Эълон гардидани соли 2017 ҳамчун “Соли ҷавонон” дастовардҳои беназиртарину нотакрор дар ҳаёти ҳар як ҷавони саодатманди кишвар мебошад. Чунки онҳо дар ин сол нисбат ба солҳои пешин таваҷҷуҳу ғамхории бештари Пешвои муаззами миллатро насиб гардиданд, ки дар саҳифаи зиндагиашон абадан сабт мешавад ва аз хотирашон ҳеҷ гоҳ зудуда нахоҳад шуд.

Дар заминаи ин соли хотирмону таърихӣ андешаҳои чанд тан аз роҳбарони мақомот ва вазорату идораҳои давлатиро манзуратон мегардонем.

Рустами ЭМОМАЛӢ, раиси Шаҳри Душанбе, президенти Федератсияи футболи Тоҷикистон:

- Имсол барои ҷавонон соли хеле муҳиму фарқкунанда буд, зеро бо ташаббусу пешниҳоди Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон соли 2017 “Соли ҷавонон” эълон гардид, ки барои мо мояи ифтихору сарфарозӣ мебошад. Ин ташаббус бо назардошту дарки амиқи нақшу мавқеи ҷавонон дар рушду созандагии кишвари азизамон сурат гирифтааст. Воқеан, ҷавонон ҳамчун нерӯи созандаи кишвар, такягоҳ, умед ва ифтихори давлату ҷомеа ба шумор рафта, дар рушди соҳаҳои иқтисодиву иҷтимоии Ватани маҳбубамон нақш ва мавқеи басо муҳимро касб кардаанд.

Ман бовар дорам, ки ҷавонони кишвар аз уҳдаи иҷрои ҳама вазифаҳои дар наздашон гузошташуда сарбаландона мебароянд ва минбаъд низ кӯшиш мекунанд, ки ба нафъи давлату ҷомеа боз ҳам содиқона хизмат намоянд. Зеро ҷавонон борҳо собит намудаанд, ки дар ҳақиқат пайравони асили Пешвои миллат буда, дар иҷрои ҳама кору масъулият, новобаста аз душвориҳои шароити ҷаҳонишавӣ ва таъсири дигар омилҳои беруна, қодиру тавоноянд. Ман ба ҷавонон итминони комил дорам ва ифтихор мекунам, ки имрӯз ҷавонони мо дар дигаргунсозиҳои ҷомеаи навин фаъолона иштирок карда, дар муаррифии давлати тоҷикон ва баланд бардоштани Парчами Тоҷикистон дар арсаи ҷаҳонӣ нақши шоиста доранд ва “Соли ҷавонон”-ро ҳам бо дастовардҳои зиёд ҷамъбаст мекунанд.

Рӯ овардан ба сиёсати ҷавонон ин худ тақозои таърих ва назари хирадмандонаи Пешвои муаззами миллат, Президенти кишвар, муҳтарам Эмомалӣ Раҳмон мебошад. Ҷавонони мо бояд ҳисси баланди миллию фарҳангӣ дошта, пояҳои давлатдории миллиро ҳамчун гавҳари ноёб эҳтирому нигоҳ дошта, роҳнамоиҳои созандаи Сарвари давлатро сармашқи зиндагиномаи худ қарор диҳанд. Пайваста бо меҳри Ватан, миллат, давлати соҳибистиқлоли худ ва забону фарҳанги миллии хеш ифтихор намуда, барои ҳимояи дастовардҳои Истиқлолияти давлатӣ, якпорчагии марзу буми он, ҳамеша омода бошанд.

Абдуҷаббор РАҲМОНЗОДА, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа:

- Ҷавонон дар даврони Истиқлолият мавқеи бештар пайдо карда, дар ҳаёти ҷамъиятии мамлакат нақши фаъол доранд. Онҳо худро ҳомии ин марзу бум дониста, дар ҳифзи он сарбаландона хидмат мекунанд, донишҳои муосирро аз бар карда, бо ибтикороти шоиста ва таҳияи лоиҳаҳои инноватсионӣ баромад менамоянд, дар сохтмонҳои азими кишвар кору фаъолият карда, дар рушди иқтисоди миллӣ ҳиссаи сазовор мегузоранд ва зиракии сиёсиро аз даст надода, дар татбиқи сиёсати ватандӯстонаи Пешвои миллат саҳми боарзиш мегузоранд ва ташаббусҳои созандаро дар мамлакат роҳандозӣ менамоянд.

