ҶАВОНОН
Панҷшанбе 30 Июн 2022 10:04
8766
Ҳамасола дар Тоҷикистон 23 майро ҳамчун Рӯзи ҷавонон бо шукӯҳу ҷалоли хосса ҷашн мегиранд. Бахшида ба ин рӯз тасмим гирифтем, аз чанд ҷавони тоҷик пурсем, ки ҷавонони тоҷик то куҷо муваффақанд ва муваффақияти онҳо дар чист?

Фаррух УМАРОВ, директори маркази омӯзишии "Ilmhona":

- Муваффақияти аввалини ҷавонони тоҷик дар он аст, ки онҳо дар замоне ба воя мерасанд, ки имкони ояндасозӣ зиёд аст. Яъне, айни ривоҷи технологияҳост. Шукр ҳоло якчанд ҷавонони муваффақе дорем, ки аз имкониятҳои ин замон истифода бурда, дар соҳаҳои гуногун пешсафанд. Чи дар фановариҳои молӣ ва чи дар фановариҳои техникӣ. Онҳо ҳам дар ширкатҳои абарқудрати технологӣ ва ҳам дар ташкилотҳои шарикии рушд фаъолият мекунанд. Аз Google ва Facebook сар карда, то стартапҳои худашон. Аммо теъдоди онҳо хеле кам аст. Бисёре аз ҷавонони тоҷик дар муҳоҷирати меҳнатианд. То он даме, ки малакаву истеъдодҳои ҷавонони тоҷик дар биноҳои сохтмонии Русия хок мешавад, муваффақияти дигарон на он қадар ба назар мерасад. Муваффақияти асосӣ барои ҳамаи мо - ҷавонон дар ҳамон ҳолате ба даст меояд, ки миллати тоҷикро хамчун миллати олимону донишмандони асри нав дар дунё шиносанд. Роҳи расидан ба ин мақсад, меҳнат ва талошҳои зиёд аст.

Манзари ШЕРАЛӢ, ҳунарманд ва коргардони ҷавон:

- Ба фикри шахсии ман барои муваффақ будан дар дилхоҳ соҳа аввал ин боварӣ ба худ аст. Яъне инсон набояд бигӯяд, ки ман аз ӯҳдаи иҷрои ин ва ё он вазифа намебароям. Бояд ба худ боварӣ карда, баҳри расидан ба мақсади дар пеш гузоштааш талош намояд, то муваффақ шавад. Дар ин роҳ боварӣ ва дастгирии атрофиён хеле муҳим аст. Дар кишвари мо бахусус соҳаи синамо майдони хело холӣ аст ва ин имкон медиҳад, ки мо ҷавонон дар зудтарин фурсат худамонро муаррифӣ кунем. Барои ин ҳамагӣ як каме боварӣ ва шароит лозим, ки метавонад Ҳукумати кишвар инро барои пешрафти фарҳанг ва синамои миллӣ ба мо - ҷавонон фароҳам оварад ва мо низ дар ин баробар синамои миллии худро ба ҷаҳониён муаррифӣ созем.

Сайидо ШАРАФӢ, донишҷӯ:

- Ман муваффақиятро дар талош мебинам. Яъне, инсон замоне муваффақ мешавад, ки талош варзад ва аз худ қонеъ набошад. Имрӯз ҷавонони зиёде дорем, ки кӯшиш мекунанд, то ояндаи худро бисозанд. Ин аллакай худ муваффақият аст. Ояндаи ҳар шахс дар дасти худи ӯст. Новобаста аз он, ки бо чи гуна душвориҳо рӯ ба рӯ мегардад. Дар бораи дастовардҳо ва пешрафти ҷавонони тоҷик гуфтаниям, ки ҷавонони мо дар бисёр соҳаҳо муваффақанд. Масалан, ҳикояи нависандаи ҷавони тоҷик Дурдонаи Зафар дар Олмон дар яке аз озмунҳои бонуфуз мақоми дуюмро соҳиб гашт. Ин муваффақият боиси хушбахтии ҳамаи мо ҷавонони эҷодкор гардид. Ё худ соли гузашта дар меҳмонхонаи Серена намоиши мусаввараҳои рассоми ҷавони тоҷик Бежан Шамсов баргузор шуда буд. Ҳама рассомон ва меҳмонҳои хориҷие, ки ҳузур доштанд, ба рассом баҳои баланд доданд. Ин аст муваффақиятҳои ҷавонони тоҷик дар арсаи ҷаҳонӣ.

Шарифамо ОДИНАМАМАДОВА:

- Ҷавонони пешқадами тоҷик имрӯзҳо хело ҳам зиёданд. Ҷавонони Тоҷикистон дар озмуну олимпиадаҳои байналмилалӣ ва донишгоҳу коллеҷҳои ҷаҳонӣ пайваста обрӯву ному нанги миллати тоҷик ва Парчами давлатии Тоҷикистонро баланд менамоянд. Муваффақиятҳои онҳо, албатта, дар кӯшиш, дастгириҳову талошҳои пайвастаи Ҳукумати давлат, мавҷудияти маданияту таърихи бою ғанӣ, аҷдодони зиёии миллати тоҷик, шарафу номус ва виҷдони ҳар як тоҷикистонӣ баҳри хизмати арзанда барои пешрафти миллату давлатдорӣ ба ҳисоб меравад.

Ҳошим РАҲМАТУЛЛОЕВ,
коромӯзи “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

Июн 2022 c.