Дар Ҷумҳурии Тоҷикистон имрӯз бисёр ҷавононро вохӯрдан мумкин аст, ки бо ҷаҳду талошҳои зиёд мехоҳанд, мавқеи худро дар ҷомеа пайдо намоянд ва ба муваффақиятҳо ноил гарданд.

Рустам Алиеви 26 - сола аз зумраи он ҷавононест, ки тавонистааст, аз соли 2011 то соли 2016 шаш маротиба пайи ҳам ғолиби озмуни ҷумҳуриявии ихтироъкорон ва навоварони ҷавон бо номи “Бозёфт” – и ТВ “Баҳористон” гардад. Ғайр аз ин, ӯ соҳиби як қатор дастовардҳои дохилию байналмилалӣ аст. Бо ӯ оид ба фаъолият ва ихтирооти намудааш суҳбате доштем, ки фишурдааш пешкаш мегардад.

- Чӣ гуна меҳри ихтирооту навоварӣ дар дилатон ҷой гирифт ва аввалин ихтирои худро дар чандсолагӣ анҷом дода будед?

- Аз сабаби оне, ки падарам корманди колхоз (механизатор) буданд ва ҳамеша бо техника кор мекарданд, аз ҳамон ҷост, ки меҳри ихтироъкорию навоварӣ дар дилам ҷой гирифт. Чун падарро машғули коре медидам, маро низ шавқам меомаду аз симу картон ва дигар ашёҳо ҳар гуна бозичаҳои техникӣ месохтам ва маҳз ҳамин шӯру шавқам маро водор сохт, ки навоварӣ ва эҷодкориро пеша кунам. Аавалин маротиба соли 2009 буд, ки аз тарафи шуъбаи маорифи ноҳияи Рӯдакӣ озмуни “Техникони ҷавон” эълон гардид, ки ман он вақт 14 сол доштам. Ҳамин тавр, ман аз тарафи МТМУ №63 бо неругоҳи хурди барқии обӣ бо тавлиди 9 Волт дар ҷӯйбор, иштирок намудам ва мақоми ифтихориро соҳиб гаштам.

- Дар ин ҷода киро устоди худ мешуморед?

- Аз даврони мактабӣ то хатми литсею коллеҷу донишгоҳ устодони зиёд буданд, ки ба ман нозукиҳои фанни физикаро омӯзониданд ва маро дар ин ҷода раҳнамоӣ карданд. Аз ҷумла, устодони аввалинам Хоҷаев А. ва Раҳимов Ҳ. мебошанд, ки самтҳои қонунҳои физикаро аз онҳо хуб омӯхтам ва ин нозукиҳо тавонистанд, барои навовариҳои ман нақши калоне дошта бошанд.

- То ба имрӯз чӣ қадар навоварӣ кардед ва онҳо чиҳо буданд?

- Мақсади ихтироъкор ва навовар мушкили одамонро осон кардан аст. Ман то имрӯз зиёда аз 33 дастгоҳу таҷҳизоти гуногунро дар соҳаи кишоварзӣ, экология, қисми ҳарбӣ, коммуналӣ ва сохтмон навгонӣ намудаам. Аз ҷумла, дастгоҳи назоратӣ барои сарҳадбонон, дастгоҳи безараргардонии дастон, таҷҳизоти безараркунии ҳавои утоқҳои беморхонаҳо, дастгоҳ барои безараргардонии пойафзол дар даромадгоҳҳои биноҳо, дастгоҳи огоҳкунанда аз минтақаҳои хатарнок, дастгоҳи худкори “Барфрез”, таҷҳизоти бо об таъминкунии боғҳои мевадиҳанда, дастгоҳи механикии заряддиҳанда, дастгоҳи хурди огоҳкунанда, дастгоҳ барои ҳифзи донагиҳои киштзор аз паррандагон ва ғайраҳо.

- Аз ҳама дастгоҳи бузурге, ки ихтироъ кардаед, кадом буд ва оё дар ҷое мавриди истифода қарор гирифтааст?

- То ба имрӯз навовариҳои зиёде кардам. Яке аз навовариҳои бузурге, ки дар соҳаи тиб анҷом додам, ин дастгоҳи безараргардонии дастон мебошад, ки онро дар замони хурӯҷи бемории COVID-19 сохта будам. Ин дастгоҳ барои коркард аллакай расман имзо шудааст ва бояд ба истифода дода шавад. Вале феълан мо ба сарпараст ниёз дорем, то онро истеҳсол ва ба истифода диҳем.

- Ҳоло ки мо дар арафаи ҷашни 30-солагии Истиқлоли давлатӣ қарор дорем, шумо чӣ ихтирооти тозаеро пешкаши мардум мекунед?

- Мехоҳам дар ин ҷашни бузург ду дастгоҳе, ки барои боз ҳам зебо гардидани боғҳои истироҳатии шаҳрамон мусоидат мекунад, пешкаш намоям. Дастгоҳи якум “Инфо-эффект” ном дорад, ки муҳити боғро аз паррандаҳои саҳроӣ ҳифз мекунад. Дастгоҳи дигар бошад, бо таври худкор аз дарахтон барфҳоро тоза нигоҳ медорад.

- Ҳамчун як ҷавони муваффақ ба ҷавонони кишвар чӣ гуфтанӣ ҳастед?

- Ҳамчун як ҷавони навовар ва эҷодкор, ки имрӯз каме ҳам бошад, муваффақияте ба даст овардаам, гуфтаниам имрӯзҳо ҳамаи шароит барои илм омӯхтани мо муҳайёст ва барои илмомӯзӣ чизе садди роҳи мо шуда наметавонад. Бинобар ин, мо бояд шукргузор бошем ва ба қадри ин ҳама ғамхорию дастгирии Пешвои миллат муҳтарам Эмомалӣ Раҳмон бирасем. Ва касбу ҳунар аз бар карда, дар пешрафти меҳан саҳм гузорем.

- Дар оянда чӣ нақшаҳо доред?

- Дар оянда мехоҳам дониши худро боз ҳам сайқал диҳам ва сарпарасте пайдо намуда, ҳамаи навовариҳоямро дар амал татбиқ намоям. Инчунин техникаю техналогияҳоеро навоварӣ кардан мехоҳам, ки дар ободиву пешрафти ватани азизамон хизмат намоянд.

Суҳбати Иброҳим ҶАББОРЗОДА,
таҷрибаомӯзи “ҶТ”