Дар маҷлисгоҳи Мақомоти иҷроияи ҳокимияти давлатии шаҳри Хуҷанд ҷиҳати ташаккули тарзи ҳаёти солими ҷавонон, пешгирии бемориҳои хавфнок, аз қабили вируси норасоии масунияти одам, нашъамандӣ ва бемориҳои сироятии ҷинсӣ байни наврасону ҷавонон таҳти унвони “Ҷавонон – ҷонибдори тарзи ҳаёти солим!” семинар-машварат доир шуд.

Ин нишаст бахшида ба Рӯзи байналмилалии мубориза бо вируси норасоии масунияти одам гузаронида шуда, дар он беш 40 нафар ҷавонони фаъол, волонтёрон, гирандагони Стипендияҳои президентӣ ва раиси шаҳр иштирок намуданд. 

Зимни суханрониҳо таъкид гардид, ки дар ҷаҳон беш аз 42 миллион нафар мубталои ВНМО мебошад, ки ин рақам ҳар рӯз аз 14 то 15 ҳазор зиёд шуда истодааст. Аксарияти одамони гирифтори ВНМО ҷавонони синни то 30-сола мебошанд. Дар давоми 25 соли охир БПНМ (СПИД) боиси марги 25 миллион нафар шудааст.

Бо таассуф зикр шуд, ки аввалин нафари гирифтор ба ин намуди беморӣ дар Тоҷикистон соли 1991 ба қайд гирифта шуд ва имрӯз ҳеҷ кишваре ё ҷамъияте нест, ки аз ВМНО/БПНМ дар амон монда бошад. Гарчанде пайдоиши ВНМО дар Тоҷикистон соли 1991 ба қайд гирифта шуда бошад ҳам, вале ин маризӣ ё худ ин вабои замон дар ин муддати на чандон тулонӣ, яъне то ба имрӯз садҳо нафарро сироят намудаву даҳҳо нафарро қурбон сохтааст. Аз ин рӯ, ҷавононро лозим аст, ки роҳи дурусту солимро интихоб намоянду ҳаёти худро дар хатар нагузоранд.

Шодмон Нурматов, “ҶТ”