Бо ибтикори Раёсати кор бо ҷавонон ва варзиши шаҳри Душанбе 1 феврал дар Муассисаи давлатии таълимии “Литсей-интернати президентӣ барои кӯдакони болаёқати Ҷумҳурии Тоҷикистон” ҳамоиши гирандагони стипендияи Президенти Ҷумҳурии Тоҷикистон баргузор гардид.

Дар ҳамоиши мазкур Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дилбар Одилзода, муовини раиси шаҳри Душанбе,  инчунин кормандони Раёсати кор бо ҷавонон ва варзиши шаҳри Душанбе, мудирони кор бо ҷавонони ноҳияҳои ҳудуди пойтахт ва гирандагони Стипендияи президентӣ иштироку суханронӣ намуданд. 

Нахуст Дилбар Одилзода, муовини раиси шаҳри Душанбе суханронӣ намуда, иброз дошт, ки “таъсиси стипендияи Президенти Ҷумҳурии Тоҷикистон яке аз ташаббусҳои беназири Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад. Дар ҷавоб ба ин ғамхориҳои Пешвои миллат шумо - ҷавонони фаъоли кишварро зарур аст, ки ҳарчи бештар илмомӯзӣ намоед ва дар пешрафти соҳаҳои гуногуни кишвар саҳмгузор бошед”.

Сипас Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баромад намуда, гирандагони Стипендияи президентиро барои сазовор шудан ба ин стипендия таҳният гуфт.

“Шумо гирандагони Стипендияи Президенти Ҷумҳурии Тоҷикистон аз дигар ҷавонони ҳамсоли худ дар назди ҷомеа масъулият ва рисолати зиёдтарро бар дӯш доред. Бояд бо рафтор, гуфтор ва пиндоратон аз дигарон ба куллӣ фарқ кунед. Сарвари кишвар тамоми кӯшиши худро ба он харҷ намуданд, ки дар кишвар як насли босавод ва донандаи техникаву технологияи нав тарбия намоянд ва онҳо тавонанд, оянда давлатро соҳибӣ кунанду обрӯи кишварро дар арсаи байналмилалӣ бо дониши худ муаррифӣ намоянд”, - иброз дошт раиси Кумита.

Шоҳзод Раҳимзода, сардори Раёсати кор бо ҷавонон ва варзиши шаҳри Душанбе доир ба баргузории чорабинии мазкур иброз дошт, ки “Дар партави сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон озмуни мазкур ҳамасола ташкил ва баргузор карда мешавад. Имрӯз гирандагони Стипендияи президентӣ аз 400 адад ба 3000 адад дар сатҳи ҷумҳурӣ ва аз шумораи 47 адад ба 320 адад дар шаҳри Душанбе расонида шудааст, ки ин ҳама дастгириҳои бевоситаи Пешвои миллат ва раиси шаҳри Душанбе нисбат ба ҷавонон аст”.

Баъд аз суханрониҳо ба ғолибони озмуни гирандаи Стипендияи Президенти Ҷумҳурии Тоҷикистон шаҳодатномаи гирандаи стипендияи мазкур дода шуд.

Дар охири ҳамоиш аз ҷониби ҳунармандони Раёсати фарҳанги шаҳри Душанбе барномаи фарҳангӣ пешкаши иштирокчиён гардонида шуд.