Тоҷикистон дорои ҷавонони фаъ-олу соховатманд буда, натанҳо дар дохили кишвар, балки берун аз он низ бо ҷавонмардии худ бегонагонро моту мабҳут мекунанд. Намунаи беҳтарини ин зумра ҷавонмардон Фирдавс Наимов аст.

Фирдавс Наимов соҳибкори тоҷики муқими шаҳри Москваи кишвари Русия аст, ки соли гузашта аз ҷониби “Тонг жаҳонӣ” - созмони ҳимоятгари ҳуқуқи муҳоҷирони Русия “Беҳтарин хайрхоҳи муҳоҷирон” эътироф гардид.

Ҷоизаи “Беҳтарин хайрхоҳи муҳоҷирон” дар Русия ҳамасола аз ҷониби дастандаркорон баргузор мегардад ва онро ба нафаре тақдим мекунанд, ки пайваста ба муҳоҷирон кумак менамояд.

Қаҳрамони мо дар шаҳри Москва муассис ва мудири кулли ширкати нақлиётии “Русмостранс” мебошад. Ин ширкат дар худ мошинҳои зиёди боркаш дошта, ба кашонидани бор дар қаламрави Русия ва берун аз он, аз ҷумла ба Тоҷикистон машғул аст.

Тӯли се сол аст, ки Фирдавс ин ширкатро роҳбарӣ мекунад ва софдилона ба мардум хизмат мерасонад. Аз Фирдавс Наимов ҳамчун як соҳибкори хайрхоҳ тавсиф мекунанд, ки ҳамеша дасташ ба кумаки муҳоҷирони тоҷик ва ҳамватанони ниёзманд мерасад. Ҳомиёни ҳуқуқи муҳоҷирон низ мегӯянд, Фирдавс байни мардуми ниёзманд фарқ намегузорад ва нафақат ба ҳамватанони худ, балки ба ҳар нафаре, ки бо умеди дастгирӣ дарашро мекӯбад, кумаки худро дареғ намедорад.
Дар соли 2021 ӯ ба мардум хеле кумак кард, онҳоро бо ҷойи кор, ҷойи зист таъмин намуд. Ҳатто ба чанд беморе, барои ҷарроҳии қалб маблағи зиёд лозим буд, дасти ёрӣ дароз кард. Ҳамаи ин корҳои хайрхоҳонаи ӯро созмони “Тонг жаҳонӣ” (“Дунёи забонҳо”), ки ба ҳимояи ҳуқуқи муҳоҷирон дар Русия машғул аст, ба инобат гирифта, ӯро хайрхоҳтарин шахс дар Русия эълон карданд.

Чӣ гунае, ки Фирдавс нақл мекунад, ӯ тиҷораташро аввал аз бозори “Садовод”-и шаҳри Москва оғоз намуда, баъдан оҳиста-оҳиста бо Созмони “Тонг жаҳонӣ” ҳамкорӣ мекунад. Дар кӯтоҳтарин муддат маҳорати худро нишон дода, дар аввал сардори мошинҳои дохили шаҳр ва баъдан мудири кулли ширкати нақлиётии “Русмостранс” таъин мегардад. Ин созмон яке аз созмонҳои қудратманд дар арсаи ҳимоят аз ҳуқуқи муҳоҷирон дар Русия ба шумор меравад.

Фирдавс баъди фаъолиятро дар ин ширкат оғоз намудан, тасмим гирифтааст, ки ба муҳоҷирони тоҷик кумак кунад ва ҳамзамон дар баробари назорат дар ширкати нақлиётии “Русмостранс” ба тиҷорати худ машғул шавад. Ӯ таъкид намуд, ки “Ягон ҷавон набояд интизор шавад, ки касе аз дасташ гирифта, ӯро ба сӯи муваффақиятҳо барад. Баръакс, ӯ бояд ташаббус нишон диҳад ва худро пеш барад. Кореро анҷом диҳад, ки на фақат ба фоидаи ӯ, балки ба дигарон низ манфиатовар бошад”.

- Фирдавс шахси хоксору ҳалим, қавиирода, ростқавлу росткор буда, дар ширкат бо завқи баланд кор мекунад. Ӯ ширкатро хуб назорат мекунад ва намегузорад, ки касе ба кори онҳо халал расонад. Ҳамин иродаи қавии ӯ ҳамаи моро дар ҳайрат гузошт,- иброз дошт, Валентина Чупик, роҳбари ширкат.
Боиси ифтихор аст, ки як ҷавонмард миллати тоҷикро дар кишвари бегона ба хубӣ муаррифӣ мекунад. Умедворем, ки шумораи чунин хайрхоҳон зиёд шуда, ҳамеша ба кумаки мардум омода мешаванд. Мо дар фаъолияти минбаъдаи Фирдавс барор мехоҳем.