Мақсуд аз ҷавонҳое мебошад, ки имрӯз бо дили гарму иродаи устувор дар пешаи интихобнамудааш равонаасту дар баробари фаъолият ба ихтироъ низ таваҷҷуҳи доимӣ дорад. Ҳамин гуна талошҳояш буд, ки дар натиҷа дар самти ихтироъкорӣ низ муваффақ гардид.

Мақсуд Сангов, соли 1990 таваллуд шуда, хатмкардаи факултети химияи Донишгоҳи миллии Тоҷикистон мебошад. Айни ҳол ходими калони илмии Институти илмию тадқиқотии ДМТ аст.

Пас аз таҳқиқот ва ҷустуҷӯҳои зиёд барояш муяссар мегардад, ки ихтирооти худро дар маркази Миллии патенту иттилоот ба қайд гираду бо навоварии хеш саҳми худро дар рушди соҳааш гузорад. Ба таъкиди ӯ ҷавониро истифода бояд кард, то соҳиби касбе гардид.

Яке аз ихтирооташ “Тарзи коркарди партовҳои сайқалдиҳии электрохимиявии саноати заргарӣ” мебошад.

Кори худро шарҳ дода гуфт:

- Ихтирои мазкур ба тарзи комплексӣ ҷудокунии металлҳои тилло ва нуқра аз партовҳое, ки дар натиҷаи сайқалдиҳии электрохимиявӣ ҳосил мешаванд, бахшида шудааст. Барои зина ба зина ҷудокунии металҳои тилло ва нуқра аз чунин намуди партов он аввал коркарди термикӣ (дар ҳарорати 490-500 0С) коркард мешавад. Сипас бо кислотаи нитрати консентратсияи паст коркард мегардад. Ба маҳлул NaCl илова намуда, Ag-ро дар намуди хлоридаш такшон мекунем ва бо ёрии алюминий барқарор менамоем. Кислотаи ҳалнашударо бо шароби шоҳ коркард карда, бо маҳлули кислотагии гидразин тиллоро барқарор менамоем. Тиллои металие, ки ба даст оварда мешавад, тозагии 99,5 тамға дорад. Барои баланд бардоштани тамғаи тилло онро дигарбора бо шароби шоҳ коркард карда, аз нав барқарор менамоем, ки дар натиҷа тиллои тозагиаш 99,9 ҳосил мешавад.

“Тарзи сайқалдиҳии электрохимиявии маснуоти нуқрагӣ” навоварии дигари ӯ мебошад.

Дар оянда низ нақшаҳои зиёд дошта, дар самти ихтироъ фаъолияти худро идома доданист, ки барояш дар ин ҷода комёбӣ хоҳонем.

Беҳрӯз ХОЛМУРОДОВ, “ҶТ”