ҶАВОНОН
Душанбе 17 Январ 2022 06:41
1856
Аз 8 то 29 октябр бо иқдоми КВД «Маркази ҷумҳуриявии фарҳангии ҷавонон «Ориёно» дар мувофиқа бо Кумитаи ҷавонон, варзиш ва сайёҳӣ бахшида ба 25-солагии Истиқлолияти давлатии Тоҷикистон нахустин Фестивали рақси варзишӣ «АРТ ДЭНС» таҳти унвони «Ҷавонон - ҷонибдори тарзи ҳаёти солим» баргузор гардид. Фестивал дар чор қисмат – “Дабстеп”, «Хип-Хоп», «Брейк данс» ва рақси омехта доир шуд, ки дар он 500 раққоси ҷавони кишвар иштирок намуда, ҳунари волои худро нишон доданд.

- Мақсад аз баргузории фестивал муаррифӣ намудани истеъдодҳои ҷавон, ки маҳорат ва қобилияти рақсҳои муосир ва варзишӣ до¬ранд, мебошад. Инчунин, тавас¬сути барномаи фестивали рақси варзишӣ дар байни ҷавонон тарзи ҳаёти солим, пешгирии гарави¬ши онҳо ба зуҳуроти номатлуб, ба монандӣ ҷинояткорӣ, экстремизм ва нашъамандӣ, баланд бардош¬тани малака ва табодули таҷриба байни иштирокчиён ва ҳамчунин ҷалби таваҷҷуҳи онҳо ба варзиш, ба корҳои ман¬фиатбахш буд”, - гуфт Илҳом Юнусов, роҳбари КВД «Маркази ҷумҳуриявии фарҳангии ҷавонон «Ориёно».

- Ман ҳамчун тамошобин дар ҳама давраҳои фестивал иштирок кардам ва ҳеҷ бовар надоштам, ки он дар чунин сатҳи баланд мегузарад. Мухлисони рақси варзишӣ ё муо¬сир ҳам дар ватани азизи мо - Тоҷикистон хеле зиёд будаанд. Тӯли 4 ҳафтае, ки фестивал баргу¬зор гардид, толори “Ориёно” пур аз ҳаводорони ин намуди санъат буд”, - гуфт Сивуш Ниёзов, ки 45 сол дорад.

Солҳои охир рақси варзишӣ ё муосир байни наврасону ҷавонон маъруфияти хос пайдо кардааст. Дӯстдорони он дар Тоҷикистон, махсусан дар шаҳри Душанбе бениҳоят зиёданд. Ҳатто ҷавондухтарон ба чунин рақсҳо таваҷҷуҳ пайдо кардаанд. Ҷавонони мо ин рақсҳо, хусусан, рақси “Брейк-данс”-ро хеле хуб қабул кардаанд. “Брейк-данс” як навъи рақси варзишӣ ё муосир мебошад, ки дар Тоҷикистон на он қадар таърихи тӯлонӣ дорад. Аввалҳои соли 2000-ум дар кӯчаҳои пойтахт ҷавононеро мушоҳида кардан мумкин буд, ки таҳти мусиқии баланд бо навбат дар майдонча ҳаракатҳои акроба¬тии ба рақс монандро иҷро мекар¬данд.

Фирдавси Абдулло, яке аз дӯстдорони рақси муосир бар он ақида аст, ки “Брейк-данс” варзиш, санъат ва рақс аст. Он одамро ба фикр кардану эҷод кардан водор мекунад ва пеш аз ҳама, ба сало¬матии инсон фоида дорад. “Брейк-данс”, рэп, графитти ва диҷейинг ҷузъе аз фарҳанги "хип-хоп" мебо¬шад. Он аз солҳои 70-уми қарни гузашта дар кӯчаҳои Ню-Йорки Амрико миёни фарзандони қишри камбизоати аҳолӣ пайдо шуд, ки имкони дар толорҳои варзишӣ тамрин карданро надоштанд. Вале ин навъи рақс ё варзиш бо гузашти замон маъруфият пайдо карда, аз шуғли кӯчагии як қишри ҷомеа ба шуғли писандидаи "бачаҳои шаҳрӣ" табдил ёфт. Ин навъи рақсҳо бештар чусту чолокӣ, мушакҳои пурқувват ва ҷисми обутобёфта¬ро талаб мекунанд. Шахсоне, ки ба ин намуди рақс машғуланд, до¬рои қомати зебо ва ҳаракатҳои мавзунанд, ҳамеша дар меҳвари таваҷҷуҳ қарор доранд. Онҳо дар ҳама ҳолат худро озоду роҳат эҳсос мекунанд. Аз ҳама муҳим, салома¬тии худро ҳифз мекунанд”, - мегӯяд Фирдавс.

