Аскарони Қӯшунҳои зудамали Қувваҳои Мусаллаҳи Вазорати мудофиаи кишвар ва дигар ҷузъу томҳои қисмҳои ҳарбӣ дар ноҳияи Мурғоб Рӯзи Артиши миллиро бо як самимияти хосса ҷашн гирифтанд.

Нахуст, низомиён бо сафороии батартиб, қадампартоии мураттаб ва омодгаии баланди ҳарбӣ ба ҷойи баргузории чорабинии идона ҳозир гардида, аз ҷониби зиёда аз 900 нафар тамошобин ва роҳбарияти ноҳия хуш пазируфта шуданд.

Раиси ноҳияи Мурғоб Мурзабай Ҷошбаев ҳозиринро ба муносибати ин иди бузург табрику таҳният гуфта, зикр намуд, ки “Содиқона хизмат кардан ба Ватан, ҳифзи марзу бум, манфиатҳои миллӣ ва гиромӣ доштани ҳар як ваҷаб хоки он нафақат барои сарбозону афсарон, балки барои ҳар як шаҳрванди баору номуси ҷумҳурӣ шарту фарз аст”.

Яке аз қисматҳои ҷолибу ғайричашмдошти барномаи идона ин баромади десантчиёни Қӯшунҳои зудамал буд, ки дар ҷодаи ҷанги тан ба тан, гӯштини юнонӣ - римӣ, гӯштини тарзи самбо, шикастани хиштҳои олавдор, сафкашии ғайриоддӣ ва ғайра маҳорати баландро нишон дода, сарбозони беҳтарин барои иштироки фаъолашон дар чорабинӣ бо ифтихорномаи раиси ноҳия қадрдонӣ шуданд.

Ҳамчунин бо ташаббуси Бахши кор бо ҷавонон ва варзиши ноҳия ва мақомоти маҳаллӣ дар ҷамоати Рангкул низ чорабинии ҷашнӣ баргузор гашт. Пас аз он ҷавонони ноҳия аз дидбонгоҳҳои сарҳадӣ дидан намуда, бо шароити зисти аскарону сарбозон, аслиҳаву муҳимоти ҷангӣ, ошхонаву хобгоҳ ва дигар утоқҳо шиносоӣ пайдо карданд.

Дар охир аз ҷониби Бахшу мақомоти маҳаллӣ барои ҷавонон зиёфати идона ташкил гардид.
Бояд зикр намуд, ки чорабиниҳои идона дар ҳамаи ҷамоатҳои Мурғоб доир шуд.