Дар Донишгоҳи аграрии Тоҷикистон ба номи Шириншоҳ Шоҳтемур, 11 апрел, раиси шаҳри Бӯстон Раъно Ҳошимзода бо донишҷӯёни шаҳр, ки дар муассисаҳои олии шаҳри Душанбе таҳсил мекунанд, мулоқот доир намуд.

Раъно Ҳошимзода, раиси шаҳри Бӯстон зимни мулоқот иброз дошт, ки дар ҳама давру замон ба раванди дастгирии ҷавонон ва истифодаи нерӯи ақлониву ҷисмонии онҳо дар пешрафти ҷомеа таваҷҷуҳи махсус дода мешавад. Агар ба марҳилаҳои таърихӣ назар кунем маълум мешавад, ки дар замонҳои қадим низ бузургони илму адаб ба ҷавонон ҳамчун нерӯи пешбарандаи ҷомеа, шахсиятҳои зираку тавоно ва масъулиятшинос боварӣ доштанд. Дар замони соҳибистиқлолии Тоҷикистон бо ибтикори Пешвои миллат муҳтарам Эмомалӣ Раҳмон ҷиҳати таъмини шароити мусоид ва зиндагии шоиста ба ҷавонон ташаббусҳои наҷиб рӯи кор омада, имрӯз низ амалӣ шуда истодааст.

Таъкид гардид, ки имрӯзҳо зиёда аз сад нафар донишҷӯён аз шаҳри Бӯстон дар зинаҳои рӯзонаву ғоибонаи муассисаҳои олии шаҳри Душанбе таҳсил намуда, дар чорабиниҳои гуногуни илмиву оммавӣ, варзишиву фарҳангӣ иштирок мекунанд.

Масъулин ба раванди таълиму тарбия ва вазъи зисту зиндагии донишҷӯён шинос шуда, дар охири мулоқот ба зиёда аз 70 нафар донишҷӯён стипендияи яквақтаинаи раиси шаҳри Бӯстон тақдим гардид.