Бо ширкати 207 нафар ҷавонону наврасон ва собиқадорону варзишгарон дар ноҳияи Роштқалъа зери унвони "Ҷавонон - пайрави Пешвои миллат" роҳпаймоӣ доир гардид.

Инчунин пешопеши ҷавонон раиси ноҳия Юсуф Султонноёбов, мудири Бахши кор бо ҷавонон ва варзиш Зуҳро Муллоҳукматова, кормандони идораву муассисаҳои маҳаллӣ аз дарвозаи маркази ноҳия то назди бинои мақомоти иҷроияи маҳаллии ҳокимияти давлатӣ ҳаракат доштанд.

Ю. Султонноёбов ҷавононро ба ифтихори Рӯзи ҷавонони Тоҷикистон табрик намуда қайд кард, ки бунёди ояндаи мунаввару нек маҳз аз худи ҷавонон вобаста аст ва онҳо бояд дар ҳифзи ҳар як ваҷаб хоки муқаддаси Ватан - модар, пешравию рушди он, солимгардонии наслҳои баъдина ҳам камари ҳиммат банданд.

Пас аз баромаду суханрониҳои ҷавонон барномаи рангини консертӣ баргузор шуд, ки дар он ҳофизони шинохтаи ноҳия аз ҷумла Нозанини Мамадаёз, Насриншо Назаршоев, София Одинабекова, Муқими Хайбар, Рамиз Кабутаршоев, Иброҳими Наврузшо, Убайди Одинабек, сарояндагони ҷавон Адиса Нуруллоева, Мафтуна Мирмамадова, Камила Аноятшоева ва дигарон сурудхонӣ карданд.

Ҳамзамон, дар варзишгоҳи "Медон" миёни шаш даста аз ҳисоби идораву сохторҳои Роштқалъа аз қабили мактаби варзишӣ, молияву андоз, ШВКД, сӯхторнишонӣ, МИМҲД, заминсозӣ мусобиқаи волейбол оғоз ёфт, ки рӯзҳои наздик ҷамъбаст мегардад.