Дар Академияи идоракунии давлатии назди Президенти Ҷумҳурии Тоҷикистон бо ташаббуси бахши кор бо ҷавонон мизи мудаввар таҳти унвони “Ҷавонон - давомдиҳандаи кору фаъолияти насли калонсол” бо иштироки устодон, кормандон, донишҷӯёну магистрантон баргузор гардид.

Дар он Фарҳод Суфиев – сардори раёсати тарбия ва кор бо ҷавонон, Зоҳир Қодиров – сардори шуъбаи илм, инноватсия, Насиба Абдулвоҳидова – мудири бахши кор бо ҷавонони Академияи идоракунии давлатӣ иштирок ва суханронӣ намудаанд.

Зикр шуд, ки давоми солҳои соҳибистиқлолӣ таҳти сиёсати хирадмандонаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон мақому мавқеи ҷавонон дар ҷомеа ба маротиб баланд гардида, ҷалби бештари онҳо ба корҳои ҷамъиятиву идоракунӣ дар пешрафту ободии мамлакат бештар намуд.

Ҳамчунин, таъкид гардид, ки Пешвои миллат  дар Паёмашон ба Маҷлиси Олӣ иброз доштаанд: “Ҷавонон давомдиҳандаи кору фаъолияти насли калонсол, нерӯи тавоно ва иқтидори воқеии пешрафти ҷомеа, хулоса, ояндаи давлат буда, фароҳам овардани шароити мусоид барои фаъолияти онҳо минбаъд низ ҳамчун яке аз масъалаҳои муҳимтарини сиёсати Ҳукумат боқӣ мемонад”.

Устодону Донишҷӯён дар мавзӯъҳои “ Паёми Пешвои миллат роҳнамои мо – ҷавонони зодаи истиқлолият”, “Ҷавонон ояндасозӣ миллат”, “Инъикосӣ ҳифзи иҷтимоии ҷавонон дар Паёми Пешвои миллат” суханронӣ намуда, таъкид доштанд, ки имрӯзҳо ҷавонони саодатманди кишвар дар ҳамаи соҳаҳои ҳаёти хоҷагии халқ барои баланд бардоштани ному мақоми кишвари соҳибистиқлоламон бо дастовардҳои назаррас ва муваффақиятҳои калон устуворона қадам мезананд. 

Дар охири миззи мудаввар донишҷӯёну магистрантон фикру андешаи худро вобаста дастгири давлату Ҳукумати кишвар нисбати ҷавонон иброз доштанд.

Раҳматулло КАРИМОВ,
сармуҳаррири рӯзномаи “Сарвар ва миллат”-и
Академияи идоракунии давлатӣ