Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон рӯзи 5 ноябри соли равон дар Донишгоҳи давлатии Данғара мизи мудаввари ҷумҳуриявӣ таҳти унвони “Нақши ҷавонон дар тарғиби ғоя ва арзишҳои миллӣ” баргузор гардид.

Дар оғоз ректори Донишгоҳи давлатии Дангара Шоҳиён Нуралӣ Набот ташрифи меҳмононро ба ноҳияи зебоманзари Данғара хайра мақдам гуфта, сипосгузории хешро ба роҳбарияти Кумитаи кор бо чавонон ва варзиши назди Ҳукумати Ҷумхурии Тоҷикистон иброз дошт ва дар рафти кори мизи мудаввар ба иштирокчиён муваффақият таманно намуд.

Муовини раиси Кумитаи кор бо ҷавонон ва варзиши назди Ҳукумати Ҷумхурии Тоҷикистон Аҳмадзода Дилноза аввалан меҳмононро ба муносибати 25 - солагии Конститутсияи Ҷумхурии Тоҷикистон табрик намуда, аз ҷумла иброз дошт, ки воқеан Конститутсия шоҳсутун, бахтномаи миллат ва тақдирсози имрӯзу фардои давлати Тоҷикистон ва миллати тоҷик мебошад. Ин санади тақдирсоз ҳамчун шаҳодатномаи адолатхоҳу бунёдкор ва ваҳдатталаби Тоҷикистон баромад намуда, маҳсули замони соҳибистиқлолии миллат ва кишвари азизамон мебошад. Конститутсия ҳамчун қонуни асосии кишвар дар такмили шакли идоракунии давлат ва низоми давлатдорӣ, устувории давлатдорӣ, пойдории сулҳу субот, якпорчагии ватан ва осоиши ҳаёти мардум саҳми беандоза дорад.

- Дар партави сиёсати оқилонаи Асосгузори сулҳу ваҳдати милӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон раванди инкишофи ҷаҳонбинии солими афроди миллат ва ҳидоят намудани ҷавонон ба худшиносиву худогоҳӣ бо вусъати тоза ба роҳ монда шуда, дар ин росто ба масъалаи баланд бардоштани маърифати сиёсиву хуқуқӣ ва иттилоотии ҷавонон, чун яке аз самтҳои рушди давлатдории миллӣ, таваҷҷӯҳи махсус зоҳир карда мешавад, - қайд намуд Аҳмадзода Дилноза.

Дар кори мизи мудаввар ҷоизадорони Имоили Сомонӣ, олимон ва муҳаққиқони ҷавони кишвар, коршиносони ҷавон иштирок ва суханронӣ намуданд. Дар мизи мудаввар вобаста ба мавзӯъҳои «Нақши конститутсия дар ҳаёти ҷавонон», «Худшиносии миллӣ омили инкишофи ҳисси ватандӯстии ҷавонон», «Тарғиб ва гиромидошти арзишҳои миллӣ- рисолати мо, ҷавонон», «Ифтихори ватандорӣ дар «Шоҳнома»- и Абулқосим Фирдавсӣ» маърузаҳо карданд.

Дар қисмати дуввуми ҳамин рӯз дар толори маҷлисгоҳи Донишгоҳи давлатии Данғара ҷаласаи навбатии Шӯрои олимони ҷавони Тоҷикистон таҳти роҳбарии Абдуллозода Аҳтам Рустам, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, баргузор гардид.

Шӯро бо садо додани Суруди миллӣ оғоз гардида, ректори Донишгоҳи давлатии ноҳияи Данғара зимни суханронии худ саҳми олимони ҷавони тоҷикро дар рушди илми кишвар муҳим арзёбӣ намуд. Оид ба фаъолияти Шӯро дар солҳои 2017-2019 раиси Шӯрои олимони ҷавони Тоҷикистон Аҳлиддин Саймуддинов гузориш дода, дастовардҳои аъзои Шӯрои олимони ҷавони кишварро дар ин давра бесобиқа номид. Ҳамчунин, зикр гардид, ки дар заминаи ташаббусҳои созандаи Пешвои миллат муҳтарам Эмомалӣ Раҳмон олимони ҷавони кишвар ба дастовардҳои бузург ноил гардида, дар самтҳои мухталифи илм комёбиҳои беназирро соҳиб гардиданд.

Дар охири кори Шӯро бо тарафдории аъзои Шӯро ва иштирокчиёни ҷаласа Рустам Наботӣ раиси Шӯрои олимони ҷавони Тоҷикистон интихоб гардид.

Дар қисмати саввум раиси Кумитаи кор бо ҷавонон ва варзиши назди Ҳукумати Ҷумхурии Тоҷикистон Абдуллозода Аҳтам Рустам бо ҷавонони фаъоли ноҳияи Данғара, донишҷӯёни муассисаҳои таҳсилоти олии ноҳияи Данғара суҳбати озоди хотирмон анҷом дод. Раиси кумита ҳозиринро бо рӯзи Конститутсия муборакбод намуда, аз ҷумла қайд кард, ки Конститутсияи Ҷумҳурии Тоҷикистон намунаи олии тамаддунофарии миллати тоҷик буда, дар он орзую омол, таърихи ҳазорсола ва арзишҳои миллию давлатдорӣ дарҷ ёфтааст. Ӯ ҳамчунин зикр намуд, ки дар доираи сиёсати ҷавонпарваронаи Пешвои маҳбуби миллат, муҳтарам Эмомалӣ Раҳмон бо мақсади татбиқи сиёсати давлатии ҷавонон тамоми имкониятҳои замони муосир фароҳам оварда шудааст ва ҷавононро мебояд аз ин имкониятҳои фароҳамовардашуда самаранок истифода намоянд.

Дар охир барномаи рангини фарҳангӣ табъи меҳмонро болида гардонид.