Бо ташаббуси Раёсати кор бо ҷавонон ва варзиши вилояти Суғд семинар - машварат ҷиҳати пешгирии ҷавонон аз омилҳои номатлуб таҳти унвони “Ҷавонон - ифротгариро маҳкум месозанд" дар толори Мақомоти иҷроияи ҳокимияти давлатии ноҳияи Ашт бо ҷалби беш аз 250 нафар наврасону ҷавонони касбу кори гуногун доир гардид.

Мақсад аз баргузории чорабинӣ баланд бардоштани сатҳи дониши наврасону ҷавонон, баланд бардоштани ҳисси ватандӯстии наврасону ҷавонон, даст кашидан аз амалҳои номатлуб, ҳамроҳ нашудан ба ҳар гуна ҳизбу ҳаракатҳои террористиву экстремистӣ ва тарбияи онҳо дар рӯҳияи ватандӯстӣ мебошад.

Зикр гардид, ки терроризм ва ифротгароӣ тамоми ҷомеаи ҷаҳониро фаро гирифта, бо истифода аз роҳҳои мухталиф кӯшиш бар он доранд, ки таъсир ва нуфузи худро боло баранд ва бо ин роҳ мақсадҳои манфури хешро амалӣ созанд. Нерӯҳои созандаи аҳли башар дар шароити кунунӣ бар он мекӯшад, ки таъсир ва нуфузи созмону гурӯҳҳои террористӣ ва ифротгароиро ба мардум ва ҷомеаҳо кам намоянд ва ба нестӣ расонида бошанд.