Брейк-данс яке аз қисматҳои санъат аст. Дар шароити ҷаҳонишавӣ ҳама намуди санъате, ки дар дунёд пайдо мешаваду рушд мекунад, он ҳатман ба Тоҷикистон ҳам меояд ва дӯстдорону ҳаводорони худро пайдо мекунад.

Бигзор чунин намуди санъат бошад, аммо дар чорчӯбаи қонун ва ҳадду меъёр. Агар аз меъёр гу-зарад, бемаънӣ мешавад ва шаъну шарафи худро гум мекунад. Дигар ин ки машғул шудан ба рақси муосир наврасону ҷавононро аз қаллобӣ, нашъамандӣ, бекоргардӣ ва ҳамроҳ шудан ба гурӯҳҳои ифротӣ дур месозад.

Бисёриҳо бар он ақидаанд, ки ин намуди рақс ба фарҳанги мо бегона аст ва метавонад ба он латма ворид созад. Аммо мо агар фикри фарҳанги худро кунем, пас фикри наврасону ҷавононро кӣ мекунад? Хуб медонем, ки 70 фоизи аҳолии Тоҷикистонро наврасону ҷавонон ташкил медиҳанд. Агар онҳоро ба ҳоли худ гузорем, дар андешаашон набошем, дар оянда кӣ ва ё чӣ ме-шаванд...?

Искандар Раҷабов, директор ва роҳбари бадеии ансамб¬ли давлатии хизматнишондодаи рақсии “Лола” ба номи Ғаффор Валаматзода вобаста ба рақси варзишӣ чунин назар дорад: “Рақси варзишӣ имрӯз дар ҷаҳон бениҳоят машҳур аст. Таваҷҷуҳи наврасону ҷавонон ба он хеле зиёд аст. Ман ҳам шод ҳастам, ки ҷавонони тоҷик ба ин намуди рақс шавқи зиёд доранд. Имрӯз замона ҳаминро талаб мекунад, ки ғайр аз рақсҳои миллӣ ё маҳаллии худ барои халқи мо, хусусан ҷавонон рақсҳои ҳозиразамони аврупоӣ ба монанди “Хип-хоп”, “Брейк-данс”, “Арт-данс”, “модерн” (рақсҳои клас¬сикиро ба тарзи муосир иҷро кар¬дан) лозим аст. Ин фарҳанги моро ҳеҷ вақт коста намекунад, чунки рақсҳои халқии худамон ҷойи махсуси худро доранд. Рақси муо¬сир ё варзишӣ низ мисли рақсҳои тоҷикона мусиқӣ ва ҳаракатҳои хос дорад. Имрӯз мо мусиқиҳои тоҷиконае дорем, ки ба рақси аврупоӣ ё муосир мувофиқат ме¬кунад. Дигар ин ки аз ин чиз роҳи гурез ҳам нест, чунки наврасону ҷавонон худ ба ин майл доранд ва онҳоро касе маҷбур накардааст. Санъат чизе нест, ки онро маҷбурӣ ба қалби касе ҷой кунем. Бисёр хуб мешуд, ки дар ягон ҷой, маслан маркази ҷавонон маҳфилҳои рақси ғарбӣ, сурудхонии ҳозиразамон ташкил шавад. Наврасону ҷавонон ба ҷойи беҳуда гаштану ба корҳои ношоям даст задан, ба он ҷо ра-ванду вақти худро гузаронанд. Инчунин, бояд як гурӯҳи рақсии муосир (ғарбию варзишӣ) таш¬кил ва ба барномаҳои кон¬сертии сатҳи ҷумҳурӣ ва байналмилалӣ ҷалб шавад. Ба ансамбли мо бисёр ҷавонон барои омӯхтани рақсҳои муосир муроҷиат ме¬кунанд, аммо мо онҳоро қабул карда наметаво¬нем, чунки ансамбли мо танҳо рақсҳои классикиро меомӯзонад”.

Воқеан, дар Тоҷикистон барои гурӯҳи ҷавононе, ки ба рақси муосир майл доранд, шароит фароҳам нест. Ба¬рои онҳо бояд ҷойи махсус ба¬рои тамрин сохта шавад. Имрӯз ҷавонони мо бештар дар ҷойҳое тамрин мекунанд, ки он ҷо ҳама бетону асфалт аст. Вақти афтидан мумкин аст, худро захмӣ намо¬янд. Аз ҷониби дигар, маъмурони Театри опера ва балет, ансамблҳои рақсӣ, Сирки давлатӣ имкон доранд, ин ҳавасмандонро ҷалб намоянд, зеро ҷавононе, ки ба ин навъи рақс машғул ҳастанд, пеш аз ҳама солим ва ба ҳама кор қодиранд, чун варзишгаранд.

