ҶАВОНОН
Сешанбе 18 Феврал 2020 12:13
6872
Имрӯз дар Китобхонаи миллии Тоҷикистон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Форуми ҷумҳуриявӣ дар мавзӯи “Роҳ ва усулҳои муосири муқовимат бо таҳдиду хатарҳои замони муосир бахусус ифротгароии хушунатомез дар байни ҷавонон” баргузор гардид.

Форуми мазкур бо садо додани Суруди миллӣ оғоз гардида, дар он намояндагони ташкилоту муассисаҳо, Прокуратураи кишвар дар минтақаҳои мухталифи кишвар, судяҳои Суди Олии кишвар, муовинони раисони шаҳру ноҳияҳои ҷумҳурӣ, ҷавонони фаъоли вазорату идораҳо, коршиносони соҳа, олимону муҳаққиқон ибрози назар намуданд.

Раҳмонзода Абдулло Қурбоналӣ, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни суханронии ифтитоҳӣ нахуст дар бораи нақши ҷавонон дар таҳкими давлатдории миллӣ ибрози назар кард.

“Имрӯз ҷавонони саодатманди кишвар дар пайравӣ аз сиёсати хирадмандона ва ҷавонпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳама самтҳои ҳаётан муҳим фаъолияти пурсамар дошта, барои рушди ояндаи давлат ва ҳимояи марзу буми кишвари азизамон бо қадамҳои устувор пеш мераванд. Хушбахтии ҷавонони тоҷик пеш аз ҳама дар он аст, ки дар фазои сулҳу суботи комил умр ба сар бурда, баҳри амалӣ намудани сиёсати дурандешона ва муваффақонаи Пешвои ҷавонпарвари хеш, ки рамзи иттиҳоду сарҷамъӣ ва саодату осудагии ҳар як сокини кишвар мебошад, камари ҳиммат бастаанд”, - гуфт, Раҳмонзода Абдулло Қурбоналӣ.

Раиси кумита дар идомаи суханронии хеш оид ба ифротгароиву гаравидани баъзе ҷавонон ба ҳизбу ҳаракатҳои ифротӣ таъкид намуд, ки дар ҷаҳони муосир терроризму экстремизм барои пешрафти тамоми кишварҳои олам монеаи бузургеро эҷод намуда, башариятро дар ҳоли тарсу ҳарос қарор додааст. Имрӯз мо дар ҷаҳоне зиндагӣ дорем, ки пур аз нооромиҳо мебошад. Таҳлили вазъияти ҷаҳонӣ гувоҳи он аст, ки дар натиҷаи амалҳои террористӣ садҳо нафар ашхоси бегуноҳ ҷони худро аз даст медиҳанд. Гурӯҳҳои ифротгаро бо истифода аз роҳу усулҳои гуногуни таъсиррасонӣ ба мафкураи одамон, бахусус наврасону ҷавонон таблиғоти ғайриқонунӣ бурда, ақидаҳои носолимро дар тафаккури онҳо ба вуҷуд меорад, ки дар натиҷа боиси ифротӣ гардидани ҷавонон мегардад. Ҳар яки моро месазад, ки баҳри пешгирии ин зуҳуроти номатлуб, ки доимо амнияти давлату миллатро зери хатар қарор медиҳад, муборизаи беамон барем.

2.jpg

Иштирокчиёни дигари форум иброз доштанд, ки ҷавононро месазад, дар дилу вуҷуди худ ҳамеша андешаи ояндаи давлату миллатро дошта бошанд, бо эҳсоси меҳанпарастӣ ҳомии дастовардҳои даврони соҳибистиқлолӣ ва арзишҳои неки марзу буми хеш бошанд. Ҳамзамон ба муқобили ифротгароӣ, хурофотпарастӣ ва ақидаву андешаҳое, ки барои рушди мамлакат монеагӣ эҷод мекунад, муборизаи беамон баранд ва ҷомеаро аз таъсири ҳар гуна фарҳангу мафкураи бегона ҳифз намоянд.

Гуфта шуд, ки форуми имрӯза бо мақсади татбиқи Стратегияи миллии Ҷумҳурии Тоҷикистон оид ба муқовимат бо терроризму экстремизм барои солҳои 2016-2020 ва муайян намудани самтҳои асосии сиёсати давлатӣ дар соҳаи муқовимат ба терроризму экстремизм ҷиҳати таъмини амнияти ҷамъиятӣ ва ҳимояи ҳуқуқу озодиҳои инсон ва шаҳрванд аз таҳдидҳои экстремистӣ равона шудааст.

Форуми мазкур бо мақсади пешгирии ҷавонону наврасон аз омилҳои номатлуби иҷтимоӣ, пешгирӣ аз гаравиш ба ҳизбу ҳаракатҳои номатлуб, пешгирии роҳҳои муосири терроризм ва экстремизму ифротгароии динӣ дар миёни ҷавонон доир гардида, иштирокчиён даъват ба амал оварданд, то тамоми сокинон дар роҳи мубориза алайҳи ин зуҳуроти номатлуб фаъол бошанду ҳимоятгари арзишҳои миллӣ.

Пас аз суханрониҳои ифтитоҳӣ дар нимаи дуюми рӯз қисмати дуюми кори форум дар шаш бахши алоҳида дар мавзӯъҳои “Роҳ ва усулҳои муосири пешгирӣ аз таҳдидҳои замони муосир бахусус терроризм ва экстремиз миёни ҷавонон", "Ҳуқуқвайронкунӣ ва ҷиноят миёни ҷавонон: сабабҳо ва роҳҳои пешгирӣ", "Таҳкими тарзи ҳаёти солим", "Муҳоҷирати меҳнатӣ миёни ҷавонон: ҷанбаҳои мусбат ва манфӣ", "Нақши ҷомеаи шаҳрвандӣ дар мубориза бо таҳдидҳои замони муосир", "Истифодаи самараноки ТИК омили пешрафт ва суботи ҷомеа", "Оммавияти варзиш роҳ ба сӯйи муваффақиятҳои олимпӣ ва таъмини солимии ҷомеа", "Таҳкими тарбияи ватандӯстӣ ва ҳуввияти миллии ҷавонон" идома ёфта, мавзуъҳои мазкур мавриди таҳлилу баррасӣ қарор гирифтанд.

Ба таъкиди масъулин дар охири кори Форум аз натиҷаи ба дастомадаи бахшҳои он қатънома қабул гардида, он ҷиҳати баррасии масъалаҳои мазкур ва пешгирии ҷавонон аз хатару таҳдидҳои замони муосир ва пешгирии ҳолатҳои хатарҳои он ба Ҳукумати Ҷумҳурии Тоҷикистон ва сохторҳои марбутаи кишвар ирсол карда мешавад.

3.jpg

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 1

Феврал 2020 c.