ҶАВОНОН
Ҷумъа 20 Сентябр 2019 09:40
3620
Имрӯз дар ҷомеа кам ҷавононе ёфт мешаванд, ки барои расидан ба ҳадафи худ то охир кӯшиш намоянд. Бисёре аз онҳо вақте ба мушкилие рӯ ба рӯ мешаванд, дигар аз ҳадафашон даст мекашанд. Дар зимн мо дар бораи ҷавоне қисса хоҳем кард, ки бо тамоми нерӯву қувваташ бар замми мушкилоти зиёд ба ҳадафаш расидааст. Воқеан ҳам чунин ҷавонон боиси дастгирӣ ва намунаи ибрати дигаронанд. Ин ҷавони муваффақ Абдухолиқ Каҷкулоев мебошад.

Абдухолиқ 8-уми марти соли 1989 дар деҳаи Сарёзии шаҳри Кӯлоб, дар хонадони ронанда таваллуд шудааст. Пас аз хатми мактаби миёна соли 2006 ба шуъбаи менеҷменти факултаи иқтисодии Донишгоҳи давлатии Кӯлоб ба номи Абӯабдуллоҳи Рӯдакӣ дохил шуда, онро бо пешаи иқтисодчӣ-менеҷер бо муваффақият хатм намудааст. Ӯ фаъолияти худро ба ҳайси ассистенти кафедраи менеҷмент ва маркетинг дар соли 2011 оғоз карда, то соли 2013 онро идома додааст. Ӯ инчунин, чун ҷонишини декан оид ба корҳои таълимии факултети иқтисодӣ (2011-2012) кор карда, солҳои 2013-2016 дар аспирантура дар шуъбаи рӯзонаи кафедраи менеҷмент ва маркетинги Донишгоҳи миллии Тоҷикистон таҳсил намудааст. Аз соли 2016 то инҷониб саромӯзгор, мудири кафедраи иқтисоди корхонаҳо ва соҳибкории Донишгоҳи давлатии Кӯлоб ба номи Абӯабдуллоҳи Рӯдакӣ буда, муаллифи 16 мақолаи илмӣ-соҳавӣ мебошад.

Абдухолиқ 3-юми июни соли ҷорӣ рисолаи номзадиашро дар мавзӯи “Ҷанбаҳои минтақавии баландбардории самаранокии шаклҳои соҳибкории хурду миёна дар минтақа (дар мисоли вилояти Хатлон)” зери роҳбарии профессори кафедраи иқтисоди корхонаҳо ва соҳибкории Донишгоҳи миллии Тоҷикистон Туҳфамоҳ Низомова аз рӯи ихтисоси иқтисодиёт ва идоракунии хоҷагии халқ (иқтисодиёти минтақа; иқтисодиёти соҳибкорӣ) бо муваффақият дифоъ намуд.

Муҳимияти мавзӯи тадқиқотии Абдухолиқ самаранок истифода бурдани омилҳои моддӣ ва ғайримоддии рушди иқтисоди миллӣ, аз бисёр ҷиҳат тавассути ҷалби иқтидори захиравӣ-табиии минтақаҳои мамлакат ба ҷараёни истеҳсолот муайян карда мешавад. Дар Стратегияи миллии рушди Ҷумҳурии Тоҷикистон дар давраи то соли 2030 қайд карда шудааст, ки “…Рушди минтақаҳои мамлакат муҳимтарин қисмати амалӣ намудани ислоҳоти иқтисодӣ ва ҳамчун нуқтаи охири амалӣ намудани кӯшишҳои ҳукумат дар самти расидан ба ҳадафҳои муҳим: таъмини амнияти озуқаворӣ ва энергетикӣ, баромадан аз бунбасти коммуникатсионӣ ва таъмини аҳолӣ ба ҷои кори сердаромад, ба шумор меравад”. Навгонии илмии тадқиқотии Абдухолиқ ҳам инкишофи қавоиди назариявӣ-методологии ташаккул ва рушди соҳибкорӣ дар минтақаҳоро дар бар мегирад. Инчунин, аз кор карда баромадани тавсияҳои методӣ ва амалӣ оид ба баланд бардоштани самаранокии иҷтимоӣ-иқтисодии фаъолияти ташкилотҳои соҳибкории хурду миёна дар минтақа, бодарназардошти беҳтарсозии ҷойгиркунонӣ ва кӯмакҳои суроғавӣ ба онҳо иборат аст. Ва боиси хушнудист, ки тавсияҳои илмии тадқиқотчӣ аз ҷониби Сарраёсати кишоварзии вилояти Хатлон қабул карда шуда, дар оянда баҳри рушди иқтисодиёти вилоят, аз он ҷумла баландбардории самаранокии соҳибкории хурду миёна дар минтақа истифода хоҳанд шуд.

Мо ба муҳаққиқи ҷавон, ки бо кӯшишу талоши пайваста азми ба қуллаи баланди илм расидан дорад, комёбиву саломатӣ таманно дорем. Бошад, ки Абдухолиқ рисолаи докториашро низ ҳимоя кунаду барои боз ҳам беҳтар шудани иқтисодиёти Тоҷикистон ва рушди он роҳҳои навро пешбинӣ намояд.

Лутфия РАСУЛОВА, саромӯзгор, декани факултаи иқтисод ва идораи ДДК ба номи А. Рӯдакӣ

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.