Шуҳрат Ҷалилов, ҷавони раққос минат¬дории худро ба Ку¬митаи ҷавонон, варзиш ва сайёҳӣ ва КВД “Ориёно” барои гузарони¬дани озмуни рақсҳои варзишии “Арт-Данс” расонида, мегӯяд: “Ман се сол мешавад, ки ба рақси муо¬сир машғул ҳастам. Шавқи ман ба ин намуди рақс пас аз тамошои видеоклипҳои хориҷӣ ба "Брейк-данс", “Хип-хоп”, “Арт-данс” ва ам¬соли ин пайдо шуд. Ман нисбат ба рақси варзишӣ эҳтироми зиёд дорам ва онро бениҳоят дӯст ме¬дорам. Мо ҳамроҳи дӯстон баъд аз дарс “Брейк-данс” ва “Хип-Хоп” мерақсем. Ин машғулияти ҳаррӯзаи мост. Агар ҳар рӯз ин на¬муди рақсро такрор накунӣ, аз хо¬тир мебарояд, чунки дар он бештар ҳаракатҳои акробатӣ ва варзишӣ мавҷуд аст. Аслан, ин намуди рақс варзиш аст. Масалан, ҳангоми рақс ҳаракатҳои акробатӣ, ҳамчунин бо сар тоб хӯрдан, ҷаҳидану худро ба замин партофтан, ҳунари дарки мусиқиро доштану мувофиқ ба он ҳаракат кардан, тавони фикру эҷод кардани ҳаракатҳои наву ҷолиб доштанро меомӯзем. Баъзеҳо ба ин навъи рақс рӯ меоранд, аммо баъди як-ду моҳ, вақте диданд, ки мушкил аст, аз баҳраш мегузаранд. Онро дар як ё ду моҳ аз худ кардан ғайриимкон аст. Як ҳаракатро дар ним сол ё як сол аз худ кардан мумкин аст".

Дар шаҳри Душанбе Федератсияи рақсҳои варзишӣ фаъо¬лият мекунад, ки ба наврасону ҷавонони дӯстдорони рақсҳои муосир ё варзишӣ, ба монанди “Аэробика”, “Хип-хоп”, “Брейк-данс”, рақсҳои арабӣ, Амрикои Лотинӣ, “Танго” ва ғайра омӯзиш медиҳад. Федератсияи рақсҳои варзишии Тоҷикистон дар асоси студияи рақсии "Қарни нав" ташкил ёф¬тааст. Дар он 150-200 нафар хоҳишмандони синну соли мухталиф бар ивази аз 100 то 200 сомонӣ рақсҳои гуногуни муосирро меомӯзанд.

Анастасия Бутенко дар Федератсияи рақсҳои варзишӣ ба ҳайси мураббӣ кор мекунад. Вай мегӯяд: "Вақте мо таълими рақсҳои варзишӣ ё муосирро шуруъ кар¬дем, хоҳишмандон чандон зиёд набуданд. Аммо бо гузашти сол ҳаводорони ин намуди рақсҳо аз ҳисоби наврасону ҷавонон зиёд шудан гирифт. Ҳоло ин рақсҳо та¬лабгорони зиёд доранд. Дар баро¬бари ин бо ташаббуси Ҳукумати ҷумҳурӣ дар кишвар озмунҳои рақсҳои муосир гузаронида мешавад, ки ин барои боз ҳам муаррифӣ ва ҷалб кардани дӯстдорони ин намуди санъат роли калон мебозад. Солҳои охир бештар бонувони ми¬ёнсол ба федератсия меоянд ва ба рақс машғул мешаванд. Махсусан ба рақси арабӣ, чунки ин намуди рақс шахсро хароб мекунад”.

Анастасия ба саволи “Рақси му¬осир шахсро бадахлоқу беодоб мекунад?” чунин посух дод: “Ман ба ин ақида куллан розӣ нестам. Рақс баръакс шахсро бомаърифат ва боодоб мекунад. Ман тӯли чанд соле, ки дар федератсия машқ медиҳам, мушоҳида кардам, ки наврасону ҷавононе, ки ба рақс машғул ҳастанд, хушмуомила, бо¬одоб ва хушрафторанд, нисбат ба ҷавононе, ки дар кӯчаҳо бекор мегарданд. Онҳо дар ин ҷо пеш аз ҳама ҳурмат кардани калонсолон, эҳтироми якдигарро меомӯзанд”.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Январ 2022 c.