24-уми сентябр дар маҷлисгоҳи Мақомоти иҷрои ҳокимияти давлатии шаҳри Бӯстон бо мақсади иштироки фаъолонаи волонтёрон дар раванди интихоботи навбатии Президенти Ҷумҳурии Тоҷикистон бо иштироки беш аз 100 нафар волонтёр семинари омӯзишӣ баргузор гардид.

Дар семинари мазкур муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳмадзода Дилнозаи Давроналӣ, муовини раиси шаҳр ва муовини сардори Раёсати кор бо ҷавонон ва варзиши вилояти Суғд Мансурова Замира иштирок намуда, вобаста ба самтҳои асосии фаъолияти волонтёрӣ ва рушди соҳаи волонтёрӣ дар Ҷумҳурии Тоҷикистон ва саҳми арзишманди ин қишри ҷомеа дар равнди маъракаҳои муҳимми сиёсӣ суханронӣ намуданд.

Муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳмадзода Дилноза зимни суханронии хеш иброз намуд, ки интихобот нишонаи давлати демократӣ ва ҳуқуқбунёд буда, иштироки фаъолонаи ҷомеаи шаҳрвандии Тоҷикистон дар раванди баргузории он нишонаи олии соҳибихтиёрӣ ва дорои маърифати ҳуқуқии шаҳрвандони кишвар мебошад.

Гуфта шуд, дар раванди интихобот иштирок намудани волонтёрон ва хизматрасониҳои ройгонро ба роҳ мондану иҷрои амалҳои хайрхоҳона дар ин маъракаи муҳимми сиёсӣ ба ташаккули ҳисси ватандӯстӣ ва ифтихории миллии насли ҷавони кишвар заминагузорӣ намуда, ташаккули минбаъдаи рушди фаъолияти волонтёриро дар кишвар заминагузорӣ менамояд.