Ҳамин сифатҳои ҳаётдӯстонаи ҷавононро ба инобат гирифта, Президенти Ҷумҳурии Тоҷикистон, Асосгузори сулҳу ваҳдати миллӣ, Пешвои миллат, муҳтарам Эмомалӣ Раҳмон соли 2017 - ро “Соли ҷавонон” эълон карданд, ки он боиси руҳбаландии ҷавонони кишвар гардид. Ин иқдоми саривақтии Пешвои миллат имкон дод, ки ҷавонон беш аз пеш дар атрофи сиёсати Роҳбари давлат муттаҳид шуда, чорабиниҳои мухталифро доир созанд ва барои пешрафти мамлакати азизамон ғайратмандона заҳмат кашанд.

Дар асоси ин иқдом насли ояндасози мо “Ҷавонон пайрави Пешвои миллат”-ро шиори худ қарор дода, то ба имрӯз дар маъракаҳои аҳамияти ҷумҳуриявидошта бо масъулиятшиносӣ иштирок карданд, ки ҳар кадоми он дар баланд рафтани ҳисси ватандӯстӣ ва ифтихори миллии ҷавонон таъсири мусбат расониданд. Баробари ин, ҷавонон дар мавзӯҳои мубрами рӯз, аз қабили аҳамияти Истиқлолияти давлатӣ ва озодӣ, нақши Пешвои миллат дар тарбияи ватандӯстии ҷавонон, моҳияти Ваҳдати миллӣ, сулҳу субот, амнияту якпорчагии давлат, ҳифзу ҳимояи манфиатҳои миллию давлатӣ, дӯстию рафоқат, арҷ гузоштан ба таърих ва фарҳанги миллӣ, эҳёи анъанаҳои миллӣ ва дигар масъалаҳои ҳаётан муҳим дар шаҳру ноҳияҳо, муассисаҳои таълимӣ ва фарҳангӣ конференсияву вохӯриҳои судманд, мизи гирд, суҳбатҳо ташкил карда, ба ин восита, аз як тараф, бо ҳамдигар шиносоӣ пайдо намуданд, аз ҷониби дигар мавзӯъҳои мазкурро баррасӣ карда, доираи ҷаҳонбинию ҷаҳоншиносии худро васеъ гардониданд. Чорабиниҳои мазкур имкони хубе фароҳам сохтанд, ки ҷавонони минтақаҳо бо ҳам наздик шаванд, аз афкору андешаи якдигар огаҳӣ пайдо кунанд ва муттаҳиду сарҷамъ баҳри татбиқи сиёсати созандаи Роҳбари давлат саъю талош намоянд.

Ҳамзамон, насли ҷавонро зарур аст, ки минбаъд аз саҳву хатоҳои гузашта дарси ибрат гиранд, муттаҳид шаванд ва якҷоя амал намуда, ба роҳи ягонагӣ ва якдигарфаҳмӣ қадам гузоранд. Идеали сиёсии мо аз ягонагии миллӣ, дӯстӣ, бародарӣ, муттаҳидии ҷавонони кишварамон вобаста аст. Дар сиёсати давлатии ҷавонон риояи ҳамин принсипи сулҳу субот ба сифати яке аз масъалаҳои калидӣ бояд маҳсуб гардад. Яъне ҷавонони Ҷумҳурии Тоҷикистон бояд фаъолияти худро барои устувор гардонидани ягонагии кишварамон ва беҳтар намудани шароити зиндагии халқ равона сохта, пайваста саҳми арзандаи худро дар таҳкими давлати дунявию ҳуқуқбунёд гузоранд.

Асадулло РАҲМОН, Ёрдамчии Президенти Ҷумҳурии Тоҷикистон оид ба масъалаи кадрҳо:

- Сиёсати давлатии кадрҳои Ҷумҳурии Тоҷикистон дар заминаи сиёсати умумидавлатӣ ташаккул ёфта, бевосита масъалаҳои идоракунии захираҳои инсонӣ, аз ҷумла таҳсил, интихоб, ҷобаҷогузорӣ, пешбарӣ ва истифодаи самараноки кадрҳоро дарбар мегирад.

Дар робита ба ин раванди идоракунии давлатӣ ва рушди хизмати давлатӣ, ки қисмати таркибии сиёсати давлатии кадрҳо маҳсуб меёбанд, дар маркази таваҷҷуҳи ҳамешагии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Ҳукумати Ҷумҳурии Тоҷикистон қарор доранд.

