Бо ширкати муовини раиси ВМКБ Гулдаста Орумбекзода, раиси шаҳри Хоруғ Маҳтобшоҳзода Арамбегими Бозор, муовини Раёсати кор бо ҷавонон ва варзиш Сураҷ Чоршанбиев ва ҷавонону варзишгарони вилоят дар театри тобистонаи Боғи фарҳангӣ - фароғатии Хоруғ зери унвони "Пойтахт – тараннумгари музаффариятҳои мо - ҷавонон ва варзишгарон" чорабинии фарҳангӣ баргузор гардид.

Нахуст, намояндагони ҳукумати шаҳру вилоят аз намоишгоҳи молу маҳсулот, дастовардҳои косибӣ ва ҳунарҳои аҷдодии сокинони шаҳр дидан карда, барои дар сатҳи баланд ташкил намудани он ба бошандагон изҳори сипос гуфтанд.

Қабл аз оғози барномаи консертӣ С. Чоршанбиев дар суханронии хеш қайд кард, ки новобаста аз давру замон сарҷамъиву иттиҳоди мардуми кишвар гирди ҳар чорабинӣ муҳимияти вижа дошта, ҳамаи мо бояд ба қадри чунин лаҳзаҳо бирасем.

Аҳли фарҳангу ҷавонон ва муҳассилини макотиби олии вилояту шаҳр беҳтарин созу суруд, рақсу таронаро пешкаши ҳозирин гардонданд.