Дар доираи Фестивали байналмилалии ҷавонон ва донишҷӯёни давлатҳои СҲШ ва ИДМ таҳти унвони “Тоҷикистон ва роҳи абрешим: таърих ва замони муосир”, 29 август, иштирокчиён баъди дидан намудан аз мавзеъҳои таърихию сайёҳии шаҳри Душанбе ба вилояти Суғд сафар намуданд.

Меҳмононро ҷавонон ва сокинони ноҳияи Айнӣ бо самимияти хос ва меҳмоннавозии тоҷикона пешвоз гирифта, ба истиқболи онҳо дастурхони идона оростанд.

Ҷавонони шаҳри Истаравшан низ бо карнаю сурнай ба истиқболи ҳамтоёни хориҷии худ баромада, ба хотири ташрифи онҳо барномаи консертӣ пешниҳод карданд. Баъди рақсу сурудхонӣ иштирокчиён аз мавзеъҳои таърихию сайёҳӣ ва аз намоиши ҳунарҳои дастии мардуми Истаравшани бостонӣ дидан намуданд.

Махсусан тамошои Маҷмааи таърихию фарҳангии “Қалъаи Муғ”, ки ба наздикӣ бо ташаббуси бевоситаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон бо нишони қадршиносию аҷргузорӣ ба таъриху фарҳанги бою қадимаи мардуми тоҷик азнавсозӣ карда шуд, ба меҳмонон хотироту бардоштҳои зиёд ҳадя намуд.

Азиз Юлдошов, намояндаи Ҷумҳурии Ӯзбекистон аз таассуроти якрӯзаи худ ба мо чунин қисса кард:

-Бисёр шодам ва миннатдории худро бо ташкилкунандагони фестивал мерасонам. Фестивал имрӯз сафи дӯстони маро зиёд намуд. Дар Тоҷикистон баргузор гаштани он бароям басо рамзист, зеро мо як халқему як фарҳанг дорем. Дар ин ҷо худро бегона ҳис намекунам. Баъди кушода шудани сарҳадҳо нияти ба Тоҷикистон ташриф оварданро доштам, фестивал сабаб шуду имрӯз ман дар Тоҷикистонам ва аз меҳмонавозии тоҷикона баҳравар гаштаистодаам. Тоҷикистонро аз шунидаам ободу зебо дарёфтам ва ин омаду рафти мо минбаъд низ идома меёбад. Зинда бод дӯстии халқҳо.

“Маротибаи аввал аст, ки вориди Тоҷикистон шудам. Аз ин пеш дар бораи меҳмонавозии мардуми тоҷик шунида будам ва имрӯз фестивали мазкур сабаб шуду аз меҳмонавозии гарми тоҷикона баҳравар шудам. Дар нахустин рӯзи сайёҳат на танҳо меҳрубонии иштирокчиён, балки самимияти сокинонро эҳсос намудам. Мавзеъҳои таърихие, ки мо аз он дидан намудем, гувоҳӣ қадима будани миллати тоҷик мебошад. Ман дар аввалин рӯзи Фестивал Тоҷикистонро дӯст доштам”, - иброз дошт иштирокчии дигари фестивал аз давлати Қазоқистон Таалайбек Даирбеков.

Иштирокчиён рӯзи аввали Фестивалро бо роқсу суруд миёни сокинони шаҳри Гулистони вилояти Суғд ҷамъбаст намуданд. Конфронсу чорабиниҳои дигар дар доираи Фестивали байналмилалии ҷавонон ва донишӯёни давлатҳои СҲШ ва ИДМ таҳти унвони “Тоҷикистон ва роҳи абрешим: таърих ва замони муосир” идома доранд ва аз ҷараёни он дар гузоришҳои оянда иттилоъ хоҳем дод.