Иқбол Темирхоҷаев аз зумраи наврасонест, ки дар самти барномасозӣ саҳмгузор аст. Мавсуф дар самти технологияи иттилоотӣ навовариҳои зиёде намуда, барномаҳои “Қонуни маориф”, “Ҷаҳони бофаросат”, “Технознаток”, “Парчам”, “Dono” ва “NUN tj”-ро рӯи кор овардааст, ки онҳо дар “Плей Маркет” ҷо дода шудаанд. Бо ин барномасози 16-сола суҳбате доштем, ки фишурдаи онро пешкаши хонандагон менамоем.

- Ба барномасозӣ кай оғоз кардед?

- Ба барномасозӣ аз синни 11- солагӣ шуруъ намудам.

- Устод ва роҳнамои шумо дар барномасозӣ кист?

- Сараввал ҳар як нафаре, ки ба кори наве мепардозад, эҳтиёҷ ба роҳнамо ва устод дорад. Барои нозукии корро омӯхтан ва ба пуррагӣ аз худ намудани илм танҳо устодон ба шогирдон инро меомӯзонанд. Заҳмати беандозаи онҳост, ки мо ба қуллаҳои баланди муваффақияти касби интихобнамудаамон мерасем. Ва устодони ман Очилов Ҳусейн ва Шуҳрат Абдулҳақов мебошанд, ки чӣ гуна омода намудани барномаҳоро ба ман омӯзонданд.

- Чӣ боис гардид, ки шумо барномасоз шавед?

- Ростӣ, аз хурдӣ мехостам ихтироъкор бошам. Намедонам аз куҷо ин илҳом дар дили ман ҷо шуд. Танҳо орзу дорам, ки дар самти интихобнамудаам муваффақ бошаму ихтироъҳои нав ба нав дар соҳаи технологияи иттилоотӣ намоям.

- Дар ҷодаи барномасозӣ кадом мушкилиҳо мавҷуд аст?

- Дар ҳар як самте, ки шахс интихоб менамояд, мушкилиҳо ҷо дорад. Алалхусус, ҳангоми шуруи самти интихобнамуда. Хушбахтона, ҳама паси сар шуд. Айни ҳол барномаро бе ягон мушкилӣ омода месозам.

- Барои омода кардани як барнома чӣ қадар вақт лозим ва онҳоро бо чанд забон пешниҳод месозед?

- Як барномаро тақрибан муддати як моҳ омода месозам. Ва барномаҳои омода намудаам бо забонҳои тоҷикӣ ва русӣ пешниҳоди истифодабарандагон мегардад.

- Киро идеали худ мешуморед?

- Идеали ман Стив Ҷобс мебошад. Стив Ҷобс ҳамчун пешсафи даврони технологияҳои иттилоотӣ ва ихтироъкор эътироф шудааст. Ман низ мехоҳам дар пешрафти технологияи иттилоотӣ саҳмгузор бошам.

- Бо пешниҳод ва тавсияи кӣ барномаи “Қонуни маориф”- ро рӯи кор овардед?

- Бо пешниҳоди якчанд омӯзгорон, алалхусус бо пешниҳоди омӯзгорам Очилов Ҳусейн барномаро тарҳрезӣ ва омода намудем. Мақсади рӯи кор овардани барномаи мазкур кори омӯзгоронро осон намуда, тариқи электронӣ аз қонуни маориф бархурдор ва ҳамқадами замон будани эшон аст.

- Аз нигоҳи шумо ҳамчун барномасоз ҳоло таваҷҷуҳи наврасон ба барномасозӣ ва технологияи иттилоотӣ чӣ гуна аст?

- Солҳои қабл наврасон на он қадар таваҷҷуҳ доштанд. Имрӯз наврасон ба технологияи иттилоотӣ ва барномасозӣ бисёртар мароқ зоҳир доранд. Саҳми назарраси худро низ дар самти технологияи иттилоотӣ мегузоранд. Умедворем, ки наврасон дар оянда дар ин самт навовариҳои зиёд рӯи кор меоранд.

- Идеяҳо чӣ гуна пайдо мешаванд?

- Пайваста дар ҷустуҷӯям. Тариқи интернет бештар китоб ва дигар воситаҳоро мутолиа менамоям. Мутолиаи пайваста боис мегардад, ки идеяҳои нав, андешаҳои нав пайдо шавад. Ҳар идеяи нави пайдошударо ҷойе зикр ва лоиҳаашро тартиб додаю барномаро омода месозам. Сайругашт низ метавонад илҳомбахш бошад. Зеро ҳангоми сайругашт низ дар сар идеяҳои нав пайдо мегардад.

Таҳмина ЮСУФӢ, “ҶТ”