Дар робита ба иҷрои дастуру супоришҳои Пешвои миллат, муҳтарам Эмомалӣ Раҳмон, ки имсол моҳи май зимни мулоқот бо намояндагони ҷомеаи кишвар баргузор гардид, дар ноҳияи Мурғоб мизи мудаввар баргузор гашт. Он бо ширкату баромади муовини раиси ноҳия Усния Раҷабова, мудирони бахшҳои кор бо ҷавонон ва варзиш, танзими анъана ва ҷашну маросимҳои миллию шуъбаи маориф ва илм Жанпулод Қамчибеков, Закир Байназаров, Мунир Шикориев, директори маркази ВНМО Зубайда Қодирова сурат гирифт.

Ҳозирин асосан масоили таҳдидҳои терроризму экстремизм, гирифтани маълумоти мазҳабӣ дар хориҷа, нақши ҷавонон дар ҷомеаи муосир, пешгирии нашъамандию ВНМО ва дигар мавзуъҳоро муҳокима намуданд.

Қайд гардид, ки чанде қабл бо иқдоми Пешвои миллат дар пойтахти кишвар, шаҳри Душанбе ба бунёди боз як иншооти замонавии Донишкадаи исломии Тоҷикистон ба номи Имоми Аъзам - Абӯҳанифа Нӯъмон ибни Собит санги асос гузошта шуд. Яъне бунёди ин донишкада иловатан имкон медиҳад, ки ҷавонон дар Ватани хеш ба омӯзиши дуруст ҷалб гардида, соҳибимаълумот шаванд.