ҶАВОНОН
Шанбе 25 Май 2024 11:40
8027
Аз рӯзҳои нахустини соҳибистиқлолӣ, махсусан пас аз барқарор намудани ҳокимияти конститутсионӣ Ҳукумати Тоҷикистон масъалаи ҷавононро дар радифи дигар соҳаҳои муҳим дар меҳвари сиёсати давлатии худ қарор дода, пеш аз ҳама таҳкурсии ҳуқуқӣ ва пояҳои сохтории онро таъсис ва таҳким намуданд. Дар асоси сиёсати оқилона ва дурандешонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати ҳалли мушкилоти ин қишри бонуфузи ҷомеа ва сафарбар намудани неруи бузурги он баҳри ободу пешрафта намудани Тоҷикистони азиз стратегияю консепсияҳои миллии сиёсати давлатии ҷавонон ва чандин барномаву нақшаҳо дар сатҳи ҳукумат таҳияву қабул гардида, бобати амалӣ намудани онҳо зарфиятҳои калон равона гардиданд.

Роҳбари давлати Тоҷикистон дар тамоми паёмҳо ба Маҷлиси Олӣ ва мулоқоту суханрониҳои марбута аз сиёсати ҷавонон сухан гуфта, бобати фароҳам овардани шароити таҳсилу меҳнат, эҷоду истироҳат ва варзишу ҷалби ҳарчи бештари онҳо ба корҳои давлатию соҳибкорӣ дастуру ҳидоятҳои муфид медиҳанд. Маҳз даъвати “Рӯ овардан ба ҷавонон” – ро Пешвои миллат ба миён гузошта, бо мақсади бештару беҳтар ба таҳсил фаро гирифтани насли наврас, махсусан, ба ҷавонони манотиқи кӯҳистон Квотаи президентӣ таъсис ёфта, барои ҷавонони лаёқатманд дар мавриди таҳсил дар хориҷи кишвар стипендияи “Дурахшандагон” пешниҳод гардид...
Дар радифи тарбияи маънавӣ ҳамчунин бобати солимии ҷисмонии ҷавонон ва тавассути ин тарбияи насли нави варзишгарон, ки дар сатҳи байналмилалӣ тавони майдондорӣ дошта бошанд, имкониятҳои калон муҳайё карда мешаванд. Бунёди ҳазорҳо иншооти варзишӣ, ташкили макотиби соҳавӣ, ташкили ҷамъияту федератсияҳо, баргузории мусобиқаҳои гуногуни дохиливу байналмилалӣ ва дигар тадбирҳо ба натиҷаҳои назаррас оварда расонданд. Хеле хуб аст, ки имрӯз бо шарофати варзишгарони тоҷик дар чемпионатҳо ва олимпиадаҳои ҷаҳонӣ парчами Ватани маҳбубамон парафшон ва Суруди миллиамон танинандоз мегарданд.
Дар қатори дигар манотиқи кишвар сиёсати давлатии ҷавонон дар Вилояти Мухтори Кӯҳистони Бадахшон дар тӯли 30 соли истиқлол таҳти таваҷҷуҳи бевоситаи Пешвои миллат қарор дошта, бо кумаку дастгириҳои бевоситаи Роҳбари давлат чандин иншооти соҳавӣ дар шаҳру навоҳии вилоят сохта ба истифода дода шуданд. Аз бунбасти коммуникатсионӣ раҳо намудани вилоят ба қишри ҷавон ҳам имконият фароҳам овард, ки бобати рушди соҳаи соҳибкорӣ лоиҳаҳои зиёдро амалӣ намоянд. Нисфи зиёди соҳибкорони муваффақи вилоятро имрӯз ҷавонон ташкил дода, дар соҳаи хизмати давлатӣ ва мақомоти намояндагӣ дар аксарияти вазифаҳо кадрҳои ҷавон фаъолият менамоянд.

Бо қаноатмандӣ бояд тазаккур дод, ки Бадахшон бештари маврид бо захираи зеҳнии худ шуҳратёр аст ва имрӯз ҳам ин зарфият, бахусус дар байни ҷавонон теъдоди зиёдро ташкил медиҳад. Дар Донишгоҳи давлатии Хоруғ ба номи М. Назаршоев, Институти илмҳои гуманитарии Академияи миллии илмҳои Тоҷикистон ба номи академик Б. Искандаров, Институти илмҳои биологии “Помир” ба номи академик Х. Юсуфбеков аксарияти омӯзгорону кормандони илмӣ, ҳайати олимону пажӯҳишгаронро насли ҷавон ташкил медиҳад. Боиси хурсандии мост, ки дар Донишгоҳи Осиёи Марказӣ низ олимону муаллимони ҷавони тоҷик ба донишҷӯёни хориҷию ватанӣ таълим медиҳанд. Бештари мутахассисони ташкилотҳои байналмилалии мустақар дар вилоят аз ҳисоби хатмкардагони донишгоҳҳои ватанӣ мебошанд.