Яке аз самтҳои афзалиятноки низоми идоракунӣ татбиқи самараноки сиёсати давлатии ҷавонон арзёбӣ гардида, бо ибтикор ва ташаббусҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар ин ҷода пайваста тадбирҳои зарурӣ роҳандозӣ карда мешаванд.

Ба ифодаи дигар, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон поягузори низоми идоракунии давлатии муосир ва низоми таҳсили хизматчиёни давлатӣ буда, ҳамчун рукни муҳими ташаккули давлатдорӣ ҷавононро низ фаро мегиранд.

Идоракунии давлатии муосир аз кадрҳо талаб мекунад, ки дастовардҳои илми муосири идоракуниро омӯхта, донишу малакаи худро пайваста такмил диҳанд. Барои ин хизматчиёни давлатӣ бояд забони давлатӣ ва забонҳои хориҷиро аз худ карда, малакаи хуби кор бо технологияҳои иттилоотии муосирро дошта бошанд.

Президенти мамлакат муҳтарам Эмомалӣ Раҳмон зимни яке аз суханрониҳояшон таъкид карданд, ки “Дар ҷаҳони имрӯза забондонӣ ва малакаи кор бо техникаи компютерӣ ба яке аз меъёрҳои асосии интихоб ва ҷобаҷогузории кадрҳо мубаддал гаштааст. Ҳоло вақти он расидааст, ки мо низ ин меъёрро дар ҷомеаи худ татбиқ намоем. Албатта, ҳалли ин масъала кори якрӯза нест ва он бояд оқилона, дурбинона ва тадриҷан амалӣ карда шавад”.

Умед аст, ки худи ҷавонон ин нуктаро хуб дарк мекунанд ва дар ҷавоби таваҷҷуҳу ғамхориҳои пайвастаи Сарвари давлат бо масъулияти дучанд донишҳои касбии худро баланд мебардоранд ва фаъолияташонро дар низоми идоракунии давлатӣ баҳри рушди соҳаҳои иқтисодию иҷтимоии кишвар равона месозанд.

Қиёмиддин МИРАЛИЁН, вакили Маҷлиси намояндагони Маҷлиси Олии Ҷумҳурии Тоҷикистон:

- Ҷавонон дар ҳаёт басо бори гарон — рисолати созандагию бунёдкориро ба уҳда доранд. Зимнан, дар шароити демократикунонии ҷомеа ва бунёди давлати навини миллӣ раванди ташаккулёбии муносибатҳои идоракунӣ ва рушди ҷомеаи шаҳрвандиро, ки тақозои ҷомеаи муосир мебошад, бидуни иштироки ҷавонон тасаввур кардан имконнопазир аст. Дар воқеъ, ҷавонон аз рӯзҳои аввали Истиқлолияти давлатӣ дар ташаккул ва рушди муносибатҳои иҷтимоиву иқтисодӣ ва фарҳангиву сиёсӣ, аз ҷумла соҳибистиқлолии мамлакат, ваҳдати миллӣ, идоракунӣ ва фаъолнокии ҷамъиятии ҷомеа бо иштироки бевосита ва бавоситаи худ саҳм гузоштаанд. Дар ин росто, рисолати асосии насли ҷавон ба он асос меёбад, ки онҳо дар ҳама ниҳодҳо, ҳам дар сафи Қувваҳои Муссаллаҳ, мақомоти ҳифзи ҳуқуқ, маориф, тандурустӣ ва ҳам хоҷагии халқ ҳамчун қувваи ҳаракатдиҳанда аксариятро ташкил медиҳанд, мувофиқан дар тамоми дастовардҳои кишвар ва муносиботи идорӣ саҳмгузор ба ҳисоб мераванд.

Аз ин рӯ, иштироки ҷавонон дар таҳкими муносибатҳои идоракунӣ ва рушди ҷомеаи шаҳрвандӣ дар шароити ҷомеаи муосир, ки пайваста онро Пешвои миллат таъкид менамоянд ва дар ин росто ташаббусҳои зиёди муназзамро низ пеш гузоштаанд, бомаром ва муносиб арзёбӣ мегардад.

