Дар идомаи силсиламулоқотҳои масъулини Кумитаи кор бо ҷавонон ва варзиши назди Ҳукумати ҷумҳурӣ бахшида ба “Соли ҷавонон” дар қисмҳои ҳарбии шаҳри Душанбе, мулоқоти навбатӣ дар маркази таълимии “Тоҷмаҳал”-и қисми ҳарбии 09001 Донишкадаи ҳарбии Вазорати мудофиаи кишвар доир гардид.

Амир Иброҳимов, мутахассиси пешбари Раёсати кор бо ҷавонони Кутимаи кор бо ҷавонон ва варзиш, зимни баромади хеш роҷеъ ба фаъолияти ҷавонон дар рушди инкишофи соҳаҳои гуногуни хоҷагии халқи мамлакат суханронӣ намуда афзуд, ки имрӯз ҷавонони мо метавонанд, ки дар беҳтарин донишгоҳҳои хориҷӣ рафта касбу ҳунар омӯхта, дар оянда ҳамон донишҳои андӯхтаашонро дар кишвари хеш амалан татбиқ намоянду баҳри пешрафти ин меҳан саҳмгузор бошанд. Пас, ҷавонони имрӯза бояд омӯзанду таҳкимбахши сулҳу субот ва дастовардҳои кишвар бошанд.

Дар рафти мулоқот ҳамчунин доир ба масъалаҳои фарҳанги либоспӯшӣ, танзими анъана ва ҷашну маросимҳои миллӣ ва гаравидани баъзе ҷавонон ба гурӯҳҳои ифротӣ ибрози назар карда шуд.

Ёдовар мешавем, ки Кумитаи кор бо ҷавонон ва варзиши назди Ҳукумати кишвар дар доираи “Соли ҷавонон” ва иҷроиши босифати нақшачорабиниҳои муштарак барои ошноӣ пайдо намудан бо ҳаёти сарбозон силсилаи мулоқоту вохӯриҳоро вобаста ба баланд бардоштани ҳисси ватандӯстӣ, худшиносиву худогоҳӣ, нигаҳдошт ва ҳифзи марзу буми кишвар давоми моҳҳои июл, август ва сентябри соли ҷорӣ дар тамоми қисмҳои ҳарбии шаҳри Душанбе ба роҳ мондааст.

Беҳрӯз ХОЛМУРОДОВ, “ҶТ”