлат бо ҷавонони кишвар моҳи феврали соли 1993 баргузор шуда буд. Муҳимтарин масъалаҳое, ки дар суханрониҳои Пешвои миллат зикр меёфтанд ва имрӯз ҳам таъкид мешаванд, ин дарки моҳияти Истиқлолияти давлатӣ, гиромидошт ва эҳтироми арзишҳои миллӣ, аз қабили арзишҳои давлатӣ, забони модарӣ, ҳимояи марзу буми кишвар ва огоҳ будани ҷавонон аз таъриху фарҳанги миллат, доимо ҳушёрию зиракии сиёсиро ҳифз намудан ва дар хеҷ сурат ба амалҳои ифротгароию террористӣ даст назадани ҷавонон мебошад. Ҷавонони кишвар аз ҳар вохӯриву мулоқот бо Сарвари давлат сабақи судманд гирифта, дар роҳи ба ҳаёт татбиқ намудани он ҳамеша садоқату фидокорӣ зоҳир мекарданд.

Ҳамчун ояндасозони давлату миллат, қувваи пешбаранда ва нерӯи ҳаракатдиҳандаи ҷомеа эътироф шудани ҷавонон аз ҷониби Пешвои миллат беҳуда нест. Роҳбари давлат амиқан дарк кардаанд, ки ҷавонон воқеан давомдиҳандагони ҳадафҳои олии кишвар ҳастанд ва ояндаи дурахшони Ватану миллат бе иштироки ин қишри фаъоли ҷомеа тасаввурнопазир аст. Аз ҷумла, “Соли ҷавонон” эълон шудани соли 2017 бесабаб нест ва мо – ҷавононро водор менамояд, ки неруву тавоноӣ, имконияту зарфиятҳо ва, муҳимтар аз ҳама, масъулияту вазифа ва қарзи фарзандиву инсонии худро дар назди миллату Ватан бояд шиносем ва саривақт татбиқ кардани онро фаромӯш накунем.

Т.С. АЗИМЗОДА, корманди Маркази тадқиқоти стратегии назди Президенти ҶТ