Санаҳои 26 ва 27-уми майи соли равон дар доираи сафари корӣ раиси вилояти Суғд Раҷаббой Аҳмадзода ба ноҳияҳои Зафаробод ва Деваштич як қатор наврасону ҷавонони имконияташон маҳдудро аёдат намуд.

Нахуст раиси вилоят дар асоси сиёсати иҷтимоиву халқпарваронаи Асосгузори сулҳу ваҳдати миллӣ-Пешвои миллат, Президенти кишвар муҳтарам Эмомалӣ Раҳмон сокини шаҳраки Зафаробод навраси маъюб Далер Холиқовро аёдат намуд. Ҳамчунин дар ҷамоати деҳоти Ҳамид Алиеви ноҳия раиси вилоят Раҷаббой Аҳмадзода инчунин боз як оилаи маъюб Моҳтарам Шоҳбекзодаро аёдат намуда, кӯмакҳои моддӣ расонид. Аз ҷумла, аз ҷониби раиси вилоят навраси маъюб Шаҳина Бадалова ва Гулру Иброҳимова сокини деҳаи Хуштоири Мухлони Ҷамоати деҳоти Яхтани ноҳияи Деваштич аёдат карда шуд.

Зимни мулоқоту ҳолпурсӣ роҳбари вилоят зикр дошт, ки дастгирии маъюбон, ятимону барҷомондагон ва оилаҳои ниёзманд дар меҳвари сиёсати кунунии Ҳукумати кишвар қарор дошта, дар маҳалҳо бо ин мақсад тадбирҳои мушаххас рӯи даст гирифта мешавад

Волидайни аёдатшудагон аз ин таваҷҷуҳу ғамхорӣ хушҳол гардида, зикр намуданд, ки ҳеҷ гоҳ худро танҳою бекас ҳис намекунанд. Зеро Пешвои миллат ҳамеша дар фикри онҳоянд