ҶАВОНОН
Якшанбе 11 Апрел 2021 08:24
7021
Вақте қудрати эрод аз ҷавононро дорему аз муваффақияти онҳо намегӯем

Носипосӣ як намуди заъф аст. Одамони барҷаста ҳеҷ гоҳ носипос нестанд. Иоҳан Гёте, файласуф ва сиёсатмадори олмонӣ

Вақте соли 2017-ро Соли ҷавонон эълон карданд, тамоми расонаҳо, новобаста аз шакли фаъолият ва моликият расо як сол дар бораи ин сол ва дар бораи ҷавонон мегуфтанд. Саркарда аз кучактарин мушкилот то баландтарин муваффақиятҳои ин қишри ҷомеа дар расонаҳо инъикос меёфт. Баду неки насли ояндасози кишвар бо тамоми паҳлуҳояш дар матбуоти даврӣ бозтоби худро меёфт ва дар ин баробар чандин мушкилоти ҷавонон низ ҳаллу фасл гардид. Ҳамин буд, ки ҳатто дар дурдасттарин минтақаҳои кишвар низ барои насли наврасу ҷавон ғамхориҳо зоҳир гардиду саркарда аз майдончаву толорҳо то мактабу маҷмааҳои варзишӣ бино ёфтанд. Ва дар пайи ин борҳо аз ҷавонон ҷиҳати таваҷҷуҳи ҳам Ҳукумат ва ҳам расонаҳои чӣ давлатӣ ва чӣ ғайридавлатӣ ташаккуру таҳсин шунида будем. Вале бо гузашти Соли ҷавонон гӯё расонаҳо низ, ки ҳамеша аз “ноҷуриҳои зиндагии ояндагони давлату миллат” ҷор мезаданд, эшонро фаромӯш карданд...

Аҳёнан ба назар мерасид, ки дар кадом расонае дар бораи муваффақияти ҷавонон гӯянд. Он навиштаҳо ҳам агар дар пасманзари худ кадом бозиеро надошта бошанд, шояд дар ин муддат ҳеҷ навиште аз муваффақияти кадом як ҷавон дар расонаҳо нашр нагардидааст. Аммо биёед сари ин масъала поинтар ҳарф занем.

Бо гузашти се сол аз Соли ҷавонон бигзор, ки расонаҳои мо фаромӯш карданд ё соҳибрасонаҳо лозим надонистанд, масъалаи ҷавононро дар саҳифаҳои худ матраҳ кунанд ё дар ин миён кадом чизи дигар буд, вале вақте мо дар 365 рӯзи сол як рӯзро махсуси ҷавонон кардаем, чаро онро ҳам фаромӯш карданд? Ин суолест, ки бояд ҳар соҳибрасона барои посухаш ҷавобе дошта бошад. Чаро?

Чун мо ҳамеша иддао мекунем, ки ҷавонон ояндаи миллатанд ва қариб 70 фисади ҷомеаи Тоҷикистонро маҳз ҷавонон ташкил мекунанд, чаро дар баробари ҳаёту рӯзгори онҳо бояд бетараф бошем? Дар ин ҳол дар бораи эшон нагуфтан шояд гуноҳ ҳам бошад.

Дуруст аст, ки имрӯз мавзӯи рақами 1-и расонаҳои кишвар коронавирус аст. Ҳама расонаҳо мекӯшанд, ки дар бораи ин беморӣ ва роҳҳои табобату раҳоӣ аз ин вабо нависанд. Омори беморону шифоёфтагонро расонаӣ кунанд. Шояд барои дилбардории ҷомеа тавсияҳову роҳҳои пешгириро барои мардум пешниҳод мекунанд. Ин албатта аз дидгоҳи касбӣ чизи қобили дастгирист. Бидуни ин шояд мавҷудияти расонаҳо низ зери суол равад. Аммо дар ин баробар ёдоварӣ накардан аз ҳаёту фаъолияти қишре, ки ҳадди аксари ҷомеаро ташкил медиҳад, магар ҷои нигаронӣ нест?

