Бо ташаббуси Бахши кор бо ҷавонон ва варзиши ноҳияи Ҷайҳун, аз 12 то 14 августи соли равон дар ҷамоатҳои ноҳия мулоқоти ихтиёриёни Бахш бо аҳли ҷамоатчигӣ, бахусус бо наврасону ҷавонон баргузор гардид.

Дар вохӯриҳо мавзӯҳои нақши ҷавонон дар ҳифзи дастовардҳои даврони соҳибистиқлоли кишвар, риояи талаботи қонунҳо “Дар бораи танзими анъана ва ҷашну маросимҳо дар Ҷумҳурии Тоҷикистон” ва “Дар бораи масъулияти падару модар дар таълиму тарбияи фарзанд”, пешгирии даст задани ҷавонон ба омилҳои номатлуб ва гаравидани онҳо ба ҳизбу ҳаркатҳои террористию экстремистӣ, пӯшидани сару либоси ба фарҳанги мо бегона миёни ҷавонон баррасӣ шуданд.

Зимни мулоқот волонтёрон оид ба дастовардҳои даврони Истиқлолият ва Ваҳдати миллӣ, ки бо заҳмату талошҳои шабонарӯзии Пешвои муаззами миллат, муҳтарам Эмомалӣ Раҳмон ба даст омадааст, ба ҷавонон маълумотҳои таъсирбахш расониданд.

Дар чорабиниҳои мазкур волонтиёрон бо волидон ва ҷавонони ҷамоатҳои “Дӯстӣ”, “Панҷ”, “Қумсангир” ва “Истиқлол” вохӯриҳо анҷом доданд.