Дар шаҳри Бохтар 4 феврал бо иштироки раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода ҳамоиши гирандагони Стипендияи Президенти Ҷумҳурии Тоҷикистон таҳти унвони “Пайравони Пешвои миллатем” баргузор гардид.

Дар ин бора Раёсати кор бо ҷавонон ва варзиши вилояти Хатлон иттилоъ дод.

Дар ҳамоиш Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар суханронӣ намуда, аз ҷумла қайд намуд: “Таваҷҷуҳ ва дастгириҳои пайвастаи Пешвои муаззами миллат муҳтарам Эмомалӣ Раҳмон ба ҷавонон рӯз аз рӯз афзун мегардад, ки намунаи олитарини ин таваҷҷуҳ таъсиси як қатор имтиёзҳо, аз ҷумла таъсиси Стипендияи президентӣ мебошад”.

Гуфта шуд, ки Стипендияи президентӣ барои хонандагон ва донишҷӯёни муассисаҳои таҳсилоти миёнаи умумӣ, ибтидоӣ ва миёнаи касбӣ пешбинӣ шуда, дар соли 2022 шумораи гирандагони он аз 400 нафар ба 3000 нафар расонида шуд.

Дар охир аз ҷониби масъулин ба гирандагони Стипендияи президентӣ шаҳодатнома ва маблағи он супорида шуд.