Дар соҳаи маориф ва тандурустӣ замони соҳибистиқлолӣ садҳо иншооти нав сохта ба истифода дода шуданд ва имрӯз онҳо дар хизмати ҷомеа, аз он ҷумла, насли ҷавони вилоят қарор доранд. Бо кушода гардидани муассисаҳои шакли нави таълимӣ, аз ҷумлаи муассисаи давлатии Мактаби президентӣ барои хонандагони болаёқат, Литсейи Оғохон ва Коллеҷи тиббӣ дар шаҳри Хоруғ, Мактаб - интернати ҷумҳуриявӣ, Литсейи касбӣ – техникӣ барои ашхоси имконияти маҳдуддошта дар ноҳияи Рӯшон, Литсейи касбӣ – техникӣ дар ноҳияи Шуғнон ва даҳҳо муассисаи дигари соҳавӣ шаҳодат аз он медиҳад, ки чӣ қадар дар замони соҳибистиқлолии кишвар соҳаи маориф, ки маҳз ба самти ҷавонон нигаронида шудааст, рушду нумӯъ намуд. Ҳамасола зиёда аз 80 фисади хатмкунандагон тавассути Маркази миллии тестӣ ба донишгоҳу донишкадаҳо дохил мегарданд, ки ин нишондиҳандаи беҳтарин дар кишвар маҳсуб меёбад. Танҳо соли ҷорӣ толибилмони вилоят дар олимпиадаи ҷумҳуриявӣ байни синфҳои 11 понздаҳ медал ба даст оварданд, ки панҷтои он тилло мебошад. Ғолибияти шогирдони макотиби вилоят дар озмунҳои “Фурӯғи субҳи доноӣ...” ва “Тоҷикистон - Ватани азизи ман” баръало нишон дод, ки ҷавонони вилоят дар қатори ҳамватанони дигари худ аз роҳнамоиҳои Пешвои муаззами худ баҳравар гардида, кӯшиш менамоянд, баҳри гулгулшукуфоии Тоҷикистони азиз саҳмгузор бошанд.

Ба воситаи Квотаи президентӣ садҳо ҷавон имконият пайдо намуд, ки соҳибилму соҳибихтисос гардад. Махсусан, дар соҳаи тиб мутахассисони зиёд аз ҳисоби ҷавонон макотиби олии соҳавиро хатм ва ба зодгоҳи худ баргаштанд.

Бо мақсади дастгирии оилаҳои ҷавон қарори Ҳукумати Тоҷикистон “Дар бораи муқаррар намудани имтиёзҳо ба омӯзгорони ҷавон” қабул гардид, ки даҳҳо оилаи ҷавон бо қитъаҳои замин таъмин ва аз маблағҳои қарзии имтиёзнок истифода бурданд.

Барои обутоби бадан ва ба машғулиятҳои варзишӣ ҳарчи бештар ҷалб намудани насли наврас ва ҷавони вилоят бо дастгирии Ҳукумати Тоҷикистон дар ҳудуди вилоят, дар маҷмӯъ 373 адад иншооти варзишӣ сохта ба истифода дода шуд. Айни ҳол як маҷмааи варзишӣ дар шаҳри Хоруғ, 70 толори варзишӣ, 288 майдончаи одии варзишӣ, 12 варзишгоҳ, 3 қасри варзишии “Вастан” дар ноҳияҳои Дарвоз, Ванҷ, Рушон дар ихтиёри ҷавонон қарор доранд. Дар вилоят 10 мактаби варзишӣ бо фарогирии 3674 нафар варзишгар, аз ҷумла 678 духтар фаъолият карда истодааст.

Танҳо дар ду соли охир варзишгарони вилоят дар мусобиқаҳои ҷумҳуриявӣ ва чемпионатҳо иштирок намуда, сазовори 187 медал гардиданд, ки аз инҳо 35 медали тилло, 62 медали нуқра ва 90 медали биринҷӣ мебошанд. Ҳамчунин, варзишгарони мо дар чанд мусобиқаи байналмилалӣ низ муваффақона иштирок намуданд. Аз теъдоди умумии иштироккунандагон наздик ба сад нафарро варзишгардухтарон ташкил медиҳанд.

Аз ҷониби мақомоти ҳокимияти давлатӣ бобати баланд бардоштани сатҳи дониш ва савияи корию тахассусии кадрҳои ҷавон пайваста курсу семинарҳо доир мегардад.