Сумангул ТАҒОЙЗОДА, вазири меҳнат, муҳоҷират ва шуғли аҳолии Ҷумҳурии Тоҷикистон:

Мусаллам аст, ки ҷавонон нисбат ба ҳама қишрҳои ҷомеа бояд бештар фаъол бошанд, ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои истиқлолиятро ҳифз карда, парчамбардори сарзамин, марзу бум ва кишвари азизамон бошанд.

Пайдост, ки Ҷумҳурии Тоҷикистон кишвари наврасону ҷавонон мебошад, зеро синни миёнаи аҳолӣ 24 солро ташкил намуда, беш аз 70 фоизро ҷавонон ташкил медиҳанд. Ин аст, ки ҳамасола сафи хизматчиёни давлатӣ аз ҳисоби ҷавонон дар мақомоти давлатӣ афзоиш меёбад. Ҳоло теъдоди ҷавонони то синни 35-сола дар байни хизматчиёни давлатӣ 50 фоизро ташкил дода, 23 фоизи дигар дар ҳайати кадрҳои роҳбарикунанда фаъолият доранд.

Сиёсати хирадмандонаи Пешвои миллат дар самти дастгирӣ аз ҷавонони кишвар, роҳ додани онҳо ба майдонҳои сиёсиву иҷтимоиву фарҳангӣ, ғамхориву дастгириҳои пайвастаи онон имрӯз набзи зиндагии кишвар гардидааст. Маҳз дар даврони Истиқлолияти давлатии Ҷумҳурии Тоҷикистон бо дастуру ҳидоятҳои Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва талаботи ҷомеаи муосир, ташаккул ёфтани низоми идоракунии соҳаи сиёсати давлатии ҷавонон, тағйир ёфтани хусусиятҳои мушкилоти ҷавонон, ташкил ёфтани муносибатҳои байнидавлатӣ ва байналмилалӣ дар самти татбиқи сиёсати давлатӣ дар ин соҳаи муҳими ҳаётӣ солҳои охир якчанд санадҳои меъёрии ҳуқуқӣ ва барномаву стратегияҳо қабул гардиданд.

Аз ин хотир, бо боварӣ метавон гуфт, ки ҷавонони баору номуси кишвар бо руҳияи пешқадаму созанда ҳамсолони худро ба ояндаи боз ҳам нек роҳнамоӣ карда, барои амалӣ гардидани ҳадафҳои тақдирсози Роҳбарияти Олии кишвар пайваста саъю талош менамоянд.

ОЛИМЗОДА Н. Х., вазири тандурустӣ ва ҳифзи иҷтимоии аҳолии Ҷумҳурии Тоҷикистон

- Ҷавонон нерӯи пешбаранда, қисмати ҷудонопазир ва қишри асосии ҷомеа буда, дар ташаккулёбӣ ва рушди ҷомеаи шаҳрвандии муосир саҳмгузорони асосӣ ба шумор мераванд. Таъмин ва такмили иштироки ҷавонон дар бунёд ва ободкунии ҷомеаи шаҳрвандӣ ва ба ин восита омода намудани онҳо барои пешбурди ҳаёти мустақилона ва устувор зарурати мубрам дорад.

Хиради воло ва сиёсати дурбинонаи Сарвари давлат Эмомалӣ Раҳмон тақозо намуд, ки солимии наврасону ҷавонон ҳамчун танзимгарони арзишҳои муқаддасотӣ - Истиқлолияти давлатӣ ва Ваҳдати миллӣ зери назорати қатъии Ҳукумати ҷумҳурӣ қарор дошта бошад.

Талошҳои пайвастаи ҷавонони имрӯзаи мо ҷиҳати иштироки фаъолона дар рушду нумӯи кишвари азизамон бовар бар он месозад, ки ҷавонони мо бо ҳисси баланди худшиносиву худогоҳии миллӣ ва ифтихор аз давлату давлатдории миллӣ дар оянда низ тамоми нерӯи худро барои ҳифзи дастовардҳои истиқлолият, таҳкими давлатдорӣ, ваҳдати миллӣ, сулҳу субот, рушди минбаъдаи иқтисодиву иҷтимоии Ватани азизамон ва устувор гардонидани мавқеи он дар қатори кишварҳои мутараққӣ сафарбар менамоянд.

Дастуру ҳидоятҳои Пешвои миллат, муҳтарам Эмомалӣ Раҳмон имрӯз сармашқи асосии кору пайкор ва фаъолияти ҳамарӯзаи ҷавонони соҳаи тандурустии кишвар гардида, онҳо бо афкору андешаҳои тоза баҳри беҳтарсозии солимии аҳолӣ камари ҳиммат бастаанд.

