Маҳмадсиддиқ Мирзоев аз зумраи нафаронест, ки дар айни ҷавонӣ пайроҳаи илму донишро ихти­ёр намуда, бо қадамҳои устувор пеш меравад. Бисёр ҳамсолонаш дар ин синну сол аз паи ҳавою ҳавас ва пулёбӣ шуда, дигар таҳсилро идома надоданд. Аммо ӯро қарораш қатъӣ буд.

Ӯ дар оилае таваллуд ёфта ба воя расидааст, ки волидо­наш заҳматпешаю аз паи нони ҳалоланд. Ӯ медид, ки падараш барои хӯронидану пӯшонидани ӯ ва хоҳару бародаронаш чӣ гуна шабу рӯз заҳмат мекашад ва мекӯшад, ки фарзандонаш ҳатман хонанд, соҳиби тахассус шаванд. Заҳматҳои падараш барояш бе­тафовут намонда, пайваста паи донишандӯзӣ буд.

Маҳмадсиддиқ пас аз хатми мактаби миёнаи умумии №82- и ноҳияи Рӯдакӣ соли 2001 ҳуҷҷатҳояшро ба факултети меха­ника ва математикаи Донишгоҳи миллии Тоҷикистон супорида донишҷӯ гардид. Мактаби олиро соли 2006 бо ихтисоси муҳандис-барномасоз хатм карда, ду сол ба ҳайси ассистенти кафедраи технологияи иттилоотӣ ва иртиботии Донишгоҳ фаъолият намуд. Солҳои 2004 – 2008 дар мактабҳои таҳсилоти миёнаи умумии рақамҳои 2 ва 23-и шаҳри Душанбе ба ҳайси омӯзгори фан­ни технологияи иттилоотӣ кор карда, аз соли 2009 то имрӯз омӯзгори фанни технологияи иттилоотӣ дар мактаби таҳсилоти миёнаи умумии №48-и шаҳраки Ганҷободи ноҳияи Рӯдакӣ мебошад.

Омӯзгори ҷавонро бо шарофати пухтакорию навҷӯӣ ва масъулият­шиносиаш на танҳо дар ин таълимгоҳ, балки дигар мактабҳои ноҳия низ хуб мешиносанд. Шогирдонаш борҳо дар олимпиадаю озмунҳои ноҳиявӣ дастболо шудаанд. Аз ҷумла солҳои таҳсили 2013-2014, 2015-2016 ва 2016-2017 барои ширкати фаъоли хонандагони мактаб дар олимпиадаҳои фаннӣ Маҳмадсиддиқ Мирзоев бо ифтихорномаи шуъбаи маориф қадрдонӣ шуд. Ӯ инчунин соли 2014 дар озмуни “Му­аллими сол” сазовори ҷои дуюм гардидааст.

- Комёбиҳои хешро пеш аз ҳама аз дуои неки падару модарам медонам, - мегӯяд Маҳмадсиддиқ Мирзоев. – Хушбахтам, ки мо – ҷавонони кишвар, дар мамлакати тинҷу соҳибистиқлол зиндагӣ меку­нем ва чун муҳтарам Эмомалӣ Раҳмон Сарвари ғамхору шӯҳратманд дорем. Аз ҷониби Пешвои муаззами миллат эълон кардани соли 2017 ҳамчун “Соли ҷавонон” гувоҳи ин гуфтаҳост. Сарвари давлат ва тамо­ми ҷомеа ба мо – ҷавонон умеди калон доранд. Бинобар ин мо бояд бо ғайрати дучанд ҷавобан ба ғамхориҳои рӯзафзун донишу қобилияти худро сайқал дода, корҳои созандагию ободкориро идома диҳем”.

Ин ҷавони масъулиятшинос ботамкину илмҷӯ ва меҳнатқарин аст. Ӯро чун омӯзгори ҷавони фаъол ва донишманд ба бисёр чорабиниҳо ҷалб менамоянд. Аз ҷумла моҳи январи соли 2014 бо пешниҳоди шуъ­баи маорифи ноҳия тибқи барномаи таълимӣ роҳбари курси 12-рӯзаи омӯзиши компютерӣ барои директорони муассисаҳои таҳсилоти уму­мии ҷамоати Гулистони ноҳия, аз 2 март то 15 апрели соли 2015 бо­шад, тибқи фармоиши директори Маркази миллии тестии назди Прези­денти Ҷумҳурии Тоҷикистон ҳамчун корманди муваққатӣ дар вазифаи бақайдгиранда дар нуқтаи 01/08-и ноҳияи Рӯдакӣ фаъолият намуда, соли 2016 низ дар мавсими навбатӣ роҳбари нуқтаи бақайдгириии зик­ргардида таъин шуд.

Ӯ доим дар корҳои ҷамъиятӣ фаъол буда, мунтазам дар чорабиниҳои соҳаи маориф ҷалб мегардад. Бо компютер ва бисёр барномаҳои соҳавӣ хуб кор карда, истеъдодашро ҳамеша сайқал медиҳад. Дар фаъолияти минбаъдаи омӯзгори ҷавон барору комёбӣ хоҳонем.

Б. КАРИМЗОДА, рӯзноманигор