Ҷавонони вилоят сиёсати пешгирифтаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро хуб дарк намуда, дар маъракаҳои муҳими сиёсӣ фаъолона иштирок менамоянд. Интихобот ба Маҷлиси намояндагон ва маҷлисҳои маҳаллии вакилони халқ нишон дод, ки қишри ҷавони ҷомеа бо истифода аз ҳуқуқҳои конститутсионии худ сарҷамъона дар ташкил ва дар сатҳи баланди сиёсӣ баргузор намудани онҳо иштироки фаъол намуда, теъдоди зиёди онҳо мандати вакили мардумиро дар маҷлисҳои вакилони халқи ҷамоати шаҳраку деҳот, шаҳру ноҳия ва вилоят ба даст оварданд.
Сафарҳои кории Президенти Ҷумҳурии Тоҷикистон ба вилоят ҳамеша навоварӣ ва дигаргуниҳои ҷиддиро дар хоҷагии халқи вилоят дар пай доранд. Соли гузашта низ, новобаста аз вазъи эпидемиологӣ, ки дар заминаи паҳншавии бемории КОВИД - 19 ба вуқӯъ омад, мардуми вилоят ва махсусан ҷавонон бо руҳияи баланд Пешвои миллат муҳтарам Эмомалӣ Раҳмонро пешвоз гирифтанд. Дар доираи ин сафар наздик ба 50 иншоот ба истифода дода шуда, дар пойдевори сохтмони инфрасохтори дигари муҳим санги асос гузошта шуд. Бештари ин иншоот хусусияти иҷтимоӣ дошта, маҳз барои насли наврасу ҷавон пешбинӣ гардидаанд.
Дар Паёми имсола ба Маҷлиси Олии Ҷумҳурии Тоҷикистон Ҷаноби Олӣ Эмомалӣ Раҳмон бори дигар ба соҳаи кор бо ҷавонон таваҷҷуҳ зоҳир намуда, барои дастгирии самимона барои ин неруи бузурги созанда изҳори сипос намуданд, ки дар радифи ҳаммиллатону ҳамватанони дигари худ ҷавонони Бадахшон онро чун нишонаи олии қадрдонии шоиста аз фаъолият ва ҷонибдории сиёсати роҳбарияти олии кишвар қабул намуданд. Дар ҷавоб ба чунин қадрдониҳо ва дастгирию мусоидатҳо бори панҷум аст, ки родмардони ҷавони вилоят дар рӯзи нахустини даъват ба сафи Қувваҳои Мусаллаҳи Ҷумҳурии Тоҷикистон нақшаро сарбаландона иҷро намуда, бо хоҳиши худ ва иродаи қавӣ ба хизмати Ватан - Модар мераванд.

Дар вилоят ташкилотҳои ҷамъиятии “Пайравони Пешвои миллат” ва “Созандагони Ватан” фаъолияти густурда дошта, ҷавонон дар аксари маъракаҳои ободонию таблиғотӣ ба симмати волонтёр ё аз тариқи хизмати ифтихорӣ иштирок намуда, дар ташкил ва баргузор намудани маъракаю чорабиниҳо дастёри мақомоти маҳаллӣ буда, ба шахсони ниёзманд ҳамеша дасти ёрӣ дароз менамоянд.

Соли 2020 бо дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии ВМКБ дар ҳудуди вилоят бо иштироки ҷавонон ба намояндагӣ аз шаҳру ноҳияҳо Фестивали минтақавии дӯстии ҷавонони вилоят дар самти тарбияи ватандӯстиву ватанпарастӣ баргузор гардид.

Ҷавонон аз иншооти азим, ки бо ташаббуси Президенти Ҷумҳурии Тоҷикистон муҳтарам Эмомалӣ Раҳмон бунёд гардиданд, дидан намуданд. Инчунин, дар доираи сафар ҷавонон аз қисмҳои низомӣ дидан карда, дар вохӯриҳо бори дигар садоқати худро ба Модар - Ватан баён намуда, ба сарбозони қисмҳои низомӣ лавозимоти варзишӣ тақдим намуданд.

Ҳодисаҳои солҳои охири дар ҷаҳону минтақа рухдода ва шиддат гирифтани авзои сиёсии ҷаҳон моро водор месозад, ки таваҷҷуҳи худро ба соҳаи кор бо ҷавонон боз ҳам зиёдтар намуда, баҳри роҳандозии стратегияю консепсия ва барномаю нақшаҳои қабулгардида дар ин самт тадбирҳои дучанд андешем. Имрӯз дар ин ҷода дар ҳудуди вилоят даҳҳо иншоот бунёд гардида, барои муҳайё сохтани шароит ва имконияти беҳтару васеътар барои ҷавонони вилоят чи дар доираи фаъолияти зеҳнӣ, эҷодӣ, ихтироъкорӣ, соҳибкорӣ ва чи варзишӣ чораҳои мушаххас андешида шуда истодаанд.

Президенти мамлакат дар яке аз мулоқотҳои хеш бо ҷавонони кишвар зикр намуда буданд, ки: “Истиқлолияти давлатӣ ҳамон вақт устувору пойдор мегардад, ки ҳар як фарди ҷомеа ба қадри он расад ва ҳамчун дастоварди бузурги таърихӣ ҳифз намуда, озодиву соҳибихтиёриро асоси хушбахтии худ ва наслҳои ояндаи миллат шуморад.” Бегумон, ҷавонони мо имрӯз ба дарки моҳияти ин суханони Пешвои муаззами миллат ба хубӣ расида, омодаанд, бо тамоми неру аз дастовардҳои Истиқлолият, арзишҳои волои миллӣ, номусу шараф ва хоки муқаддаси Ватани азиз дифоъ намоянд. Мо ба ирода, ҷасорату ватанпарастӣ ва миллатдӯстии ҷавонони сарбаланду боғурури худамон боварии комил дорем.

Ёдгор ФАЙЗОВ, раиси ВМКБ

Эзоҳи худро нависед



Рамзҳо дар расм