Ҳамин тариқ, саҳми ҷавонон дар рушди бахшҳои гуногуни тандурустӣ ва солимии аҳолӣ арзанда буда, дар давоми солҳои охир аз ҷониби онҳо иҷрои ташхису амалҳои мураккаб ба таври васеъ амалӣ карда мешавад. Дар татбиқ намудани кашфиётҳои илмӣ дар амалияи тиббӣ, ворид намудани таҷрибаи пешқадам ва истифодаи технологияҳои муосир дар соҳаи тандурустӣ бошад саҳми ҷавонон сол ба сол бештар ба назар мерасад, ки ин худ гувоҳи рушди босуботи ояндаи тибби тоҷик мебошад.

САИД Н. С., вазири маориф ва илми Ҷумҳурии Тоҷикистон:

- Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон саҳми ҷавонони ифтихорманди миллатро дар рушди ҷомеа ва иштироки фаъолонаи онҳоро дар ҳаёти сиёсиву иқтисодии мамлакат ба назар гирифта, дар Паёми хеш ба Маҷлиси Олии Ҷумҳурии Тоҷикистон (22 декабри соли 2016) пешниҳод намуданд, ки соли 2017 дар кишвари азизамон “Соли ҷавонон” эълон карда шавад. Ин иқдоми Пешвои муаззами миллат бо чунин далелҳо асоснок гардид: “Татбиқи босамари сиёсати давлатии ҷавонон аз рӯзҳои нахустини соҳибистиқлолӣ дар меҳвари фаъолияти Ҳукумати Тоҷикистон қарор дорад. Аксарияти аҳолии Тоҷикистонро ҷавонон ташкил медиҳанд, ки онҳо давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд”.

Сарвари кишвар ҳамчунин изҳор доштанд, ки имрӯзҳо дар тамоми соҳаҳои иқтисоди миллии мамлакат, инчунин, дар сафҳои Қувваҳои Мусаллаҳ ҷавонони бонангу номус содиқона хизмат ва кору фаъолият доранд ва дар рушди иқтисоди миллӣ ҳиссаи назаррас мегузоранд.

Дар баробари ин, ҷавонон дар дохил ва хориҷи мамлакат таҳсил карда, соҳиби касбу ихтисосҳое шуда истодаанд, ки барои Тоҷикистон бағоят зарур мебошанд. Бо ҳамин сабаб Ҳукумати мамлакат ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият ва шароити мусоид фароҳам меорад. Бешак, дар ҷавоб ба ин ғамхориҳо наврасону ҷавонони ифтихорманди миллати моро зарур аст, ки тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созанд.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2017-умро Соли ҷавонон эълон намуда, бори дигар боварию эътимоди хеш ва Ҳукумати мамлакатро ба ин насли созанда иброз намуданд. Аз ин рӯ, ҷавонони ифтихормандони миллати моро зарур аст, ки ба ин боварӣ сазовор бошанд ва чун парчамбардорону соҳибони ҳақиқии ин Ватану миллати бузург барои рушду пешрафти он саҳми арзанда гузоранд.

РАҲИМЗОДА Р. Ҳ., вазири корҳои дохилии Ҷумҳурии Тоҷикистон:

- Дар ҷаҳони муосир рӯ овардан ба кору фаъолияти ҷавонон ва дастгириву ташаббусҳои онҳо аз афзалиятҳои муҳими сиёсати давлатии мо ба ҳисоб меравад. Дар воқеъ, ҳоло ҷавонони мо чун нерӯи бузурги бунёдкору созандаи кишвар эътироф гаштаанд. Аз ин ҷиҳат, мо ҳалли мушкилоту муаммои ҳаёти наврасону ҷавононро самти бунёдӣ ва арзишманди сиёсати иҷтимоии давлат эълон намудаем. Бинобар ин, Тоҷикистон аз нигоҳи синну соли аҳолӣ дар ҳоли рушди доимӣ қарор дошта, аз нисф зиёди аҳолии онро ҷавонон ташкил додаанд. Ба ин хотир, бе иштироки фаъолонаи ҷавонон рушди иқтисодиву иҷтимоӣ ва сиёсиву фарҳангии кишварамонро тасаввур кардан нашояд.

