Ба ҳамагон маълум аст, ки 9-уми сентябри соли 1991 дар харитаи сиёсии ҷаҳон давлати соҳибистиқлоле бо номи Тоҷикистон сабт гардид ва мардуми кӯҳандиёр ва соҳибтамаддуну бостонии тоҷик ба арсаи сиёсӣ баргашта, ҳаққи аздастдода ва поймолшудаи хешро соҳиб шуд. Аз ин рӯ, дар рӯзгори ақвом ва табақаҳои мухталифи ҷомеаи кишвари мо таҳаввулоти бузург ба вуқуъ пайваст. Ҷумҳурии Тоҷикистон дар баробари ба даст овардани истиқлолияти хеш зарурати ногузири ташаккул ва амалӣ намудани сиёсати давлатии ҷавононро пазируфт, зеро такя бар нерӯи ҷавонон дар ҳама давру замон яке аз рукнҳои аслии пешрафти ҷомеаҳо будаасту хоҳад буд. Ба ҳамин тартиб, дар кору пайкори қишри аз ҳама нерӯмандтарини ҷомеа, яъне ҷавонон тағйироти куллие ба вуҷуд омад ва ин дигаргунӣ, хушбахтона, тавонист, ки дар пешрафт ва рушди ҷомеъа заминаҳои хуби ташкилӣ, ҳуқуқӣ ва амалиро ба бор орад.

Натиҷаи дастгириву ғамхорҳои пайваста давлат ва Ҳукумати Ҷумҳурии Тоҷикистон, хоса иқдомоти наҷиби Пешвои миллат, муҳтарам Эмомалӣ Раҳмон имкон дод, ки дар самти корҳои илмӣ- тадқиқотӣ, ихтирооту навовариҳо ҷавонони кишвар дар даврони истиқлолият ба як қатор дастовардҳои назаррас ноил гардида, маҳсули фикриву ақлии хешро ба унвони падидаҳои нодир дар қаламрави мамлакат ва берун аз он муаррифӣ намоянд. Дифои пайвастаи рисолаҳои докториву номзадӣ аз рӯи ихтисосҳои мухталиф аз ҷониби олимон ва муҳаққиқони ҷавон, афзудани сафи адибони ҷавон, баргузории конфронсҳои адибони ҷавон, ҳамоишҳои илмии олимон ва муҳаққиқони ҷавон ва дар ин замина нашри рисолаҳои илмии онҳо имконият фароҳам овард, ки мақоми ҷавонон дар рушди илму маорифи кишвар боз ҳам муассир гардида, ҷавонони донишвару андешапарвари мо барои боло бурдани ҷойгоҳи илми тоҷик саҳми муносибе гузоштанд. Ба таҳсил фаро гирифтани бештар аз 30 ҳазор ҷавони тоҷик дар донишгоҳҳои олии бонуфузи мамлакатҳои хориҷӣ аз он дарак медиҳад, ки Пешвои миллат аз ҳисоби квотаҳои президентӣ хостори он ҳастанд, ки имрӯз ҷавонони тоҷик бояд ҳамчун мутахассисони ҷавобгӯ ба ниёзҳои ҷаҳони муосир тарбия ёфта, барои хидмат ба Ватани азизи хеш ҳамчун мутахассисони болаёқат омода бошанд.

Кишвари мо имрӯз аз лиҳози демографӣ дар ҳоли рушд қарор дорад ва қисми зиёди онро ҷавонон ташкил медиҳанд. Бе иштироки фаъолонаи ин қувваи бузург рушди бахши соҳаҳои иқтисодӣ, иҷтимоӣ ва фарҳангӣ ғайриимкон аст. Аз ин рӯст, ки Тоҷикистонро кишвари ҷавонон ном мебаранд ва аз рӯи ҳисобҳои оморӣ беш аз 70 дарсади аҳолии мамлакатро ҷавонон ташкил медиҳанд. Бо назардошти шинохти ҳамин воқеияти демографӣ ва такя бар нерӯи пешбарандаи ҷавонон буд, ки соли гузашта муҳимтарин тағйирот ба Конститутсия ворид гардид ва интихоб шудан ба мақомҳои баланди мансабии давлатӣ ба синни 30-солагӣ поин оварда шуд. Қабули ин тағйирот бори дигар имконият фароҳам овард, ки ҷавонон аз ҳуқуқҳои боз ҳам бартаре аз арсаи сиёсати давлатӣ бархурдор шаванд ва Пешвои миллат бо такя бар ҳамин ҳуқуқҳои конститутсионии ҷавонон дар амри ҷавон намудани синну соли намояндагони мақомоти иҷроияи давлатӣ иқдомоти назаррасе ба сомон расонида истодаанд.

Дар Паёми навбатӣ Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон бо назардошти мавқеи фаъоли ҷавонон дар рушди Тоҷикистони азиз соли 2017-ро “Соли ҷавонон” эълон намуданд. Ин тадбири муҳим низ яке аз нишондодҳои барҷастаи таваҷҷуҳи амиқи Пешвои миллат дар самти татбиқи сиёсати давлатии ҷавонон ва дастгирии бевоситаи ташаббусҳои насли фардосози миллат ба шумор меравад. Бо такя бар ҳамин тадбири наҷиб дар давоми соли 2017 аллакай иқдомоти фаровоне барои дастгирии ҷавонон аз сар гирифта шуда, шумораи зиёде аз онҳо барои хидмат дар ниҳодҳои мухталифи ҳокимияти давлатӣ, мақомоти қудратӣ ҷалб карда шуданд. Баробари ин, дар саросари мамлакат маҷмӯи чорабиниҳои муҳими маърифативу фарҳангӣ, сиёсиву иҷтимоӣ баргузор мегарданд, ки ҳамагӣ ба хотири баланд бардоштани руҳияи ҷавони мамлакат, дастгирии маънавиву моддии онҳо ва бароварда гардонидани ниёзҳои мухталифи ин насли фардосоз ба шумор меравад.

Мо боварии комил дорем, ки ҷавонони мо, пеш аз ҳама, бо камоли садоқат ва ихлоси хеш барои расидан ба ҳадафу ормонҳои наҷиби худ, ки дар сархати онҳо бунёди фардои шукуфои Тоҷикистони азиз қарор дорад, содиқона хидмат намуда, бо самимияту азми қавӣ ба сӯи музаффариятҳои нав ба нав қадамҳои устувор хоҳанд гузошт.

Аминҷон АБДУЛЛОЕВ, донишҷӯи ДИД назди Президенти ҶТ