Соли дуввум аст, ки дар Тоҷикистон озмуни ҷумҳуриявии “Илм-фурӯғи маърифат” баргузор шудаистодааст. Бо эълон гаштани озмуни мазкур чеҳраҳои нави ихтироъкоре пайдо шуд, ки барои пешрафти кишвар саҳми худро мегузоранд.

Маҳҷабин Давлатқадамова аз зумраи онҳост. Ӯ донишҷӯи курси якуми Донишгоҳи техникии Тоҷикистон ба номи М.С. Осимӣ буда, аз зумраи ихтироъкоронест, ки барои бартараф намудани мушкилиҳо дар кишвар саҳмгузор аст.

Маҳҷабин дар оилаи зиёӣ бузург шуда, аз кӯдакӣ ба ихтироъкорӣ шавқу рағбати зиёд дошт. Ӯ дар муддати панҷ сол барои бартараф кардани мушкилот дар соҳаҳои хоҷагии қишлоқ асбоби беноқил интиқолдиҳандаи қувваи барқ дар масофаҳои бефосиларо ихтироъ намудааст.

- Мақсад аз ихтирои ин асбоб дар он аст, ки мардуми деҳаҳои дурдаст тавонанд, ҳангоми кор дар саҳро аз он истифода баранд. Ҳатто метавонанд, хати обро аз ҷойҳои дуртар кашида, заминро шудгор кунанд,-мегӯяд Маҳҷабин.



Асбоби ихтироъкардаи ӯро дар соҳаи хоҷагии қишлоқ, шаҳр ва соҳаҳои саноату ҳарбӣ метавон истифода бурд. Ҳамчунин ин асбоб вазифаи огоҳкуниро низ анҷом дода, мардумро пешакӣ аз офатҳои табиӣ метавонад хабардор созад.

“Вазифаи асосии огоҳкунандаро дар соҳаи хоҷагии қишлоқ асосан барои хабардор кардан аз офатҳои табиӣ, муҳофизати анборҳо, хонаҳо ва дигар маҳалҳои муҳофизатшаванда истифода бурдан мумкин аст. Инчунин дар роҳҳои хатарнок ҳамчун чароғаки раҳнамо гузоштани он имконпазир аст. Ҳангоми фаромадани селу тарма ва обхезӣ ин асбоб метавонад якбора ҳам ба маҳалли хатарнок ва ҳам ба Кумитаи ҳолатҳои фавқулода дар муддати 3-4 сония хабар диҳад. Ин асбоб ҳатто суръати тарма ва масофаи онро низ метавонад нишон диҳад. Онро метавон барои муҳофизати хонаҳо, мошинҳо, мағозаҳо, бонкҳо ва дигар маҳалҳои муҳофизатшаванда истифода бурд. Сокинон метавонанд, барои бароҳат хоб рафтан, аз ин асбоб истифода баранд. Ин асбоб метавонад, роҳи ғоратгаронро гирад, зеро ки ӯ пешаки ба соҳибмулк хабар мерасонад”,- гуфт ихтироъкори ҷавон.

Вазифаҳои дигари ин асбоб он аст, ки ҳангоми дар неругоҳҳои барқӣ ё зеристгоҳҳо аз кор мондани ҷараёни барқ ба шуъбаи танзим хабар медиҳад ва масъулин метавонанд, ба осонӣ корашонро анҷом диҳанд. Дар соҳаи ҳарбӣ барои муҳофизати сарҳад асбобро истифода бурдан мумкин аст.

Гуфтан мумкин аст, ки асбобе ки ин бонуи ҷавон ихтироъ намудааст, ба ҷомеаи имрӯзаи мо хеле муфид аст. Ӯ ҳангоми муаррифии асбоби худ ҳамаи аъзои гурӯҳро ба ҳайрат оварда, аз ҷониби онҳо баҳои баланд гирифта буд.

Маҳҷабин ин лоиҳаи худро дар Форуми байналмилалии соҳибкорони ҷавон “Ҷавонон-муҳаррики рушди соҳибкории иноватсионӣ” низ муаррифӣ намуда, барои дастгирӣ ва ба истифодаи он иҷозат дода шуд. Дар форуми мазкур низ ба маҳорати ӯ баҳои баланд доданд.

Аммо ихтироъкор гуфта буд, ки “айни ҳол барои боз ҳам бештар омӯзонидани ин лоиҳа ва аз худ кардани камбудиҳои он вақт лозим аст”. Ӯ нақша дорад, ки лоиҳаи худро такмил дода, баъдан онро ба истеҳсолот пешниҳод кунад.

Барои ин ҷавондухтар ихтироъкорӣ касби дӯстдошта буда, пайваста кӯшиш мекунад, ки дар ҷодаи интихобкардааш муваффақ гардад. Гарчанде ихтироъкорӣ мушкил ҳам бошад, аммо ба мушкилот тан надода, мекушад дастовардҳои нав ба навро соҳиб гардад.

“Соли 2021 ман бо ин лоиҳаам дар озмуни ҷумҳуриявии “Илм-фурӯғи маърифат” иштирок намуда, созовори ҷойи 3-юм гардидам. Ин озмун ба ман боз имконият дод, ки беҳтару бештар хонам, омӯзам ва фаъолият кунам”, - илова намуд, Маҳҷабин.

Мо ба Маҳҷабин барору комёбӣ таманно дорем. Умедворем, ки лоиҳаҳои нави ҷолибро ихтироъ ва пешниҳод намуда, дар пешравии кишвар саҳми арзандаи худро мегузорад.