Имрӯз, 10 апрел, ба муносибати гусели наваскарон дар Боғи фарҳангу фароғатии ба номи Абулқосими Фирдавсӣ бо иштироки Аҳмадзода Дилноза, муовини раиси Кумитаи кор бо ҷавонон ва варзиш, намояндагону кормандони комиссариатҳои ҳарбӣ ва беш аз ҳазор нафар ҷавонону сарбозон чорабинии тантанавии гусели наваскарон аз шаҳри Душанбе барои адои хизмати ҳарбӣ ба сафи Қувваҳои Мусаллаҳи Ҷумҳурии Тоҷикистон баргузор гардид.

Аҳмадзода Дилноза, муовини раиси Кумитаи кор бо ҷавонон ва варзиш зимни суханронии худ иброз дошт, ки: “Барои насли ҷавон хизмат дар сафи Қувваҳои Мусаллаҳи мамлакат муҳимтарин мактаби ҷавонмардӣ ва матонату обутоби ҳаёт мебошад. Маҳз дар ҳамин айём ҷавонписарон дарси шуҷоату мардонагиро аз бар намуда, муқаддас будани рисолати олии ватандорӣ - муҳофизати марзу буми Ватанро дарк мекунанд.”

Номбурда дар охири баромади хеш даъватшудагонро ба хизмати содиқона, дӯст доштани Ватан ва содиқ будан ба халқу давлат ҳидоят намуда, барояшон хизмати бобарор таманно намуд.

Изҳори боварӣ карда шуд, ки ҷавонони сарбаланд чун ворисони аҷдоди соҳибтаъриху соҳибтамаддуни худ баҳри ободии кишвар, таъмини оромиву суботи мамлакат ва пешрафти Тоҷикистони азиз  ҷаҳду талош варзида, қарзи фарзандии худро дар назди Ватан – Модар ба шоистагӣ иҷро менамоянд. 

Барномаи ҷолиби консертӣ бо иштироки санъаткорони маҳбуби кишвар  чорабиниро боз ҳам рангин намуда, дар фарҷом маъракаи мардумии “Нонгазон” доир шуд ва даъватшавандагон бо хушнудӣ ин анъанаи суннатиро иҷро намуданд.