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳанӯз дар моҳи марти соли 1994 дар суханронии худ таъкид карда буданд: “Мо бояд дар ҷавонон ҳисси ватандӯстиро парвариш намоем. Онҳо дар чунин рӯҳия ба воя расанд, ки барояшон ҳар як пораи хоки Тоҷикистон азизу муқаддас бошад. Ҳифз кардани онро барои худ шарафи бузург донанд”. Аз ин суханҳои Сарвари давлат зиёда аз 23- сол сипарӣ гардид. Дар ин муддат ҷавонони кишвар ба як қувваи воҳид ва нерӯи пуриқтидори созанда табдил ёфтанд, ки дар таҳсилу кор, пешбурди корҳои илмию эҷодӣ, фарҳангу маданият, варзиш ва иштирок дар чорабиниҳои давлатию ҷамъиятӣ нақши бориз доранд.

Имрӯз ба кору фаъолият, мавқеъ ва саҳми ҷавонон дар рушду инкишофи ҷомеа назар карда, моро ҳисси руҳбаландӣ ва ифтихор фаро мегирад, ки ин нерӯи созандаву бунёдкори кишвар метавонад барои ободию гулгулшукуфии мамлакат корҳои бузургро анҷом диҳад. Иштироки онҳо дар мусобиқаҳои бонуфузи ҷаҳонӣ ва соҳиб гардидан ва ҷоизаҳои баланди варзишӣ шаҳодати ғамхорӣ ва таваҷҷуҳи роҳбарияти давлату Ҳукумат ба ояндаи ҷавонон ва солимии ҷомеа дар ҳаёт мебошад.

Таъкидҳои Пешвои миллат пеш аз ҳама ҷавонон, падару модарон, омӯзгорон ва аҳли ҷамоатчигиро водор месозад, ки ба таълиму тарбияи насли наврас диққати ҷиддӣ диҳанд.

ҲИКМАТУЛЛОЗОДА Н., вазири рушди иқтисод ва савдои Ҷумҳурии Тоҷикистон:

- Маълумоти оморӣ нишон медиҳанд, ки Тоҷикистон аз ҷиҳати аҳолӣ дар ҷаҳон яке аз кишварҳои ҷавон маҳсуб меёбад. Ин нерӯи пешбарандаи ҷомеа аз солҳои аввали истиқлолият ифодагари ифтихори миллӣ ва шукргузор аз истиқлолияти давлат ва заминаҳо оид ба рушди имкониятҳои иқтисодии кишвар ба шумор меравад. Ояндаи давлату миллати мо ба насли ҷавон мансуб буда, маҳз ҷавонон дар байни дигар табақаҳои аҳолӣ бештар фаъол, инчунин умеду такягоҳи давлат мебошанд, чунки зиёда аз 60 фоизи аҳолии кишвар ба ин гурӯҳ мансубанд.

Воқеан, сатҳи рушд ва нуфузи ҳар як кишвар дар арсаи байналмилалӣ, пеш аз ҳама, ба он вобаста аст, ки ҷавонон то чӣ андоза дорои маърифати сиёсиву фарҳангӣ ва ихтисосу дониши муосир буда, ҳадафу вазифаҳои худро вобаста ба бунёди давлати ҳуқуқбунёд, демократӣ ва дунявӣ дарк менамоянд. Дар Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 22 декабри соли 2016 қайд гардидааст, ки “имрӯзҳо дар тамоми соҳаҳои иқтисоди миллии мамлакат,...ҷавонони бонангу номус содиқона хизмат ва кору фаъолият доранд ва дар рушди иқтисоди миллӣ ҳиссаи назаррас мегузоранд”.

Дар ҳақиқат, иштироки ҷавонон дар рушди соҳаҳои иқтисоди миллии кишвар, тарбияи онҳо дар руҳияи худшиносиву худогоҳӣ, ватандӯстӣ, дарки баланди масъулиятшиносӣ, таҳаммулпазирӣ ва инсондӯстӣ, то андозае қонеъ гардонидани талаботи иҷтимоии онҳо, ҳифзи ҳуқуқ ва таъмини манфиатҳо ва мустақилияти иқтисодии ҷавонон дар ҳаёти рӯзмарраи ин насл хеле муҳим арзёбӣ мегардад.