Бо он ки тӯли чанд сол аст, дар расонаи ба қавле махсуси ҷавонон фаъолият дорам, дар арафаи таҷлили Рӯзи ҷавонон ба хотири огоҳии бештар аксари нашрияҳои давриро варақ задам. Сар карда аз рӯзномаҳои давлатӣ то ҷамъиятиву хусусӣ қариб дар ҳеҷ куҷо аз ин рӯз ёд накарда буданд. Ҳоло агар дар бораи кашфи як қаҳрамону як чеҳраву як истеъдод намегуем, мешуд, ки аз мушкилоти эшон бахшида ба ҳамин рӯз ягон мавзӯъро пайгириву барои бартараф гаштани он саҳм мегузоштанд. Фақат дир ин миён нашрияи “Фараж” истисно аст (мо ҳоло дар бораи ВАО-и электронӣ ҳарфе намегӯем), ки бо нашри ду мавод баъзе паҳлуҳои ҳаёти ҷавононро бозгӯӣ кардааст.

Ҳоло агар билфарзе зодрӯзи кадом шахсияте фаромӯш шавад ва дар ҳамон ҳафта барои табрику таҳсинаш маводе нашр нагардад, доду вовайлои аксарият ба гардун мепечад. Аммо вақте аз Рӯзи ҷавонон, ки дар ин миён ҳудуди 6 миллион нафар фарогиранд, ёд нашуд, чашми касе намепарад. Ин магар қадрношиносӣ нест? Ё инро чизе дигар ҳам метавон гуфт?

Албатта, ин ки ҷавонон мушкил доранд ва ба таври бояду шояд аз ҳар ҷиҳат рушд намекунанд, аз ҳақиқат орӣ нест. Гузашта аз ин дар кишвари мо ҳоло шароит барои ҷавонон ба гунае муҳайё нашудааст, ки онҳо ҳаматарафа бекамбудӣ бошанд. Вале ҳамине, ки ҳаст, дар маҷмуъ барои як кишвари сисола кам нест. Ва доир ба дастгирии ҷавонон ҳам метавон гуфт, ки Ҳукумати кишвар ба таври назаррас онҳоро дастгирӣ мекунад. Фикр мекунам, он чи бояд давлату Ҳукумат барои ҷавонон кунад, дар сатҳи қувваву иқтидоре ки дорем, карда истодааст. Болотар аз ин беинсофӣ мешавад, вақте мо нодида гирем, ки имрӯз ҷавонон аз ҷониби давлату Ҳукумат дастгирӣ намеёбанд ва ё кам дастгирӣ меёбанд. Вале ҷомеаи шаҳрвандӣ, хусусан рӯзноманигорон дар ин раванд бадбахтона хеле фаъолияти суст доранд. Ҳамагӣ мушкилу норасоиҳоро дар ҳаёти ҷавонон дида метавонем. Ба таври беохир аз проблемаҳои онҳо мегӯем. Вале ба назар мерасад, ки дар пешрафту муваффақият ва он чизе, ки онҳо ба даст меоранд, кам таваҷҷуҳ дорем. Беаҳамият будан ё бетарафӣ ихтиёр кардани расонаҳои кишвар ва ёд накардан аз рӯзи иди ҷавонон ҳақиқати гуфтаҳои моро тақвият мебахшад.

Вақте бегумон медонем, ки оянда аз ҷавонон аст ва ба кадом шаклу намуд рушд ёфтани кишвар дар дасти онҳост, бояд аз имрӯз онҳоро шиносем. Ва натанҳо шиносем, балки ба дигарон шиносонем. Онҳоро дар ҳар вазъу ҳолат чун неруи асосӣ ёд кунем. Арзандаҳоро ба ҷомеа муаррифӣ созем. Дастгирӣ кунему аз қувваи зеҳнию ҷисмиашон истифода кунем. Онҳое, ки аз ягон ҷиҳат ақибмондаанд, таҳрикашон диҳем, ёрӣ расонем. Ба ҳамин фикр бошем, ки фардои хуби мо, аз дастгирии имрӯзи онҳост, фардои бади мо, аз бетарафии имрӯзи мо!

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.