Имрӯз дар Донишгоҳи байналмилалии сайёҳӣ ва соҳибкории Тоҷикистон ҷаласаи IV олимпиадаи ҷумҳуриявии донишҷӯёни муассисаҳои таҳсилоти олии касбии Ҷумҳурии Тоҷикистон барои дарёфти "Ҷоми раёсати Донишгоҳи байналмилалии сайёҳӣ ва соҳибкории Тоҷикистон" баргузор гардид.

Дар ҷаласаи мазкур Дилрабо Мансурӣ, муовини Сарвазири Ҷумҳурии Тоҷикистон, Гулаҳмадзода Зулфиқор, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муминзод Камолиддин, раиси Кумитаи рушди сайёҳӣ, Асрорзода Убайдулло, ректори Донишгоҳи байналмилалии сайёҳӣ ва соҳибкории Тоҷикистон, устодону донишҷӯён иштирок ва суханронӣ намуданд.

Пеш аз оғози ҷаласа Дилрабо Мансурӣ дар якҷоягӣ бо дигар намояндагон аз рафти баргузорӣ ярмаркаи ҷойи кори холӣ дидан карданд.

Дилрабо Мансурӣ зимни суханронии худ ба раёсати Донишгоҳ барои иқдоми пайваста вобаста ба амилисозии барномаву стратегияҳои кишвар изҳори сипос гуфта, изҳор дошт, ки “чунин озмунҳо ҳамчун майдони табодули дониш, афкор ва таҷриба барои ташакули касбии мутахассиони соҳаи илмҳои табии ва дақиқ заминаи бунёдӣ фароҳам месозад”.

Сипос Гулаҳмадзода Зулфиқор, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ҳамаи иштирокчиёнро ба муносибати Рӯзи ҷавонони Тоҷикистон ва Рӯзи ҷаҳонии футбол табрик намуда, иброз намуд, ки “Талошҳои пайвастаи ҷавонони мо ҷиҳати иштироки фаъолона дар рушду нумуи кишвари азизамон бовар бар он месозад, ки ҷавонони мо бо ҳисси баланди худшиносиву худогоҳии миллӣ ва ифтихор аз давлату давлатдории миллӣ дар оянда низ тамоми неруи худро барои ҳифзи дастовардҳои истиқлолият, таҳкими давлатдорӣ, ваҳдати миллӣ, сулҳу субот, рушди минбаъдаи иқтисодиву иҷтимоии Ватани азизамон ва устувор гардонидани мавқеи он дар қатори кишварҳои мутараққӣ сафарбар менамояд”.

Дар фарҷоми ҷаласа аз ҷониби Гулаҳмадзода Зулфиқор, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба омӯзгорони ДБССТ барои ҳамкории пайваста сипосномаҳо тақдим карда шуд.

Наҷиба МУРОДБЕКОВА, “ҶТ”