Дар шароити имрӯзаи ҷаҳонишавӣ ва бархӯрди тамаддунҳо рушди устувори иқтисодиёти миллиро бе иштироки фаъоли ҷавонон тасаввур намудан ғайриимкон мебошад. Дар марҳилаи кунунии тараққиёти Тоҷикистон таваҷҷуҳи рӯзафзун ба соҳаҳои илму маориф, татбиқи васеи дастовардҳои илму техника ва технологияҳои муосир, таъмини робитаи амиқи илму истеҳсолот, риоя ва пос доштани арзишҳои милливу умумибашарӣ, татбиқи босамари нақшаҳои стратегии кишвар равона гардидааст, ки саҳми насли ҷавон дар амалӣ гардидани ин ҳадафҳо калидӣ арзёбӣ мегардад.

Ҷавонону наврасони кишварро зарур аст, ки тамоми нерӯи худро барои андӯхтани донишҳои замонавӣ, интихоби касбу ҳунар, рушди илму технологияҳои навтарин, пешгирӣ аз равандҳои номатлуб ва пос доштани дастовардҳои истиқлолияти Ватани маҳбубамон равона сохта, ҷиҳати татбиқи стратегия ва барномаҳои миллию соҳавӣ ва расидан ба ҳадафу афзалиятҳои стратегии кишвар саҳмгузор бошанд.

ШЕРАЛӢ М., вазири мудофиаи Ҷумҳурии Тоҷикистон:

- Ҷавонон ҳамчун нерӯи бунёдкору созанда ва давомдиҳандаи насли гузашта, имрӯз дар меҳвари таваҷҷуҳи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор гирифтаанд. Ин аз ҳадафҳои стратегии Ҳукумати ҷумҳурӣ дар самти ҷалби ҳарчи бештари ҷавонони дорои донишу тафаккури созанда дар сохтори идораи давлат мебошад. Дар воқеъ, таваҷҷӯҳ нисбат ба ҷавонон аз сиёсати давлатии онҳо дарак дода, имрӯзҳо бо пуштибонӣ аз ин қишри бонуфузи ҷомеа, ки асоси пешрафт ва рушду тараққиёти бахшу соҳаҳои гуногун мебошанд, аз ҷониби роҳбарияти олии мамлакат тадбирҳои амалӣ роҳандозӣ карда мешавад. Соли 2017-ро “Соли ҷавонон” эълон намудани Сарвари давлат низ натиҷаи пайгирӣ аз ин ҳадафҳост. Зеро дар марҳалаи расидан ба сулҳу субот ва то имрӯз ҷавонон бо азму иродаи қавӣ дар баробари насли калонсол дар бунёди давлати ҳуқуқбунёду ҷомеаи мутамаддин ва таҳкими истиқлолияту пойдории Ваҳдати миллӣ саҳми муносиби худро мегузоранд. Онҳо ҳанӯз аз рӯзҳои аввали соҳибихтиёрии кишвар дар бунёди давлати соҳибистиқлол, демократӣ ва ҳуқуқбунёд ба ташаккул ва амалӣ намудани ҳадафҳои бунёдкоронаи кишвар ҳамқадам мебошанд. Масъулияти дифои марзу буми Ватанро то ҳанӯз ҷавонмардони бонангу шуҷои он бар дӯш доранду мамлакати худро аз таҳдидҳои бегона ҳимоя менамоянд. Имрӯзҳо дар сафи Қувваҳои Мусаллаҳ ҳазорҳо ҷавонони матинирода адои хизмати ҳарбӣ карда, дар болоравии иқтидори мудофиавии мамлакат ва суботу оромии ҷомеа саҳми худро мегузоранд. Онҳо дорои донишҳои замонавӣ буда, аз истифодаи силоҳу муҳимоти ҳозиразамони ҷангӣ хуб бохабаранд ва бо масъулияту маҳорати баланди касбӣ пайи дифои ин сарзамин қарор доранд. Фарзандони муҳофизи ватан аз таҷрибаи талхи кишварҳои ҷангзада сабақ гирифта, ҳамчун як узви ҳифзкунандаи амнияту суботи ҷомеаи башарӣ муқобили ақидаҳои иртиҷоиву бегонапарастии нафарони гумроҳанд ва дар ин самт омодаи мубориза ва муҳофизати ҳар як ваҷаб хоки ватани маҳбуб аз бегонагон ва террористону ифротгароён мебошанд, ки дар шароити кунунӣ андухти ин таҷриба ба ҳар як фарди матиниродаву солимақли кишвар басо ҳам зарур аст.