Вақте сухан дар бораи ҷавонон ё худ ҷавонӣ меравад аз нигоҳи аввал зебоӣ, қудрат, тавоноӣ, созандагию бунёдкорӣ, худогоҳӣ, ҳисси баланди миллӣ, ватанпарастӣ пеши назар ҷилвагар мешавад. Аз нигоҳи дуюм бошад, ин гумроҳшавӣ, бадхоҳӣ, нотавонбинӣ, душманӣ бар миллату Ватани худ. Ба ҳамагон маълум аст, ки баъди пош хӯрдани Иттиҳоди Шӯравӣ, маҳз ана ҳамин нигоҳи дуюм буд, ки гумроҳшудагону бадхоҳони миллату давлат солҳои навадум ҷанги шаҳрвандиро сар карданд ва мехостанд давлату миллати тоҷикро нобуд созанд. Хушбахтона, дере нагузашта бар миллати тоҷик нигоҳи аввалин, яъне ҷавони хирадманду оқил, сулҳпарвар, Пешвои муаззами миллат, муҳтарам Эмомалӣ Раҳмон насиб гашт. Маҳз ҳамин қудрату тавоноӣ, созандагию бунёдкорӣ ва сулҳҷӯёнаи ӯ буд, ки Тоҷикистони азизамон аз навбунёдӣ ва наврасӣ ва аз ин ба ҷавонӣ қадам гузошта дар кишварамон сулҳу салоҳ ҳукмфармо гашта, марҳила ба марҳила ободу зебо гашта истодааст.

Таърих гувоҳ аст, ки ба вазъияти муътадил омадани соҳаҳои иқтисодӣ, иҷтимоӣ ва фарҳангии кишвари азизамон ва дар ин раванд бунёди корхонаҳои бузурги саноатӣ, таъмир ва ба истифода додани роҳҳои мошингарди минтақаҳои гуногуни ҷумҳуриамон, бунёди нерӯгоҳҳои обиву барқӣ, хулоса тамоми ҳадафҳои созандаи давлату Ҳукумат баҳри ободии Ватан ва таъмини зиндагии осоиштаи мардуми тоҷик ба даврони ҷавонии мамлакати маҳбубамон рост меояд ва ин иқдомҳои неку созанда идома ёфта истодааст.

Бо иқдоми Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон соли 2017 “Соли ҷавонон” эълон гардид. Ин иқдом аз он шаҳодат медиҳад, ки давлату ҳукумати мамлакат ба ҷавонон эътимоду боварии калон дорад. Месазад, ки ҷавонони бонангу бономуси мо аз тамоми нерӯҳои ҷавонӣ ва боварии Сарвари ғамхору кордон истифода бурда, ҳадафҳои поку созанда ва бунёдкоронаи Пешвои миллатро амалӣ гардонанд.

Ғамхорию ҳадафҳои неки Сарвари давлат буд, ки ҷавонони худогоҳ ҳисси баланди миллии худро нишон дода, имрӯзҳо дар мақомоти ҳифзи ҳуқуқ ва дигар корхонаву ташкилотҳои давлатӣ бо лаёқату кордонӣ вазифаҳои роҳбариро ба уҳда гирифта, баҳри пойдор мондани сулҳу суботи комил, ба амал баровардани адолати судӣ ба миллату давлати хеш фаъолияти пурсамар карда истодаанд.

Саидзода МУҲАММАДКАРИМ, сардори шуъбаи умумии Суди иқтисодии вилояти Хатлон