Дар толори Қасри фарҳанги ноҳияи Деваштич 10 июл ҳамоиши гирандагони Стипендияи президентӣ таҳти унвони “Ҷавонон – пайравони Пешвои миллат” доир шуда, дар он 59 нафар гирандагони Стипендияи Президенти Ҷумҳурии Тоҷикистон аз муассисаҳои таҳсилоти миёнаи умумии ноҳия иштирок намуданд.

Тибқи иттилоъ, ҳамоиш бо садо додани Суруди миллӣ ибтидо ёфта, дар он Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Бахтиёр Исматзода, сардори Раёсати кор бо ҷавонон ва варзиши вилояти Суғд иштирок ва суханронӣ намуданд.

Раиси Кумита зимни баромади хеш иброз дошт, ки сиёсати давлатии кор бо ҷавонон дар меҳвари сиёсати Асосгузори сулҳу ваҳдати миллӣ – Пешвои муаззами миллат, муҳтарам Эмомалӣ Раҳмон қарор дошта, барои татбиқи босамари сиёсати давлатии кор бо ҷавонон мо вазифадор ҳастем. Таъсис ёфтани Стипендияи Президенти Ҷумҳурии Тоҷикистон барои наврасону ҷавонон намунаи олии таваҷҷуҳи Пешвои муаззами миллат нисбат ба насли ояндасози кишвар буда, барои ҳавасманд намудани насли ҷавон ҷиҳати ба таҳсилоти муносиб фаро гирифтани онҳо ва ташаккул додани маҳорат ва малакаю истеъдоди онҳо мусоидат менамояд.

Пас аз суханронӣ аз ҷониби раиси Кумита шаҳодатнома ва маблағҳои ҷудогардида аз Фонди махсуси Президенти Ҷумҳурии Тоҷикистон ба ҳар як гирандаи Стипендияи президентӣ дар фазои тантанавӣ тақдим шуд.

Ҳамчунин, дар ин ҳамоиш чанд нафар аз гирандагони Стипендияи Президенти Ҷумҳурии Тоҷикистон бо забонҳои тоҷикӣ, русӣ ва англисӣ баромад намуда, барои дастгириҳои ин қишри ҷавон изҳори сипос намуданд.

“ҶТ”