Субҳи 12 июни соли ҷорӣ мулоқоти раиси Кумитаи кор бо ҷавонон ва варзиши назди Ҳукумати ҷумҳурӣ Аҳтам Абдуллозода бо ҷавонону занон ва аҳли ҷамоъатчигии Баҳористони ҷамоати деҳоти Сешанбеи шаҳри Турсунзода дар доираи Соли ҷавонон ва 20-солагии Рӯзи Ваҳдати миллӣ доир гардид.

Аҳтам Абдуллозода зимни суханронии хеш ҷавононро ба эълон гардидани соли 2017 – “Соли ҷавонон” ва 20-солагии Рӯзи Ваҳдати миллӣ табрик намуд. Раиси Кумита иброз дошт, ки: “Барои хотирмон мондани “Соли ҷавонон” ҳамчун соли таърихӣ тамоми тадбирҳо андешида шудааст. Аз ин рӯ ҷавонон бояд ҷавобан ба ин ҳама ғамхории наҷиби Пешвои муаззами миллат дар пайи аз худ намудани донишҳои нав ва соҳиби касбу ҳунар бошанду дар тамоми чорабиниҳои ҷамъиятию сиёсӣ фаъолона иштирок ва саҳмгузор бошанд”.

Дар рафти мулоқот раиси Кумита 27 июнро ҳамчун як санаи таърихию хотирмон бо назардошти ба ҳам омадани тарафҳои даргир бо мақсади хотима додани низоҳо ва мутаҳид сохтани миллати ҷафокашидаю ранҷдида баҳри таъмини зиндагии арзанда барои ҳар як шаҳрванд арзёби намуд: – Ваҳдати миллӣ яке аз ҷашнҳои бузург ва таърихии миллатамон ба ҳисоб меравад. Он барои мо нишони барҷастаи пойдории давлат, бақои симои миллат, рамзи асолату ҳувият, мазҳари идеалу ормонҳои таърихӣ, шиносномаи байналмилалӣ ва ба ҷаҳони мутамаддин пайвастани кишвари азизамон маҳсуб меёбад. Ҷавонон бояд дар пос доштан ва арҷ гузоштани ин неъмати бузург ҳамеша саъю талош намоянд,- гуфт раиси Кумита.