Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, 27 феврал, дар Донишгоҳи техникии Тоҷикистон ба номи М. Осимӣ миёни намояндагони сохторҳои мухталифи дар самти ҷавонон кору фаъолиятдошта ва донишҷӯёни ин донишгоҳ вохӯрӣ баргузор гардид.

Қабл аз оғози суҳбат аксия баргузор карда шуд, ки дар он аз ҷониби кормандини КҶВ ба донишҷӯён варақаҳои таблиғотӣ доир ба пешгирии бемориҳои сироятӣ тақсим карда шуд.

Дар вохӯрӣ намояндагон аз Кумитаи кор бо ҷавонон ва варзиш, Кумитаи кор бо занон ва оила, Агентии назорати маводи нашъаовари назди Президент, Вазорати тандурустӣ, Вазорати корҳои дохилӣ ва раёсати Донишгоҳ иштирок ва суханронӣ намуданд.

Дадабойзода Ҳотам, муовини аввали сардори раёсати корҳои дохилии шаҳри Душанбе, зимни суханронии хеш иброз дошт, ки “Ҷавонон қувваи асосӣ ва таҳрик диҳандаи ҷомеа маҳсуб мегарданд. Аз ин рӯ кормандони тамоми сохторҳои давлативу ғайри давлатиро мебояд дар тарбия ва ба роҳи рост ҳидоят кардани ҷавонон бетараф набошанд. Агар як нафар ҷавон ба роҳи каҷ меравад, мо масъулини тамоми соҳаҳои кор бо ҷавонон дар баробари онон бояд ҷавоб диҳем”.

Дар идома вобаста ба дигар паҳлуҳои ҳаёти ҷавонон, баланд бардоштани зиракии сиёсии ҷавонон, солимии репродуктивӣ миёни эшон ва баланд бардоштани ҳисси худшиносиву меҳанпарастии ин қишри ояндасози ҷомеа суханронӣ ва суолу ҷавоб сурат гирифт.